BCCIએ ચીફ સિલેક્ટર અજીત અગરકરનો કાર્યકાળ એક વર્ષ માટે રિન્યુ કર્યો છે. હવે તેઓ 2027માં યોજાનાર વનડે વર્લ્ડ કપ સુધી આ પદ પર રહેશે. BCCIના એક વરિષ્ઠ અધિકારીએ ન્યૂઝ એજન્સી ANIને જણાવ્યું કે અગરકરનો કાર્યકાળ લંબાવવામાં આવ્યો છે. તેઓ પોતાની પરફોર્મન્સના આધારે ચોથા વર્ષ માટે પદ પર રહેશે. BCCIના નિયમો અનુસાર, સિલેક્ટર વધુમાં વધુ ચાર વર્ષ સુધી પદ પર રહી શકે છે. આ પહેલા મીડિયા રિપોર્ટમાં દાવો કરવામાં આવ્યો હતો કે અગરકરે પોતે BCCIને પોતાનો કાર્યકાળ 2027 વન-ડે વર્લ્ડ કપ સુધી વધારવાની માગ કરી હતી. બોર્ડે 2023માં બે વર્ષ માટે અગરકરને ચીફ સિલેક્ટર બનાવ્યા હતા. 2025માં તેમને પહેલાથી જ એક વર્ષનું એક્સટેન્શન મળી ચૂક્યું હતું. હવે તેમનો કાર્યકાળ 2027 સુધી માટે રિન્યુ કરવામાં આવી રહ્યો છે. આ રીતે અગરકર કુલ ચાર વર્ષ ચીફ સિલેક્ટર રહેશે. કાર્યકાળમાં ભારતના નામે બે T20 વર્લ્ડ કપ અને એક ચેમ્પિયન્સ ટ્રોફી અજીત અગરકરનો અત્યાર સુધીનો કાર્યકાળ ખૂબ જ સફળ રહ્યો. ઓક્ટોબર 2023 થી માર્ચ 2026ની વચ્ચે તેમના દ્વારા પસંદ કરાયેલી ભારતીય ટીમે ચાર ICC ટુર્નામેન્ટની ફાઇનલમાં સ્થાન મેળવ્યું. આમાંથી ભારતે ત્રણ ખિતાબ પોતાના નામે કર્યા. 2024 અને 2026માં બે T20 વર્લ્ડ કપ અને 2025માં ICC ચેમ્પિયન્સ ટ્રોફી. આ ઉપરાંત, ટીમ ઈન્ડિયા 2023ના વન-ડે વર્લ્ડ કપની ફાઇનલમાં પણ પહોંચી હતી, જ્યાં તેને ઓસ્ટ્રેલિયા સામે હારનો સામનો કરવો પડ્યો હતો. કોહલી-રોહિતની નિવૃત્તિ અને શમીને બહાર કરવા જેવા કડક નિર્ણયો અગરકરની આગેવાની હેઠળની કમિટીએ ઘણા કડક અને મોટા નિર્ણયો લીધા. તેમાં સૌથી મુખ્ય વિરાટ કોહલી અને રોહિત શર્માના ટેસ્ટ ક્રિકેટમાંથી સંન્યાસની પ્રક્રિયાને સંભાળવી અને સિનિયર ફાસ્ટ બોલર મોહમ્મદ શમીને ધીમે ધીમે આંતરરાષ્ટ્રીય ક્રિકેટમાંથી બહાર કરવો હતો. જ્યારે 2026 T20 વર્લ્ડ કપ ટીમમાંથી ટેસ્ટ અને વન-ડે કેપ્ટન શુભમન ગિલને ડ્રોપ કરીને ઈશાન કિશન જેવા ઇન-ફોર્મ ખેલાડીને તક આપવા જેવા મોટા નિર્ણયો પણ લેવામાં આવ્યા. 2027 વન-ડે વર્લ્ડ કપ માટે સાતત્ય પર ધ્યાન આગામી વનડે વર્લ્ડ કપ 2027માં યોજાવાનો છે. BCCI ઈચ્છે છે કે ટીમની કોર અને પસંદગી પ્રક્રિયામાં સ્થિરતા જળવાઈ રહે. અગરકરનો કાર્યકાળ રિન્યુ કરવાનો અર્થ એ છે કે તેઓ આગામી વર્લ્ડ કપ માટે ટીમ તૈયાર કરવાના મિશન પર કામ ચાલુ રાખશે. બોર્ડનું માનવું છે કે આ સમયે પસંદગી સમિતિના નેતૃત્વમાં ફેરફાર કરવાથી ટીમની લય બગડી શકે છે. 349 આંતરરાષ્ટ્રીય વિકેટ લઈ ચૂક્યા છે અગરકર કારકિર્દીમાં 349 આંતરરાષ્ટ્રીય વિકેટ લઈ ચૂક્યા છે. તેમણે ટેસ્ટમાં 58, વન-ડેમાં 288 અને T20 આંતરરાષ્ટ્રીયમાં 3 વિકેટ લીધી છે. જુઓ તેમના 3 રેકોર્ડ્સ…