અમેરિકાના રાષ્ટ્રપતિ ડોનાલ્ડ ટ્રમ્પે કહ્યું છે કે ભારત હવે ઈરાન પાસેથી ક્રૂડ ઓઈલ ખરીદવાને બદલે વેનેઝુએલા પાસેથી ઓઈલ ખરીદશે. તેમણે દાવો કર્યો છે કે ભારતે વેનેઝુએલા પાસેથી ઓઈલ ખરીદવાનો સોદો કરી લીધો છે. આ નિવેદન ટ્રમ્પે વોશિંગ્ટન ડીસીથી એરફોર્સ વનમાં પત્રકારો સાથે વાતચીત દરમિયાન આપ્યું હતું. જોકે, ભારત સરકાર તરફથી આ અંગે હજુ સુધી કોઈ સત્તાવાર પ્રતિક્રિયા આવી નથી. ટ્રમ્પે કહ્યું, “અમે પહેલાથી જ એક ડીલ કરી લીધી છે. ભારત વેનેઝુએલા પાસેથી ઓઈલ ખરીદશે, ઈરાન પાસેથી નહીં.” તેમણે એમ પણ કહ્યું કે ભારત સાથે આ સોદાનો કોન્સેપ્ટ નક્કી થઈ ચૂક્યો છે. ટ્રમ્પના મતે, ચીન પણ જો ઈચ્છે તો વેનેઝુએલા પાસેથી ઓઈલ ખરીદી શકે છે. ભારતે 2019 પછી વેનેઝુએલા પાસેથી ઓઈલ લેવાનું બંધ કરી દીધું હતું અમેરિકાએ 2019માં વેનેઝુએલા પર ખૂબ જ કડક આર્થિક પ્રતિબંધો (સેંક્શન્સ) લાદ્યા હતા, અમેરિકાએ સેકન્ડરી સેંક્શન્સ પણ લાદ્યા, એટલે કે જે પણ દેશ કે કંપની વેનેઝુએલા પાસેથી ઓઈલ ખરીદે છે, તેને અમેરિકી બજારમાં વેપાર કરવા કે બેંકિંગ સુવિધાઓથી રોકી શકાય છે. આ કારણે ઘણા દેશોએ વેનેઝુએલાનું ઓઈલ ખરીદવાનું બંધ કરી દીધું. ભારત પણ વેનેઝુએલા પાસેથી ઘણું ઓઈલ ખરીદતું હતું. ઘણા મીડિયા રિપોર્ટ્સમાં દાવો કરવામાં આવ્યો છે કે ત્યારે ભારત તેના કુલ ઓઈલ આયાતનો લગભગ 6% વેનેઝુએલા પાસેથી લેતું હતું. વેનેઝુએલા પેટ્રોલિયમ એક્સપોર્ટિંગ કન્ટ્રીઝ (OPEC)નો સભ્ય છે. તેની પાસે વિશ્વનો સૌથી મોટો ઓઈલ ભંડાર છે, પરંતુ તે વૈશ્વિક સપ્લાયનો લગભગ 1% જ પૂરો પાડે છે. ભારતે 2024માં ફરીથી વેનેઝુએલાનું ઓઈલ ખરીદવાનું શરૂ કર્યું અમેરિકાએ થોડા સમય માટે (2023-2024માં) વેનેઝુએલા પર આંશિક રીતે સેંક્શન્સ હળવા કર્યા, જેના કારણે ભારતે ફરીથી વેનેઝુએલા પાસેથી ઓઈલ ખરીદ્યું. 2024માં ભારતની આયાત સરેરાશ 63,000 થી 1 લાખ બેરલ પ્રતિદિન સુધી પહોંચી ગઈ. ત્યારબાદ 2025માં વેનેઝુએલાથી ભારતની ઓઈલ આયાત વધીને લગભગ 1.41 અબજ ડોલર સુધી પહોંચી ગઈ. પરંતુ મે 2025માં અમેરિકાએ ફરી એકવાર વેનેઝુએલાના ઓઈલ પર સખ્તાઈ વધારી દીધી. ત્યારબાદ 2026ની શરૂઆતમાં વેનેઝુએલાથી ભારતની ક્રૂડ આયાત માત્ર 0.3% રહી ગઈ. વેનેઝુએલાથી ઓઈલ ખરીદવાના પ્રયાસમાં રિલાયન્સ રોઇટર્સના અહેવાલ મુજબ, ભારતની મોટી ખાનગી કંપની રિલાયન્સ ઇન્ડસ્ટ્રીઝે વેનેઝુએલાથી ફરીથી ક્રૂડ તેલ ખરીદવા માટે અમેરિકા પાસેથી મંજૂરી લેવાના પ્રયાસો શરૂ કર્યા છે. અહેવાલ મુજબ, આવું એટલા માટે કરવામાં આવી રહ્યું છે કારણ કે પશ્ચિમી દેશો ભારત પર રશિયાથી ઓઈલની આયાત ઘટાડવા દબાણ કરી રહ્યા છે અને રિલાયન્સ પોતાના માટે વૈકલ્પિક ઓઈલ સપ્લાય સુરક્ષિત કરવા માંગે છે. સૂત્રોના જણાવ્યા અનુસાર, રિલાયન્સના પ્રતિનિધિઓ આ મંજૂરી માટે અમેરિકાના યુએસ સ્ટેટ ડિપાર્ટમેન્ટ અને યુએસ ટ્રેઝરી ડિપાર્ટમેન્ટ સાથે વાતચીત કરી રહ્યા છે. આ સમગ્ર મામલે રિલાયન્સ ઇન્ડસ્ટ્રીઝે રોઇટર્સ દ્વારા મોકલવામાં આવેલા ઇમેઇલનો તાત્કાલિક કોઈ જવાબ આપ્યો નથી. ગયા વર્ષે રોજ 63,000 બેરલ ઓઈલ ખરીદતી હતી રિલાયન્સ રિલાયન્સે અગાઉ પણ અમેરિકા પાસેથી લાઇસન્સ લઈને વેનેઝુએલા પાસેથી ઓઈલ ખરીદ્યું હતું. કંપની પાસે વિશ્વનું સૌથી મોટું રિફાઇનરી કોમ્પ્લેક્સ છે. તે ગુજરાતમાં આવેલું છે અને તેની કુલ ક્ષમતા લગભગ 14 લાખ બેરલ પ્રતિદિન છે. 2025ના પ્રથમ ચાર મહિનામાં વેનેઝુએલાની કંપની PDVSAએ રિલાયન્સને ચાર જહાજો દ્વારા ઓઈલ મોકલ્યું હતું, જે રોજ લગભગ 63,000 બેરલ જેટલું હતું. પરંતુ માર્ચ-એપ્રિલ 2025 માં અમેરિકાએ મોટાભાગના લાઇસન્સ સસ્પેન્ડ કરી દીધા અને વેનેઝુએલા પાસેથી તેલ ખરીદનારા દેશો પર ટેરિફની ધમકી આપી, જેના પછી મે 2025 માં રિલાયન્સનું છેલ્લું વેનેઝુએલન ઓઈલનું જહાજ ભારત પહોંચ્યું હતું. રિલાયન્સે ગુરુવારે કહ્યું હતું કે જો અમેરિકી નિયમો હેઠળ બિન-અમેરિકી ખરીદદારોને વેનેઝુએલા પાસેથી ઓઈલ વેચવાની મંજૂરી મળે છે, તો તે ફરીથી ખરીદી પર વિચાર કરશે. વેનેઝુએલા અમેરિકાને 3 થી 5 કરોડ બેરલ ઓઈલ આપશે અમેરિકી રાષ્ટ્રપતિ ડોનાલ્ડ ટ્રમ્પે ગયા મહિને કહ્યું હતું કે વેનેઝુએલાના વચગાળાના રાષ્ટ્રપતિ અમેરિકાને 3 થી 5 કરોડ બેરલ ઓઈલ સોંપશે. ટ્રમ્પે જણાવ્યું કે આ ઓઈલ બજાર ભાવે વેચવામાં આવશે. તેનાથી મળતી રકમ પર ટ્રમ્પનું નિયંત્રણ રહેશે. 5 કરોડ બેરલ ક્રૂડ ઓઇલની કિંમત હાલમાં લગભગ 25 હજાર કરોડ રૂપિયા છે. અમેરિકી રાષ્ટ્રપતિ અનુસાર તેનો ઉપયોગ વેનેઝુએલા અને અમેરિકાના લોકોના હિતમાં કરવામાં આવશે. ————————————– આ સમાચાર પણ વાંચો… ટ્રમ્પ વેનેઝુએલા પાસેથી 5 કરોડ બેરલ ઓઈલ લેશે: કહ્યું- કમાણી પર પણ મારું નિયંત્રણ રહેશે, તેનાથી બંને દેશોને ફાયદો થશે અમેરિકી રાષ્ટ્રપતિ ડોનાલ્ડ ટ્રમ્પે કહ્યું છે કે વેનેઝુએલાના વચગાળાના રાષ્ટ્રપતિ અમેરિકાને 3 થી 5 કરોડ બેરલ પ્રતિબંધિત ઓઈલ સોંપશે. ટ્રમ્પે જણાવ્યું કે આ ઓઈલ બજાર ભાવે વેચવામાં આવશે. તેનાથી મળતી રકમ પર ટ્રમ્પનું નિયંત્રણ રહેશે.