તાજેતરમાં દિલ્હીમાં ‘ડેલી બેલી’ ફેન મીટનું આયોજન કરવામાં આવ્યું હતું, જેમાં આમિર ખાન સાથે તેમના ભાણેજ એક્ટર ઇમરાન ખાન, એક્ટર-કોમેડિયન વીરદાસ અને આખી ટીમ હાજર હતી. આ ફેન મીટમાં એક્ટર અને બધાએ ‘ડેલી બેલી’ સાથે જોડાયેલી પોતાની યાદો શેર કરી. આમિરે પણ યાદો શેર કરતા જણાવ્યું કે ઘણી વાર રિજેક્ટ થયા પછી આખરે ‘ડેલી બેલી’ કેવી રીતે બનીને તૈયાર થઈ. એક્ટરે ફિલ્મનો પહેલો કટ પહેલી વાર જોવાથી જોડાયેલો એક મજેદાર કિસ્સો પણ સંભળાવ્યો. ફેન મીટમાં જ્યારે એક વ્યક્તિએ આમિરને ફિલ્મના પહેલા કટ વિશે પૂછ્યું, ત્યારે આમિરે કહ્યું- “પહેલી સ્ક્રીનિંગમાં હું, કિરણ, ઇમરાન, રામ સંપત (સંગીતકાર) અને લગભગ આઠથી દસ લોકો હાજર હતા. મારી સાથે મુંબઈ પોલીસની સિક્યોરિટી હોય છે. હું અવારનવાર તેમને પણ કહી દઉં છું કે તમે લોકો પણ ફિલ્મ બેસીને જુઓ. હું પણ પહેલીવાર ફિલ્મનો ફર્સ્ટ કટ જોઈ રહ્યો હતો. જ્યારે હું ફિલ્મ જોઈ રહ્યો હતો ત્યારે મેં વિચાર્યું, ‘યાર, બહુ જ ખરાબ ફિલ્મ બનાવી છે. અલગ લેવલની ખરાબ બની છે.” આગળ કહ્યું- “ફિલ્મનું સ્ક્રીનિંગ પૂરું થયા પછી મારી નજર પોલીસવાળા પર પડી. મેં તેમને પૂછ્યું કે તેમને ફિલ્મ કેવી લાગી. તેમણે સ્ક્રીન તરફ જોયું, પછી મારી તરફ જોયું અને પછી નીચે જોવા લાગ્યા. પછી કહ્યું, ‘સર, છેલ્લા 25 વર્ષમાં તમે જે નામ કમાવ્યું છે ને, તે તમે આ એક ફિલ્મથી ગુમાવવાના છો. આમિર કહે છે કે તેણે ખરેખર આ વાત ખૂબ જ સ્પષ્ટતાથી કહી. ઘણીવાર, પહેલો પ્રયાસ સફળ થતો નથી. આ કોઈ અસામાન્ય વાત નથી. જ્યારે હ્યુમર કામ કરતું નથી અને ગાળોનો ભરાવો હોય છે, ત્યારે લાગે છે કે આ બધું ફક્ત દેખાડા માટે છે. તેનાથી મામલો વધુ બગડી જાય છે. જોકે, તે આ ફિલ્મને સુધારવામાં સફળ રહ્યા. તેણે જણાવ્યું કે કેટલાક વર્ષો પછી તેણે ફિલ્મ પર ફરીથી કામ કર્યું. રસપ્રદ વાત એ છે કે પોલીસવાળાની સ્પષ્ટ કમેન્ટે ફિલ્મના ટીઝરમાં પણ દર્શાવવામાં આવી છે. પહેલા ટીઝરમાં ઇમરાન ઑડિયન્સને ચેતવણી આપતા કહે છે, “મામુ પોતાની બધી ઇજ્જત ગુમાવવાના છે.” ‘ડેલી બેલી’ની વાત કરીએ તો તે વર્ષ 2011માં રિલીઝ થઈ હતી. આ એક્શન-કોમેડી ફિલ્મને આમિર ખાન પ્રોડક્શન્સે બનાવી હતી. ફિલ્મની વાર્તા અક્ષત વર્માએ લખી હતી અને તેનું દિગ્દર્શન અભિનય દેવે કર્યું હતું. ફિલ્મમાં ઇમરાન ખાન, કુણાલ રોય કપૂર, વીર દાસ, પૂર્ણા જગન્નાથન અને શેનાઝ ટ્રેઝરીવાલાએ કામ કર્યું હતું. ફિલ્મનો 70 ટકા ડાયલોગ અંગ્રેજી અને 30 ટકા હિન્દીમાં હતો. ફિલ્મે બોક્સ ઓફિસ પર સારું પ્રદર્શન કર્યું હતું. સાથે જ, ફિલ્મના વિવેચકોએ પણ પ્રશંસા કરી હતી.