બુધવારે સાંજે થાઈલેન્ડના હાટ યાઈમાં એક 18 વર્ષીય યુવકે શાળામાં ગોળીબાર કર્યો. આ હુમલામાં શાળાના ડિરેક્ટર અને એક વિદ્યાર્થી ગંભીર રીતે ઘાયલ થયા. આરોપીએ બાદમાં એક મહિલા સ્ટાફ સભ્યને બંધક બનાવી લીધી. યુવક પોતાની બહેનને મળેલી સજાથી નારાજ હતો. થાઈ એન્ક્વાયરરના અહેવાલ મુજબ, આ ઘટના સાંજે લગભગ 4:45 વાગ્યે હાટ યાઈમાં પ્રથન ખીરીવત શાળામાં બની હતી. પ્રારંભિક અહેવાલો દર્શાવે છે કે ઘણા લોકો ઘાયલ થયા છે, પરંતુ અધિકારીઓએ હજુ સુધી કુલ મૃતકોની સંખ્યાની પુષ્ટિ કરી નથી. પોલીસે આરોપીની ઓળખ 18 વર્ષીય ખેમ તરીકે કરી છે. મીડિયા અહેવાલો અનુસાર, પોલીસને અગાઉ માહિતી મળી હતી કે આરોપી તેની માતાને નુકસાન પહોંચાડવાનો પ્રયાસ કરી રહ્યો છે. જ્યારે પોલીસ ઘરે પહોંચી, ત્યારે આરોપીએ પોલીસ અધિકારી પાસેથી M4 રાઈફલ છીનવી લીધી અને નજીકના શાળા કેમ્પસ તરફ ભાગી ગયો, જ્યાં તેણે ગોળીબાર કર્યો. એક પોલીસ અધિકારીએ રોઇટર્સને જણાવ્યું, હુમલાખોરને કસ્ટડીમાં લેવામાં આવ્યો છે અને બધા બંધકોને મુક્ત કરવામાં આવ્યા છે.