ભારતીય એસ્સાર ગ્રુપ અમેરિકામાં 18 બિલિયન ડૉલર એટલે કે લગભગ 1.5 લાખ કરોડ રૂપિયાનું રોકાણ કરશે. આ રોકાણનો સૌથી મોટો હિસ્સો અમેરિકાના આયોવા રાજ્યમાં 15 બિલિયન ડૉલરના ખર્ચે બનનારા સ્ટીલ પ્લાન્ટ પર કરવામાં આવશે. આ અમેરિકાનો સૌથી મોટો સ્ટીલ પ્લાન્ટ હશે. આ પ્લાન્ટ અમેરિકાના આયોવા રાજ્યમાં સ્થાપિત કરવામાં આવશે, જેમાં 15 બિલિયન ડૉલર એટલે કે આશરે 1.25 લાખ કરોડ રૂપિયાનું રોકાણ થશે. વ્હાઇટ હાઉસની ઓવલ ઑફિસમાં યોજાયેલા એક કાર્યક્રમ દરમિયાન ટ્રમ્પે એસ્સાર ગ્રુપના સહ-સ્થાપક રવિ રુઇયા અને તેમના પુત્ર રેવંત રુઇયાની હાજરીમાં આ મોટા પ્રોજેક્ટની જાહેરાત કરી. 2030થી ઉત્પાદન શરૂ થશે, આયોવામાં 1,750 નોકરીઓ મળશે આ સ્ટીલ પ્લાન્ટનું નિર્માણ એસ્સાર ગ્રુપની અમેરિકન કંપની મેસાબી મેટાલિક્સ કરશે. વ્હાઇટ હાઉસના એક અધિકારી અનુસાર, પ્લાન્ટમાં વર્ષ 2030 સુધીમાં સ્ટીલનું ઉત્પાદન શરૂ કરવાનો લક્ષ્યાંક રાખવામાં આવ્યો છે. તૈયાર થયા બાદ આ પ્લાન્ટ દર વર્ષે 1 કરોડ ટન સ્ટીલનું ઉત્પાદન કરશે. આ પ્રોજેક્ટ દ્વારા આયોવા રાજ્યમાં આશરે 1,750 કાયમી નોકરીઓ ઊભી થશે. 50 વર્ષમાં અમેરિકાની પહેલી નવી આયર્ન માઇન વ્હાઇટ હાઉસના અધિકારીએ જણાવ્યું કે અમેરિકામાં છેલ્લા 50 વર્ષમાં શરૂ થનારી આ પહેલી નવી આયર્ન ઓર ખાણ છે. સ્ટીલ પ્લાન્ટના સંચાલન માટે કાચો માલ એટલે કે આયર્ન ઓર (કાચું લોખંડ) પૂરું પાડવા માટે એસ્સાર ગ્રુપે મિનેસોટામાં એક નવી ખાણ બનાવી છે. આ ખાણના નિર્માણ પર કંપનીએ 2.5 બિલિયન ડૉલર (લગભગ 21 હજાર કરોડ રૂપિયા)નું રોકાણ કર્યું છે. ‘ટેરિફના ડરથી કંપનીઓ અમેરિકા આવી રહી છે’: ટ્રમ્પે સ્ટીલ ઉદ્યોગની વાપસીનો દાવો કર્યો ડોનાલ્ડ ટ્રમ્પે જણાવ્યું કે અમેરિકાનો સ્ટીલ ઉદ્યોગ ફરીથી મજબૂત બની રહ્યો છે અને તેનો શ્રેય ગયા વર્ષે સ્ટીલ આયાત પર લગાવવામાં આવેલા 50% ટેરિફને જાય છે. ટ્રમ્પે જણાવ્યું કે દરેક વ્યક્તિ હવે અમેરિકામાં જ પોતાના પ્લાન્ટ સ્થાપી રહી છે, કારણ કે કોઈ પણ 50% ટેરિફ ચૂકવવા માગતું નથી. આ વાત ખૂબ સીધી અને સરળ છે. 1969માં શરૂ થયું હતું એસ્સાર ગ્રુપ: ગુજરાતથી લઈને યુકે અને સાઉદી સુધી ફેલાયેલો છે કારોબાર એસ્સાર ગ્રુપની શરૂઆત 1969માં શશિ રુઇયા અને રવિ રુઇયા ભાઈઓએ ભારતમાં કરી હતી. આજે આ ગ્રુપ એનર્જી, માઇનિંગ, ટેક્નોલોજી અને રિટેલ જેવા અનેક ક્ષેત્રોમાં કામ કરે છે.