ભારતીય મહિલા 4×100 મીટર રિલે ટીમે એશિયન રિલે ચેમ્પિયનશિપ 2026માં શાનદાર પ્રદર્શન કરતા ગોલ્ડ મેડલ જીતી લીધો છે. ફાઈનલ મેચમાં ભારતીય ટીમે ચીનને હરાવીને 43.85 સેકન્ડનો સીઝન-બેસ્ટ ટાઈમ નોંધાવ્યો. આ ચેમ્પિયનશિપમાં ભારતે 1 ગોલ્ડ, 1 સિલ્વર અને 1 બ્રોન્ઝ સહિત કુલ 3 મેડલ પોતાના નામે કર્યા છે. ટીમમાં શ્રાવણી નંદા, એસએસ સ્નેહા, સુદેશ્ના શિવંકર અને તમન્નાનો સમાવેશ થતો હતો. આ ચોકડીએ રેસ દરમિયાન સચોટ બેટન એક્સચેન્જ અને ઉત્તમ ફિનિશિંગ સ્પીડનું પ્રદર્શન કર્યું. થાઈલેન્ડે બ્રોન્ઝ જીત્યો ભારતે 43.85 સેકન્ડના સમય સાથે પ્રથમ સ્થાન મેળવ્યું. આ રેસમાં ચીનની ટીમ 44.09 સેકન્ડ સાથે બીજા સ્થાને રહી અને તેણે સિલ્વર મેડલ જીત્યો. જ્યારે થાઈલેન્ડે 44.11 સેકન્ડનો સમય કાઢીને બ્રોન્ઝ મેડલ પોતાના નામે કર્યો. રિલાયન્સ ફાઉન્ડેશનના કોચ માર્ટિન ઓવેન્સના માર્ગદર્શન હેઠળ ટીમે આ રેસ પ્લાનને સફળતાપૂર્વક પૂર્ણ કર્યો. તમન્ના અને સ્નેહાએ બે-બે મેડલ જીત્યા આ ચેમ્પિયનશિપમાં ભારત માટે તમન્ના અને સ્નેહા શાનુવલ્લીનું વ્યક્તિગત પ્રદર્શન શાનદાર રહ્યું, જેમણે બે-બે મેડલ સાથે પોતાની ઝુંબેશ સમાપ્ત કરી. મહિલા 4×100 મીટરમાં ગોલ્ડ જીતતા પહેલા, આ બંને એથ્લેટ્સે મિક્સ્ડ 4×100 મીટર રિલેમાં પણ દેશને બ્રોન્ઝ મેડલ અપાવ્યો હતો. મિક્સ્ડ ટીમમાં તેમની સાથે અનિમેષ કુજૂર અને પ્રણવ ગુરવ સામેલ હતા, જેમણે 41.27 સેકન્ડનો સમય કાઢીને ત્રીજું સ્થાન મેળવ્યું. આ ઇવેન્ટમાં થાઈલેન્ડ (41.14 સેકન્ડ) પ્રથમ અને ચીન (41.29 સેકન્ડ) બીજા સ્થાને રહ્યું. મિક્સ્ડ 4×400 મીટરમાં ભારતને સિલ્વર મળ્યો ભારતને ટુર્નામેન્ટનો ત્રીજો મેડલ મિક્સ્ડ 4×400 મીટર રિલે ઇવેન્ટમાં મળ્યો. આ ટીમમાં તીર્થેશ પી શેટ્ટી, એમઆર પૂવમ્મા, ભરત શ્રીધર અને નીરુ પાઠકનો સમાવેશ થતો હતો. ભારતીય ચોકડીએ 3:17.06 સેકન્ડના સમય સાથે રેસ પૂરી કરી અને સિલ્વર મેડલ જીત્યો. આ સ્પર્ધાનો ગોલ્ડ મેડલ વિયેતનામની ટીમે જીત્યો. 4×400 મીટર રિલેમાં ભારતીય ટીમને નિરાશા મળી સ્પ્રિન્ટ ઇવેન્ટ્સમાં સફળતા મળ્યા બાદ ભારત 4×400 મીટર રિલે ઇવેન્ટમાં મેડલથી વંચિત રહ્યું. મહિલાઓની 4×400 મીટર રિલેમાં એમઆર પૂવમ્મા, રશદીપ કૌર, અનસા બાબુ અને સલોની નાગરની ટીમ 3:34.88 સેકન્ડના સમય સાથે ચોથા સ્થાને રહી. આ સ્પર્ધાનો ગોલ્ડ મેડલ વિયેતનામ (3:31.16 સેકન્ડ)એ જીત્યો. જ્યારે, મેન્સની 4×400 મીટર રિલેમાં તીર્થેશ પી શેટ્ટી, અવિનાશ કુમાર, સૂરજ અલગર રાજા અને ભરત શ્રીધરની ટીમ 3:05.33 સેકન્ડના સમય સાથે પાંચમા સ્થાને રહી. આ રેસમાં પણ વિયેતનામની ટીમે પોતાનું વર્ચસ્વ જાળવી રાખીને ગોલ્ડ મેડલ જીત્યો