પૂર્વ ક્રિકેટર ઝહીર ખાને લંકા પ્રીમિયર લીગમાં ટીમ ખરીદી છે. તેઓ જાફના ફ્રેન્ચાઇઝીના કો-ઓનર બન્યા છે. ઝહીરે એન્કર સ્પોર્ટ્સ એબી સાથે ટીમને ટેકઓવર કરી, જે બાદ તેનું નામ બદલીને ‘એન્કર જાફના કિંગ્સ’ કરવામાં આવ્યું છે. ઝહીર પહેલાં રાહુલ દ્રવિડ, યુવરાજ સિંહ અને સચિન તેંડુલકર જેવા ભારતીય દિગ્ગજોએ પણ અલગ-અલગ T20 લીગમાં ટીમમાં રોકાણ કર્યું છે. ઝહીરે કહ્યું- શ્રીલંકન ક્રિકેટ સાથે જોડાઈને ઉત્સાહિત છું ઝહીર ખાને કહ્યું કે તેમણે હંમેશા શ્રીલંકાના બોલિંગ ટેલેન્ટની પ્રશંસા કરી છે. તેમણે શ્રીલંકામાં ઘણું ક્રિકેટ રમ્યું છે અને તેમની ત્યાંથી જોડાયેલી ઘણી સારી યાદો છે. ઝહીરે કહ્યું કે હવે માલિક તરીકે શ્રીલંકા ક્રિકેટનો ભાગ બનવું તેમના માટે ખૂબ જ રોમાંચક છે અને તેઓ એન્કર જાફના કિંગ્સ સાથે કામ શરૂ કરવા માટે ઉત્સાહિત છે. યુવા ખેલાડીઓને મળશે ઝહીરનો અનુભવ લંકા પ્રીમિયર લીગના ટૂર્નામેન્ટ ડિરેક્ટર સામંથા ડોડનવેલાએ ઝહીર ખાનના જોડાવા પર ખુશી વ્યક્ત કરી. તેમણે કહ્યું કે ઝહીર જેવી કદની વ્યક્તિનું ટીમ સાથે જોડાણ આખી લીગ માટે એક મોટો બૂસ્ટ છે.