ગ્લાસગોમાં ચાલી રહેલા કોમનવેલ્થ ગેમ્સમાં ભારતીય બોક્સર્સે 9 મેડલ પાક્કા કરી લીધા છે. બુધવારે નરેન્દ્ર બેરવાલ (90 kg), અંકુશ પંઘાલ (80 kg) અને સચિન સિવાચ (70 kg) મેન્સ કેટેગરીની સેમિફાઇનલમાં પ્રવેશ્યા. જ્યારે, અરુંધતિ ચૌધરી (70 kg) અને સાક્ષી ચૌધરીએ (51 kg) વુમન્સ કેટેગરીના ટૉપ-4માં જગ્યા બનાવી. આ પહેલાં તજિંદર સિંહ તૂર અને સમરદીપ સિંહ ગિલે શૉટપુટ ઇવેન્ટના ફાઇનલમાં જગ્યા બનાવી લીધી. વેઇટલિફ્ટર સંજના મેડલની રેસથી બહાર થઈ ગઈ છે. હાલમાં, ભારત 2 ગોલ્ડ સહિત 12 મેડલ સાથે પોઇન્ટ્સ ટેબલના નવમા સ્થાન પર છે. ઓસ્ટ્રેલિયા 35 ગોલ્ડ લઈને નંબર-1 પોઝિશન પર છે. નરેન્દ્ર ટૉપ-4માં પહોંચનાર નવમો બોક્સર નરેન્દ્ર બેરવાલે મેન્સ 90 kg વેઇટ કેટેગરીના ક્વાર્ટર ફાઇનલમાં સમોઆના માઇકલ સેકોને 3-2થી હરાવ્યો. તેઓ ટૉપ-4માં પહોંચનાર નવમા બોક્સર બન્યા છે. તેમની પહેલાં અંકુશ પંઘાલે 80 kg વેઇટ કેટેગરીમાં સેશેલ્સના જે મિકોકને 5-0થી હરાવ્યો. જ્યારે, સચિને 70 kgમાં બોત્સ્વાનાના ટ્રેઝર મોરેમીને 5-0થી હરાવ્યો. વુમન્સ બોક્સિંગની 70 kg વેઇટ કેટેગરીમાં અરુંધતિએ ન્યૂઝીલેન્ડની મોર્ગન એડરસનને 3-1થી હરાવી. સાથે જ 51 kg વેઇટ કેટેગરીમાં સાક્ષી ચૌધરીએ નોર્ધન આયર્લેન્ડની કેથલીન ફ્રેયરને 5-0થી હરાવી. આ પહેલાં લવલીના બોરગોહેન (75 કિલોગ્રામ), પ્રીતિ પવાર (54 કિલોગ્રામ), પ્રિયા ધંગસ (60 કિલોગ્રામ) અને જાદુમણિ સિંહ (મેન્સ 55 કિલોગ્રામ) પણ સેમિફાઇનલમાં પહોંચીને મેડલ પાક્કો કરી ચૂક્યા છે. તજિન્દરપાલ-સમરદીપ ફાઇનલ માટે ક્વોલિફાય ભારતીય શૉટ પુટ ખેલાડી તજિન્દરપાલ સિંહ તૂર અને સમરદીપ સિંહ ગિલ ફાઇનલ માટે ક્વોલિફાય કરી લીધું છે. ફાઇનલ ઇવેન્ટ ગુરુવારે રમાશે. ક્વોલિફિકેશનમાં તૂરને ઓટોમેટિક ક્વોલિફિકેશન માર્ક એટલે કે 20 મીટરનું અંતર પાર કરવા માટે વધુ મહેનત કરવી પડી ન હતી. તૂરે પોતાના પહેલા પ્રયાસમાં 19.93 મીટરનું અંતર કાપ્યું, જ્યારે બીજા પ્રયાસમાં તેણે 20.14 મીટરનો થ્રો ફેંક્યો અને ફાઇનલમાં સ્થાન નિશ્ચિત કર્યું. ગ્રુપ Bમાં સામેલ સમરદીપ સિંહ ગિલનું દિવસનું સર્વશ્રેષ્ઠ પ્રદર્શન 19.95 મીટર રહ્યું, જે તેણે પોતાના પહેલા જ પ્રયાસમાં હાંસલ કર્યું. તેનો બીજો થ્રો 19.75 મીટરનો હતો, જ્યારે ત્રીજો થ્રો ફાઉલ રહ્યો. બંને ગ્રુપમાં કુલ 15 ખેલાડીઓએ ભાગ લીધો હતો, જેમાંથી ગિલ કુલ પાંચમા સ્થાને રહ્યો. ગ્રુપ એમાં સાત અને ગ્રુપ બીમાં આઠ ખેલાડીઓ સામેલ હતા. નિયમ મુજબ, જે ખેલાડીઓ 20 મીટરનો માર્ક પાર કરે છે અથવા ટોપ 12માં રહે છે, તેઓ ફાઇનલ માટે ક્વોલિફાય કરે છે. સંજનાના સ્નેચમાં ત્રણેય પ્રયાસો નિષ્ફળ રહ્યા 19 વર્ષીય વેઈટલિફ્ટર સંજના વુમન્સ 77 કિગ્રાના ફાઇનલમાં સ્નેચના ત્રણેય પ્રયાસોમાં 94 કિગ્રા વજન ઉઠાવી શકી નહીં. હરિયાણાની સંજનાએ આ વર્ષે એશિયન ચેમ્પિયનશીપમાં બ્રોન્ઝ મેડલ જીત્યો હતો.

સંજના આ રમતોમાં મેડલથી ચૂકી જનારી ભારતની બીજી વેઈટલિફ્ટર બની. આ પહેલા નિરુપમા દેવી સેરામ પણ પોતાની કેટેગરીમાં ક્લીન એન્ડ જર્કના ત્રણેય પ્રયાસોમાં નિષ્ફળ રહી હતી. આજે ભારતીય ખેલાડીઓ વેઈટલિફ્ટિંગ, સ્વિમિંગ, એથ્લેટિક્સ, પેરા સ્વિમિંગ, બોક્સિંગ અને લૉન બોલ્સમાં પડકાર રજૂ કરી રહ્યા છે. સૌથી વધુ અપેક્ષાઓ વેઈટલિફ્ટિંગ અને એથ્લેટિક્સ પાસેથી છે.