તાજેતરમાં એક ગંભીર સાયબર સુરક્ષા ઘટના સામે આવી છે, જેમાં 149 મિલિયનથી વધુ યુનિક લોગિન ID અને પાસવર્ડ્સ લીક થયાનો ખુલાસો થયો છે. આ ડેટામાં Gmail, Facebook, Instagram, Netflix, Disney Plus સહિત અનેક લોકપ્રિય પ્લેટફોર્મના યુઝર્સની માહિતી સામેલ હોવાનું જાણવા મળ્યું છે. ચોંકાવનારી બાબત એ છે કે આ ડેટા કોઈપણ પ્રકારની સુરક્ષા કે પાસવર્ડ વિના એક જાહેર ક્લાઉડ સર્વર પર ઉપલબ્ધ હતો.

ઓનલાઈન પ્લેટફોર્મ સાથે જોડાયેલા યુઝર્સના રેકોર્ડ્સ

અહેવાલ અનુસાર, આ લીક થયેલી માહિતીમાં લગભગ દરેક મોટા ઓનલાઈન પ્લેટફોર્મ સાથે જોડાયેલા યુઝર્સના રેકોર્ડ્સ હતા. ફાઉલરના જણાવ્યા મુજબ, આ પ્રકારનો ડેટા સામાન્ય રીતે સાયબર ગુનેગારો દ્વારા એકત્રિત કરવામાં આવે છે અને પછી તેને ક્લાઉડ પર સંગ્રહિત કરવામાં આવે છે, પરંતુ આ કેસમાં યોગ્ય સુરક્ષા ન હોવાથી આ મોટો ખુલાસો થયો.

લીક થયેલા ડેટામાં ઇમેલ એકાઉન્ટ્સની સંખ્યા

લીક થયેલા ડેટામાં ઇમેલ એકાઉન્ટ્સની સંખ્યા સૌથી વધુ છે. અંદાજ મુજબ લગભગ 4.8 કરોડ Gmail એકાઉન્ટ્સ, 40 લાખ Yahoo એકાઉન્ટ્સ અને 15 લાખ Outlook એકાઉન્ટ્સની વિગતો લીક થઈ છે. આ સિવાય સોશિયલ મીડિયા પ્લેટફોર્મ્સ પણ ભારે પ્રભાવિત થયા છે, જેમાં 1.7 કરોડ Facebook એકાઉન્ટ્સ, 65 લાખ Instagram એકાઉન્ટ્સ અને 7.8 લાખ TikTok એકાઉન્ટ્સનો સમાવેશ થાય છે. આ ઉપરાંત X (અગાઉ ટ્વિટર), ડેટિંગ એપ્સ અને અન્ય સોશિયલ નેટવર્ક્સની માહિતી પણ આ ડેટાબેઝમાં જોવા મળી છે.

મનોરંજન અને સ્ટ્રીમિંગ સેવાઓ પણ આ સાયબર હુમલા

મનોરંજન અને સ્ટ્રીમિંગ સેવાઓ પણ આ સાયબર હુમલાથી બચી શકી નથી. અહેવાલ અનુસાર, લગભગ 34 લાખ Netflix એકાઉન્ટ્સના લોગિન અને પાસવર્ડ લીક થયા છે. આ ઉપરાંત Disney Plus, HBO Max અને Roblox જેવી લોકપ્રિય એપ્સના યુઝર્સની વિગતો પણ આ ડેટામાં સામેલ છે. વધુ ચિંતા જનક વાત એ છે કે આ લીકમાં નાણાકીય અને કેટલીક સરકારી સેવાઓ સાથે જોડાયેલા આશરે 4.2 લાખ લોગિન રેકોર્ડ્સ પણ મળી આવ્યા છે.

હેકર્સ દ્વારા ક્લાઉડ સર્વરમાં સંગ્રહિત

અહેવાલ અનુસાર આ સમગ્ર ડેટા Infostealer નામના ખતરનાક માલવેર દ્વારા એકત્રિત કરવામાં આવ્યો હતો. આ પ્રકારનો માલવેર વપરાશકર્તાના મોબાઇલ અથવા કમ્પ્યુટરમાં અજાણતાં પ્રવેશ કરી લે છે અને સેવ કરેલા લોગિન, પાસવર્ડ્સ તથા સંવેદનશીલ માહિતી ચોરી લે છે. ત્યારબાદ આ માહિતી હેકર્સ દ્વારા ક્લાઉડ સર્વરમાં સંગ્રહિત કરવામાં આવે છે, જ્યાંથી તેનો દુરુપયોગ થવાની શક્યતા વધી જાય છે.

યુઝર્સે પોતાની ડિજિટલ સુરક્ષા

આવા ડેટા લીકથી બચવા માટે યુઝર્સે પોતાની ડિજિટલ સુરક્ષા અંગે વધુ સાવચેત બનવાની જરૂર છે. દરેક પ્લેટફોર્મ માટે અલગ અને મજબૂત પાસવર્ડ રાખવો અત્યંત જરૂરી છે. પાસવર્ડ લાંબો અને જટિલ હોવો જોઈએ જેથી તેને હેક કરવો મુશ્કેલ બને. સાથે સાથે,Two Step Verification અથવા Two Factor ઓથેન્ટિકેશન જેવી સુરક્ષા સુવિધાઓ ચાલુ રાખવી પણ ખૂબ મહત્વપૂર્ણ છે, કારણ કે તે એકાઉન્ટને વધારાનું સુરક્ષા કવચ આપે છે.

નિયમિત સમયાંતરે પાસવર્ડ બદલવાની આદત

નિયમિત સમયાંતરે પાસવર્ડ બદલવાની આદત રાખવી, અજાણી લિંક્સ અથવા શંકાસ્પદ એપ્સથી દૂર રહેવું અને વિશ્વસનીય એન્ટીવાયરસ સોફ્ટવેરનો ઉપયોગ કરવો પણ આવા સાયબર ખતરાઓથી બચવામાં મદદરૂપ થઈ શકે છે. આ ઘટના સ્પષ્ટ સંકેત આપે છે કે થોડી બેદરકારી પણ ડિજિટલ દુનિયામાં મોટું નુકસાન કરી શકે છે, તેથી આજે જ તમારા એકાઉન્ટ્સની સુરક્ષા ચકાસવી અત્યંત જરૂરી છે.

આ પણ વાંચો : RJDમાં પેઢી પરિવર્તન, તેજસ્વી યાદવ બન્યા રાષ્ટ્રીય કાર્યકારી અધ્યક્ષ