શ્રીલંકા અંડર-19એ ત્રીજી યુથ વન-ડેમાં ભારતને 1 વિકેટે હરાવીને ત્રણ મેચની સિરીઝ 2-1 થી પોતાના નામે કરી લીધી. ટોસ હારતા પહેલી બેટિંગ કરતા ભારતે વીકે વિનીતની સદી અને લક્ષ્ય રાયચંદાણીની ફિફ્ટીની મદદથી 50 ઓવરમાં 8 વિકેટે 290 રન બનાવ્યા. જવાબમાં શ્રીલંકાએ 291 રનનો ટાર્ગેટ છેલ્લી બોલ પર 9 વિકેટ ગુમાવીને ચેઝ કરી લીધો. હમ્બનટોટામાં રમાયેલી આ મેચમાં યજમાન શ્રીલંકાએ છેલ્લી ઓવરમાં ભારત પાસેથી જીત છીનવી લીધી. છેલ્લી ઓવરમાં શ્રીલંકાને જીતવા માટે 11 રન જોઈતા હતા અને તેના હાથમાં માત્ર એક વિકેટ બચી હતી. દબાણ હોવા છતાં ટીમે ટાર્ગેટ ચેઝ કરીને મેચની સાથે સિરીઝ પણ પોતાના નામે કરી લીધી. વિનીતે 131 રન બનાવ્યા ભારત માટે વીકે વિનીતે શાનદાર સદીની ઇનિંગ રમી. તેણે 136 બોલમાં 13 ચોગ્ગા અને 3 છગ્ગાની મદદથી 131 રન બનાવ્યા. લક્ષ્ય રાયચંદાણીએ 63 બોલમાં 7 ચોગ્ગા સાથે 61 રનનું યોગદાન આપ્યું. બંને બેટર્સે ત્રીજી વિકેટ માટે 108 રનની ભાગીદારી કરીને ભારતીય ઇનિંગ્સને સંભાળી. જોકે, ભારતીય ટૉપ ઓર્ડર અપેક્ષા મુજબ પ્રદર્શન કરી શક્યો નહીં. કેપ્ટન યશવર્ધન ચૌહાણ 6 રન અને રજત બઘેલ 14 બોલમાં 8 રન બનાવીને આઉટ થયા. કુશાગ્ર ઓઝાએ 3, અર્જુન રાજપૂતે 14 રન બનાવ્યા. સાતમા નંબરે ઉતરેલા શાવિન વિનોદે 31 બોલમાં 3 ચોગ્ગાની મદદથી 26 રનની ઉપયોગી ઇનિંગ રમી, જ્યારે મોહિત 19 રન બનાવીને અણનમ રહ્યો. શ્રીલંકા તરફથી સેથમિકા સેનેવિરાત્નેએ સૌથી વધુ 4 વિકેટ લીધી. ગિમ્હાન મેન્ડિસને 2 અને કવિજા ગામગેને 1 વિકેટ મળી. ચમિકા હીનાતિગલાએ અપાવી રોમાંચક જીત 291 રનના ટાર્ગેટને ચેઝ કરતા શ્રીલંકાની શરૂઆત સારી રહી ન હતી અને તેણે પહેલી વિકેટ વહેલી ગુમાવી દીધી. ત્યારબાદ સેનુજા વેકુનાગોડાએ 67 રન બનાવીને ઇનિંગ્સ સંભાળી. કવિજા ગામગે (29) અને કિથમા વિથાનાપથીરાના (31)એ પણ મહત્વપૂર્ણ યોગદાન આપ્યું. આખરે ચમિકા હીનાતિગલાએ મેચ વિનિંગ ઇનિંગ્સ રમી. તેણે 68 બોલમાં 84 રન બનાવ્યા અને ટીમને જીત સુધી પહોંચાડી. છેલ્લી ઓવરમાં શ્રીલંકાને 11 રન જોઈતા હતા. હીનાતિગલાએ ઓવરના બીજા બોલ પર ચોગ્ગો ફટકાર્યો, પરંતુ પછીના બે બોલ ડોટ રહ્યા, જેનાથી દબાણ વધી ગયું. ત્યારબાદ તેણે પાંચમા બોલ પર શાનદાર છગ્ગો ફટકારીને મુકાબલો બરાબરી પર લાવી દીધો. છેલ્લા બોલ પર એક રન લઈને શ્રીલંકાએ 1 વિકેટે મેચ અને 2-1થી સિરીઝ પોતાના નામે કરી લીધી.