ભારતની 18 વર્ષીય સ્ક્વોશ ખેલાડી અનાહત સિંહે વર્લ્ડ સ્ક્વોશ જુનિયર ચેમ્પિયનશિપ 2026નું ટાઇટલ જીત્યું. શનિવારે રમાયેલી ગર્લ્સ સિંગલ્સ ફાઇનલમાં ટોપ સીડ અનાહતે ઇજિપ્તની બીજી ક્રમાંકિત રુક્યા સલેમને 11-3, 11-7, 11-9થી હરાવી. આ સાથે જ તે જુનિયર વર્લ્ડ ચેમ્પિયન બનનારી પ્રથમ ભારતીય ખેલાડી બની ગઈ. જોશના ચિનપ્પાનો 21 વર્ષ જૂનો રેકોર્ડ તૂટ્યો આ પહેલા ભારતનું સર્વશ્રેષ્ઠ પ્રદર્શન 2005માં રહ્યું હતું, જ્યારે જોશના ચિનપ્પા ફાઇનલ સુધી પહોંચી હતી. અનાહતે હવે ભારતને આ ટુર્નામેન્ટનો પ્રથમ ગોલ્ડ અપાવ્યો. ઇજિપ્તનો 15 વર્ષ જૂનો દબદબો સમાપ્ત ગર્લ્સ જુનિયર વર્લ્ડ ચેમ્પિયનશિપમાં 2011થી સતત ઇજિપ્તની ખેલાડીઓ ખિતાબ જીતી રહી હતી. અનાહતે ફાઇનલમાં રુક્યા સલેમને હરાવીને આ સિલસિલો તોડી નાખ્યો. તેણે આખી ટુર્નામેન્ટમાં 6 મેચ રમી અને માત્ર 2 ગેમ ગુમાવી. ગયા વર્ષે બ્રોન્ઝ જીત્યો હતો અનાહતે ગયા વર્ષે જુનિયર વર્લ્ડ ચેમ્પિયનશિપમાં બ્રોન્ઝ મેડલ જીત્યો હતો. આ વખતે તેણે તેને ગોલ્ડમાં બદલી નાખ્યો. ચાર વખતની ચેમ્પિયન ઇજિપ્તની અમીના ઓર્ફી ઉંમર મર્યાદાને કારણે આ વખતે ટુર્નામેન્ટમાં રમી ન હતી. અન્ય ભારતીય ખેલાડીઓનું પ્રદર્શન ગર્લ્સ કેટેગરીમાં અનાહત ઉપરાંત રુદ્ર સિંહ, અનિકા દુબે અને શાનવી કલંકી રાઉન્ડ ઓફ-32માં બહાર થઈ ગઈ. બોય્ઝ કેટેગરીમાં આર્યવીર દીવાન ભારતના સર્વશ્રેષ્ઠ ખેલાડી રહ્યા. તેઓ પ્રી-ક્વાર્ટર ફાઇનલ સુધી પહોંચ્યા. યુશા નફીસ અને ગુરવીર સિંહ રાઉન્ડ ઓફ-32, જ્યારે પુરવ રાંભિયા રાઉન્ડ ઓફ-64માં હારી ગયા. લોસ એન્જલસ ઓલિમ્પિક પર નજર સિનિયર PSA વર્લ્ડ રેન્કિંગમાં 20મા સ્થાને રહેલી અનાહતની નજર હવે 2028 લોસ એન્જલસ ઓલિમ્પિક પર રહેશે, જ્યાં પહેલીવાર સ્ક્વોશનો સમાવેશ કર્યો છે.