ઇંગ્લેન્ડના વેસ્ટ મિડલેન્ડ્સના ટેલફોર્ડમાં એક યુવકે શીખ બસ ડ્રાઇવર સાથે મારપીટ કરી અને તેની બસ લઈને ફરાર થઈ ગયો. યુવકે બસને ખોટી દિશામાં હંકારી અને રસ્તામાં અનેક વાહનોને ટક્કર પણ મારી. બાદમાં પોલીસે બસને રોકીને યુવકની ધરપકડ કરી લીધી. ઘટના શુક્રવાર સાંજે મેડલી વિસ્તારની કોર્ટ સ્ટ્રીટ પર બની હતી. પોલીસના જણાવ્યા અનુસાર, યુવક અને બસ ડ્રાઇવર વચ્ચે બોલાચાલી થઈ હતી. ત્યારબાદ યુવકે ડ્રાઇવર પર હુમલો કર્યો અને તેને બસમાંથી નીચે ઉતારી દીધો. પછી તે બસ લઈને પાર્ક વે અને હાઈ સ્ટ્રીટ તરફ નીકળી ગયો. ડ્રાઇવરને નાની ઇજાઓ થઈ હુમલામાં બસ ડ્રાઇવરને નાની ઇજાઓ થઈ હતી. ઘટનાસ્થળે પહોંચેલા પેરામેડિક્સે તેમની સારવાર કરી. પોલીસના જણાવ્યા મુજબ, આ ઘટનામાં અન્ય કોઈ વ્યક્તિ ઘાયલ થઈ હોવાની માહિતી નથી. આ ઘટનાનો વીડિયો વાયરલ થઈ રહ્યો છે. પોલીસે CCTV અને વીડિયો માગ્યા વેસ્ટ મર્સિયા પોલીસ આ મામલાની તપાસ કરી રહી છે. પોલીસે આસપાસના લોકોને અપીલ કરી છે કે તેમની પાસે ઘટનાને લગતી ડેશકેમ, CCTV, મોબાઇલ ફોન અથવા ડોરબેલ કેમેરાની કોઈ રેકોર્ડિંગ હોય તો તે પોલીસને ઉપલબ્ધ કરાવે. આરોપી પોલીસ કસ્ટડીમાં પોલીસે 20 વર્ષીય યુવકની લૂંટ અને જોખમી રીતે વાહન ચલાવવાની શંકામાં ધરપકડ કરી છે. તે હાલમાં પોલીસ કસ્ટડીમાં છે અને મામલાની તપાસ ચાલુ છે.