‘KGF’ સ્ટાર યશની મોસ્ટ અવેટેડ ફિલ્મ ‘ટોક્સિક: અ ફેરી ટેલ ફોર ગ્રોન-અપ્સ’નું ટ્રેલર 8 ઓગસ્ટે રિલીઝ થઈ ગયું. લાંબી રાહ બાદ આવેલા ટ્રેલરમાં યશ અત્યંત ખતરનાક ગેંગસ્ટર અવતારમાં દેખાય છે. ફિલ્મમાં કિયારા અડવાણી, નયનતારા, હુમા કુરેશી, તારા સુતારિયા અને રુક્મિણી વસંત પણ મહત્વની ભૂમિકાઓમાં છે. ફિલ્મનું ડિરેક્શન ગીતૂ મોહનદાસે કર્યું છે. તે 26 ઓગસ્ટે સિનેમાઘરોમાં રિલીઝ થશે. ટ્રેલરની સૌથી મોટી તાકાત તેનું સ્કેલ, સિનેમેટોગ્રાફી અને એક્શન છે. યશનો લુક અને સ્ક્રીન પ્રેઝન્સ પણ પ્રભાવશાળી છે. પરંતુ લગભગ 4 મિનિટ 38 સેકન્ડના ટ્રેલર પછી પણ સૌથી મોટો પ્રશ્ન એ જ રહી જાય છે – આખરે ફિલ્મની વાર્તા શું છે? ટ્રેલર ઘણા પાત્રો, હિંસક એક્શન, સ્ટાઇલિશ વિઝ્યુઅલ્સ અને ઝડપી કટ્સથી દર્શકોને પ્રભાવિત કરવાનો પ્રયાસ કરે છે, પરંતુ વાર્તાનું ઇમોશનલ કનેક્શન એટલી મજબૂતીથી સામે આવતું નથી. આવી સ્થિતિમાં, એવી આશંકા રહે છે કે, ક્યાંક ફિલ્મ તેના વિઝ્યુઅલ્સ અને યશના સ્ટારડમ પાછળ વાર્તાની નબળાઈ તો નથી છુપાવી રહી. યશનો અંદાજ દમદાર, પણ પાત્રમાં નવતરતા કેટલી? યશ ફરી એકવાર એવા પાત્રમાં જોવા મળી રહ્યો છે, જે ખતરનાક, હિંસક અને અત્યંત સ્ટાઇલિશ છે. ‘KGF’ પછી તેનો આવો અવતાર દર્શકો માટે નવો નથી. આ જ કારણ છે કે ટ્રેલર જોયા પછી એક પ્રશ્ન ઊભો થાય છે – શું ‘ટોક્સિક’ યશને ‘KGF’ના રોકી ભાઈવાળા ઝોનમાંથી બહાર કાઢી શકશે? તેનો લુક અને એક્શન ચોક્કસપણે મોટા પડદા માટે બનાવવામાં આવ્યા છે, પણ માત્ર સ્વૅગ અને હિંસાના જોરે ફિલ્મને અલગ ઓળખ અપાવવી સરળ નહીં હોય. વાર્તા કરતાં વધુ દેખાઈ રહી છે સ્ટાઇલ ‘ટોક્સિક’ને પીરિયડ ગેંગસ્ટર એક્શન ડ્રામા કહેવામાં આવી છે. ફિલ્મની વાર્તા ગોવાની પૃષ્ઠભૂમિમાં એક એવા વ્યક્તિની આસપાસ ફરે છે, જે અપરાધની દુનિયામાં પોતાનું સામ્રાજ્ય ઊભું કરે છે. પરંતુ ટ્રેલરમાં વાર્તાને બદલે એક્શન, હથિયારો, હિંસા, ગ્લેમર અને મોટા સેટ પીસ વધુ પ્રભાવી જોવા મળે છે. આ જ ફિલ્મની સૌથી મોટી નબળાઈ બની શકે છે. જો વાર્તા મજબૂત ન નીકળી તો આટલો મોટો સ્કેલ પણ દર્શકોને લાંબા સમય સુધી બાંધી રાખવા માટે પૂરતો નહીં હોય. કિયારા-નયનતારા સહિત ફીમેલ સ્ટારકાસ્ટ પર નજર ફિલ્મમાં પાંચ મુખ્ય મહિલા કલાકારો છે, પરંતુ ટ્રેલર જોયા પછી પણ તેમના પાત્રો વિશે બહુ સ્પષ્ટતા મળતી નથી. કિયારા અડવાણીનું પાત્ર નાદિયા પહેલાથી જ ‘તબાહી’ ગીતને કારણે ચર્ચામાં છે. ‘તબાહી’માં યશ અને કિયારાની કેમેસ્ટ્રી અને ઇન્ટિમેટ સીન્સને લઈને સોશિયલ મીડિયા પર વિવાદ પણ થયો હતો. આ વિવાદ વચ્ચે ટ્રેલરથી એવી અપેક્ષા હતી કે કિયારાના પાત્રની વાર્તામાં અગત્યતા સ્પષ્ટ થશે, પરંતુ હાલમાં તે સંપૂર્ણપણે સ્પષ્ટ થતી નથી. ટ્રેલર પહેલા પણ વિવાદોમાં રહી ફિલ્મ ‘ટોક્સિક’નું ટીઝર રિલીઝ થયા બાદ મહિલાઓના ચિત્રણને લઈને વાંધાઓ ઉઠ્યા હતા. આમ આદમી પાર્ટીની મહિલા વિંગે ફરિયાદ કરી હતી, જ્યારે એક ખ્રિસ્તી સંગઠને ટીઝરમાં આર્કએન્જલ માઈકલની પ્રતિમા બતાવવાને લઈને ધાર્મિક ભાવનાઓને ઠેસ પહોંચાડવાનો આરોપ લગાવ્યો હતો. ટ્રેલર લોન્ચના બરાબર પહેલા કમાલ આર ખાને પણ યશ પર પેઇડ રિવ્યુઝની વ્યવસ્થા કરવાનો આરોપ લગાવ્યો હતો. જોકે, આ આરોપ તેનો દાવો છે અને તેની સ્વતંત્ર પુષ્ટિ થઈ નથી. નિર્ણય: વિઝ્યુઅલ્સ શાનદાર, પરંતુ વાર્તાની પરીક્ષા બાકી ‘ટોક્સિક’નું ટ્રેલર ટેકનિકલી ભવ્ય અને મોટું દેખાય છે. યશની સ્ક્રીન પ્રેઝન્સ પણ ફિલ્મની સૌથી મોટી તાકાત છે. પરંતુ વાર્તાને લઈને ટ્રેલર હજુ પણ દર્શકોને સંપૂર્ણપણે આશ્વસ્ત કરતું નથી. ફિલ્મની અસલી પરીક્ષા એ જ હશે કે શું ગીતુ મોહનદાસ આ મોટા સ્ટાર અને વિશાળ બજેટ સાથે માત્ર એક સ્ટાઇલિશ ગેંગસ્ટર ફિલ્મ બનાવે છે કે પછી તેની પાછળ કોઈ મજબૂત અને ભાવનાત્મક વાર્તા પણ છે. હાલમાં ટ્રેલરનો સૌથી મોટો સવાલ એ જ છે- ‘ટોક્સિક’ યશની આગામી મોટી ફિલ્મ બનશે કે માત્ર યશના સ્ટારડમ પર ટકેલી એક વધુ મોટી એક્શન ફિલ્મ સાબિત થશે?