ભારતીય શટલર તન્વી શર્માએ તાઈપે ઓપન સુપર 300 ટુર્નામેન્ટની વુમન્સ સિંગલ્સની ફાઇનલમાં સ્થાન મેળવી લીધું છે. શનિવારે રમાયેલી સેમિફાઇનલ મેચમાં 17 વર્ષીય તન્વીએ ચીની તાઈપેની હુઆંગ યુ-હસુનને સીધા ગેમમાં હરાવી હતી. પંજાબની રહેવાસી તન્વીએ આ મેચ 21-17, 21-11થી પોતાના નામે કર્યો. આ એકતરફી સેમિફાઇનલ મેચ માત્ર 33 મિનિટ સુધી ચાલી હતી. તન્વી ગયા વર્ષે યુએસ ઓપન સુપર 300માં રનર-અપ રહી હતી. રવિવારે થશે ટાઇટલ મુકાબલો જુનિયર વર્લ્ડ ચેમ્પિયનશીપની સિલ્વર મેડલિસ્ટ તન્વી શર્મા રવિવારે યોજાનારી ફાઇનલમાં ટાઇટલ જીત માટે મેદાનમાં ઉતરશે. ફાઇનલમાં તેનો મુકાબલો હમવતન ઉન્નતિ હુડ્ડા અથવા વિયેતનામની છઠ્ઠી ક્રમાંકિત ખેલાડી ગુયેન થુય લિન્હમાંથી કોઈ એક સાથે થશે. પહેલી ગેમમાં સરસાઈ મેળવી, બીજીમાં સંપૂર્ણપણે પ્રભુત્વ જમાવ્યું તન્વીએ મેચની શરૂઆતથી જ આક્રમક રમત બતાવી. પહેલી ગેમમાં હુઆંગ યુ-હ્સુને થોડા સમય સુધી મુકાબલો કર્યો, પરંતુ તન્વીએ 21-17થી ગેમ પોતાના નામે કરી લીધી. બીજી ગેમમાં ભારતીય ખેલાડીએ વિરોધીને વાપસીનો કોઈ મોકો આપ્યો નહીં. તેણે સતત પોઇન્ટ મેળવીને 21-11થી જીત નોંધાવી અને સીધી ગેમમાં ફાઇનલની ટિકિટ પાક્કી કરી લીધી.