કોમનવેલ્થ ગેમ્સ 2026ની ઓપનિંગ સેરેમની સ્કોટલેન્ડના ગ્લાસગોમાં શરૂ થઈ ગઈ છે. બ્રિટનના કિંગ ચાર્લ્સ અને ક્વીન કેમિલાએ ઉદ્ઘાટન કર્યું. ત્યારબાદ 74 દેશોના ખેલાડીઓનો માર્ચ-પાસ્ટ શરૂ થયો. ભારતીય ટુકડીની એન્ટ્રી હજુ બાકી છે. ભારત તરફથી બે વારની ઓલિમ્પિક મેડલિસ્ટ વેટલિફ્ટર મીરાબાઈ ચાનુ અને ટોકિયો ઓલિમ્પિક બ્રોન્ઝ મેડલિસ્ટ બોક્સર લવલીના બોરગોહેન ત્રિરંગો લઈને ટુકડીની આગેવાની કરશે. ઈલેક્ટ્રોનિક મ્યુઝિક બેન્ડ વોલ્ટોસ સહિત અનેક કલાકારો પ્રસ્તુતિ આપી રહ્યા છે. સેરેમનીમાં સ્કોટિશ સિંગર ટોમ વોકર પણ પરફોર્મ કરશે. ઓપનિંગ સેરેમનીની શરૂઆત સ્કોટલેન્ડની સંસ્કૃતિ અને વારસાના વીડિયોથી થઈ. ત્યારબાદ કિંગ ચાર્લ્સ અને ક્વીન કેમિલા એરિના પહોંચ્યા. તેમની સાથે વડાપ્રધાન એન્ડી બર્નહામ પણ હાજર રહ્યા. આ પછી યુનાઈટેડ કિંગડમનું રાષ્ટ્રગીત ‘ગોડ સેવ અવર કિંગ’ પ્રસ્તુત કરવામાં આવ્યું. રાષ્ટ્રગીત પછી એક પછી એક કોમનવેલ્થ દેશોના ખેલાડીઓનો માર્ચ-પાસ્ટ શરૂ થયો, જ્યારે ભારતીય ટુકડીની એન્ટ્રીની રાહ જોવાઈ રહી છે. 23 જુલાઈથી 2 ઑગસ્ટ સુધી ચાલનારી આ રમતોમાં ભારત 126 ખેલાડીઓની ટુકડી સાથે ભાગ લઈ રહ્યું છે. ઓપનિંગ સેરેમની ગ્લાસગોના ઓવો હાઈડ્રો એરિનામાં થઈ રહી છે, જ્યાં લગભગ 13 હજાર દર્શકોની ઉપસ્થિતિ છે. આ પહેલાં ભારતે લોન બોલ્સમાં બે જીત સાથે પોતાના અભિયાનની શરૂઆત કરી. બીજી તરફ, ભારતીય ધ્વજવાહક લવલીના બોરગોહેન મહિલા 75 કિગ્રા વર્ગની સેમિફાઇનલમાં સીધી પહોંચવાને કારણે કોઈ પણ મેચ રમ્યા વગર જ ઓછામાં ઓછો બ્રોન્ઝ મેડલ પાકો કરી ચૂકી છે. મીરાબાઈ અને લવલીના ભારતનું નેતૃત્વ કરશે સેરેમનીમાં ભારતના ધ્વજવાહક અને બેટન બિયરરની જવાબદારી ઓલિમ્પિક મેડલ વિજેતા મીરાબાઈ ચાનુ અને લવલીના બોરગોહેન સંભાળશે. ભારતીય ઓલિમ્પિક સંઘના અધ્યક્ષ પીટી ઉષાએ બંને ખેલાડીઓના નામોની જાહેરાત કરી હતી. મીરાબાઈએ ટોકિયો ઓલિમ્પિક 2020માં 49 કિગ્રા વર્ગમાં સિલ્વર મેડલ જીત્યો હતો. ત્યારબાદ તેણે બર્મિંગહામ કોમનવેલ્થ ગેમ્સ 2022માં ગોલ્ડ મેડલ પોતાના નામે કર્યો. તે વર્લ્ડ ચેમ્પિયનશિપમાં પણ ઘણા મેડલ જીતી ચૂકી છે. જ્યારે લવલીનાએ ટોકિયો ઓલિમ્પિકમાં બ્રોન્ઝ મેડલ જીત્યો હતો અને 2023 વર્લ્ડ ચેમ્પિયનશિપમાં ગોલ્ડ પોતાના નામે કર્યો. એશિયન ગેમ્સ 2023માં તેણે સિલ્વર મેડલ જીત્યો હતો. કિંગ ચાર્લ્સ અને ક્વીન કેમિલા હાજર રહી શકે છે 2022 બર્મિંગહામ કોમનવેલ્થ ગેમ્સની ઓપનિંગ સેરેમનીમાં હાજર રહેલા બ્રિટનના કિંગ ચાર્લ્સ અને ક્વીન કેમિલા ગ્લાસગો કાર્યક્રમમાં પણ પહોંચે તેવી અપેક્ષા છે. આ સેરેમનીમાં બ્રિટનના અનેક કલાકારો પરફોર્મ કરશે. કિંગ ચાર્લ્સ III યુનાઇટેડ કિંગડમ અને અન્ય 14 રાષ્ટ્રમંડળ દેશોના રાજા છે. જ્યારે ક્વીન કેમિલા કિંગ ચાર્લ્સની પત્ની અને મહારાણી છે. કોણ-કોણ પરફોર્મ કરશે? કોમનવેલ્થ ગેમ્સ 2026ની ઓપનિંગ સેરેમનીમાં જાણીતા સિંગર ટોમ વોકર પરફોર્મ કરશે. તેઓ તેમના લોકપ્રિય ગીત ‘લીવ અ લાઈનટ ઓન’ માટે જાણીતા છે. સેરેમનીમાં સ્કોટલેન્ડના ઘણા જાણીતા સિંગર્સ કેટી ટનસ્ટોલ, સિંગર કેલમ બિટ્ટી, નીના નેસ્બિટ્ટ, નાથન ઇવાન્સ પરફોર્મ કરશે. આ ઉપરાંત મ્યુઝિક ડ્યુઓ સેન્ટ ફંક્સ અને વોલ્ટોસ પણ પરફોર્મ કરવાના છે. 6 વખત ઓલિમ્પિક ગોલ્ડ મેડલિસ્ટ અને પૂર્વ સ્કોટિશ સાયક્લિસ્ટ ક્રિસ હોય પણ સ્પેશિયલ ગેસ્ટ હશે. હોયને 2024માં સ્ટેજ-4 કેન્સર હોવાનું નિદાન થયું હતું. ક્યાં જોઈ શકાય છે ઓપનિંગ સેરેમની? ઓપનિંગ સેરેમનીનું લાઇવ પ્રસારણ સોની સ્પોર્ટ્સ ચેનલ્સ પર થશે. જ્યારે ઓનલાઈન સ્ટ્રીમિંગ સોની લિવ પર થશે. ભારતમાં કોમનવેલ્થ ગેમ્સ 2026ના બ્રોડકાસ્ટિંગ રાઇટ્સ સોની સ્પોર્ટ્સ નેટવર્ક પાસે છે. ટુર્નામેન્ટની તમામ મેચ અહીં જ બતાવવામાં આવશે.