ડિસેમ્બરમાં પાયલટોની અછત અને 2500થી વધુ ફ્લાઇટ્સ રદ થવાને કારણે ઇન્ડિગોનો નફો 78% ઘટ્યો છે. ઇન્ડિગોનું સંચાલન કરતી કંપની ઇન્ટરગ્લોબ એવિએશનને નાણાકીય વર્ષ 2025-26ના ત્રીજા ક્વાર્ટરમાં માત્ર 550 કરોડ રૂપિયાનો ચોખ્ખો નફો (નેટ પ્રોફિટ) થયો છે. ગયા વર્ષના સમાન ક્વાર્ટરમાં તે 2,448 કરોડ રૂપિયા હતો. ઓક્ટોબર-ડિસેમ્બર ક્વાર્ટરમાં ઇન્ડિગોની ઓપરેશનલ આવક વાર્ષિક ધોરણે 6.2% વધીને 23,471 કરોડ રૂપિયા રહી. એક વર્ષ પહેલાના સમાન ક્વાર્ટરમાં કંપનીની આવક 22,110 કરોડ રૂપિયા હતી. ઇન્ડિગોએ આજે ગુરુવારે (22 જાન્યુઆરી) ઓક્ટોબર-ડિસેમ્બર ક્વાર્ટરના પરિણામો જાહેર કર્યા છે. કંપનીએ જણાવ્યું કે ફ્લાઇટ્સ રદ થવા અને નવા લેબર કોડ્સને કારણે તેને ₹1,546.5 કરોડનો વધારાનો ખર્ચ ઉઠાવવો પડ્યો. જો આને અલગ કરી દેવામાં આવે તો કંપનીનો નફો લગભગ ₹2,096.3 કરોડ રહેત. જોકે, તે ત્યારે પણ ગયા વર્ષની સરખામણીમાં 14% ઓછો હોત. નફામાં ઘટાડાના બે મુખ્ય કારણો ડિસેમ્બરના સંકટને કારણે ₹577 કરોડનું નુકસાન થયું: ડિસેમ્બર 2025ની શરૂઆતમાં ઇન્ડિગોને મોટા પાયે ફ્લાઇટ્સ રદ કરવી પડી હતી. તેનું મુખ્ય કારણ ‘ફ્લાઇટ ડ્યુટી ટાઇમ લિમિટેશન’ (FDTL) ના નવા નિયમો હતા, જે 1 નવેમ્બરથી લાગુ થયા હતા. આ નિયમો હેઠળ પાઇલટોને વધુ આરામ આપવો ફરજિયાત હતો, પરંતુ ઇન્ડિગો પાસે તે મુજબ પૂરતા પાઇલટ નહોતા. 3 થી 5 ડિસેમ્બરની વચ્ચે કંપનીએ 2,507 ફ્લાઇટ્સ રદ કરી અને 1,852 ફ્લાઇટ્સ મોડી પડી. આ સંકટથી લગભગ 3 લાખ મુસાફરો પ્રભાવિત થયા હતા. આ જ અફરાતફરી, રિફંડ અને અન્ય ખર્ચાઓને કારણે કંપનીને ₹577.2 કરોડનો ફટકો પડ્યો. તાજેતરમાં DGCA એ આ મામલે કંપની પર ₹22 કરોડનો દંડ પણ લગાવ્યો હતો. નવા લેબર કોડે કંપનીનો ખર્ચ વધાર્યો: ભારતમાં 21 નવેમ્બરથી ચાર નવા લેબર કોડ (વેતન, ઔદ્યોગિક સંબંધ, સામાજિક સુરક્ષા અને વ્યવસાયિક સુરક્ષા) લાગુ થયા છે. આ નિયમોના અમલથી ‘વેતન’ની વ્યાખ્યા બદલાઈ ગઈ છે. હવે કોઈપણ કર્મચારીનો બેઝિક પગાર (મૂળ વેતન) તેના કુલ સીટીસી (CTC)ના ઓછામાં ઓછો 50% હોવો જરૂરી છે. કંપનીઓ હવે એલાઉન્સ (ભથ્થાં)નો હિસ્સો વધુ રાખીને પીએફ (PF) અને ગ્રેચ્યુઈટીના પૈસા બચાવી શકશે નહીં. ઇન્ડિગોને આ જ બદલાવને કારણે તેના કર્મચારીઓના વેતન માળખાને સુધારવું પડ્યું, જેનાથી તેના પર લગભગ ₹970 કરોડનો વધારાનો બોજ પડ્યો. ઇન્ડિગોના ડિસેમ્બર ક્વાર્ટરના પરિણામોની 5 મોટી વાતો ભારતની સૌથી મોટી એરલાઇન છે ઇન્ડિગો માર્કેટ શેરની દ્રષ્ટિએ ઇન્ડિગો દેશની સૌથી મોટી એરલાઇન છે. ભારતીય એરલાઇન માર્કેટમાં કંપનીનો માર્કેટ શેર લગભગ 60% છે. તેની સ્થાપના 2006માં રાહુલ ભાટિયા અને રાકેશ ગંગવાલ દ્વારા કરવામાં આવી હતી. એરલાઇન પાસે 400થી વધુ એરક્રાફ્ટનો કાફલો છે. તેના 50 કરોડથી વધુ ગ્રાહકો છે. 6 મહિનામાં ઇન્ડિગોનો શેર 17.13% ઘટ્યો ઓક્ટોબર-ડિસેમ્બર ક્વાર્ટરના પરિણામો પહેલાં ઇન્ટરગ્લોબ એવિએશનનો શેર આજે 1.47% વધીને 4,929 રૂપિયાના સ્તરે બંધ થયો. કંપનીનો શેર 5 દિવસમાં 4.20% વધ્યો અને એક મહિનામાં 4.21% ઘટ્યો છે. જ્યારે શેર 6 મહિનામાં 17.13% ઘટ્યો છે. એક વર્ષમાં 22.87%નું સકારાત્મક વળતર આપ્યું છે. કંપનીનું માર્કેટ કેપ 1.90 લાખ કરોડ રૂપિયા છે.