દિલીપ મહાદુ ગાવિતે ભારતને કોમનવેલ્થ ગેમ્સ 2026માં ત્રીજો ગોલ્ડ અપાવ્યો છે. તેઓ પેરા 100 મીટરની રેસમાં 10.71 સેકન્ડના સમય સાથે પ્રથમ સ્થાને રહ્યા. ભારતના જ મોહમ્મદ બાસિલે 10.83 સેકન્ડ સાથે સિલ્વર જીત્યો. આ પહેલા લોંગ જમ્પર મુરલી શ્રીશંકરે 8.09 મીટરની છલાંગ લગાવીને સિલ્વર મેળવ્યો. તેઓ પુરુષોની લાંબી કૂદમાં સતત બે કોમનવેલ્થ ગેમ્સમાં સિલ્વર જીતનારા પ્રથમ ભારતીય બન્યા. આ ઇવેન્ટનો ગોલ્ડ જમૈકાના તજય ગેલ (8.15 મીટર)એ જીત્યો. ગાવિત અને બાસિલના મેડલ પછી ભારત મેડલ ટેલીમાં 8મા સ્થાને આવી ગયું છે. ભારત પાસે 3 ગોલ્ડ, 9 સિલ્વર અને 3 બ્રોન્ઝ સહિત 15 મેડલ થઈ ગયા છે. જાસ્મિન ટોપ-4માં પહોંચનાર 10મી બોક્સર જાસ્મિન લેમ્બોરિયાએ વિમેન્સ કેટેગરીના 57 કિગ્રામાં ઇંગ્લેન્ડની ઇલિસ ગ્લિનને 4-1થી હરાવી. તે સેમિફાઇનલમાં પહોંચનાર 10મી બોક્સર બની ગઈ છે. તેના પહેલા વિમેન્સ કેટેગરીમાં અરુંધતીએ 70 કિગ્રામાં ન્યુઝીલેન્ડની મોર્ગન એડરસનને 3-1થી હરાવી. સાક્ષી ચૌધરીએ 51 કિગ્રામાં નોર્ધન આયર્લેન્ડની કેથલીન ફ્રેયરને 5-0થી હરાવી. પુરુષોમાં નરેન્દ્ર બેરવાલે 90 કિગ્રામાં સમોઆના માઇકલ સેકોને 3-2થી હરાવ્યો. અંકુશ પંઘલે 80 કિગ્રામાં સેશેલ્સના જે મિકોકને 5-0થી હરાવ્યો. સચિને 70 કિગ્રામાં બોત્સ્વાનાના ટ્રેઝર મોરેમીને 5-0થી હરાવ્યો. લવલીના બોરગોહેન (75 કિલોગ્રામ), પ્રીતિ પવાર (54 કિલોગ્રામ), પ્રિયા ઘંગસ (60 કિલોગ્રામ) અને જાદુમણિ સિંહ (પુરુષ 55 કિલોગ્રામ) પહેલાથી જ સેમિફાઇનલમાં પહોંચીને મેડલ પાક્કો કરી ચૂક્યા છે. બોક્સિંગમાં ત્રીજા સ્થાન (બ્રોન્ઝ મેડલ) માટે અલગ મેચ રમાડવામાં આવતી નથી. તેથી સેમિફાઇનલમાં પહોંચવા પર મેડલ પાક્કો થઈ જાય છે. આમાં હારનાર બંને ખેલાડીઓને સંયુક્ત રીતે બ્રોન્ઝ મેડલ આપવામાં આવે છે. તજિન્દરપાલ-સમરદીપ ફાઇનલ માટે ક્વોલિફાય ભારતીય શોટ પુટ ખેલાડી તજિન્દરપાલ સિંહ તૂર અને સમરદીપ સિંહ ગિલે ફાઇનલ માટે ક્વોલિફાય કરી લીધું છે. ફાઇનલ ઇવેન્ટ ગુરુવારે રમાશે. ક્વોલિફિકેશનમાં તૂરને ઓટોમેટિક ક્વોલિફિકેશન માર્ક એટલે કે 20 મીટરનું અંતર પાર કરવા માટે વધુ મહેનત કરવી પડી ન હતી. તૂરે તેના પ્રથમ પ્રયાસમાં 19.93 મીટરનું અંતર કાપ્યું, જ્યારે બીજા પ્રયાસમાં તેણે 20.14 મીટરનો થ્રો ફેંક્યો અને ફાઇનલમાં સ્થાન નિશ્ચિત કર્યું. ગ્રુપ બી માં સામેલ સમરદીપ સિંહ ગિલનું દિવસનું સર્વશ્રેષ્ઠ પ્રદર્શન 19.95 મીટર રહ્યું, જે તેમણે પોતાના પહેલા જ પ્રયાસમાં હાંસલ કર્યું. તેમનો બીજો થ્રો 19.75 મીટરનો હતો, જ્યારે ત્રીજો થ્રો ફાઉલ રહ્યો. બંને ગ્રુપમાં કુલ 15 ખેલાડીઓએ ભાગ લીધો હતો, જેમાંથી ગિલ કુલ પાંચમા સ્થાને રહ્યા. ગ્રુપ એમાં સાત અને ગ્રુપ બીમાં આઠ ખેલાડીઓ સામેલ હતા. નિયમ અનુસાર, જે ખેલાડીઓ 20 મીટરનો માર્ક પાર કરે છે અથવા ટોપ 12 માં રહે છે, તેઓ ફાઇનલ માટે ક્વોલિફાય કરે છે. સંજનાના સ્નેચમાં ત્રણેય પ્રયાસો નિષ્ફળ રહ્યા
19 વર્ષીય વેઈટલિફ્ટર સંજના વિમેન્સ 77 કિગ્રાના ફાઇનલમાં સ્નેચના ત્રણેય પ્રયાસોમાં 94 કિગ્રા વજન ઉઠાવી શકી નહીં. હરિયાણાની સંજનાએ આ વર્ષે એશિયન ચેમ્પિયનશિપમાં બ્રોન્ઝ મેડલ જીત્યો હતો. સંજના આ રમતોમાં મેડલથી ચૂકી જનારી ભારતની બીજી વેઈટલિફ્ટર બની. આ પહેલા નિરુપમા દેવી સેરામ પણ પોતાના વર્ગમાં ક્લીન એન્ડ જર્કના ત્રણેય પ્રયાસોમાં નિષ્ફળ રહી હતી.