દિવાળી અને દશેરા દરમિયાન ટ્રેનોમાં થતી ભીડને ધ્યાનમાં રાખીને રેલવે 102 ફેસ્ટિવલ સ્પેશિયલ ટ્રેનો દોડાવશે. આ સ્પેશિયલ ટ્રેનો માટે ટિકિટ બુકિંગ શરૂ થઈ ગયું છે. તેમાં મુસાફરી કરવા માટે સ્પેશિયલ ચાર્જ ચૂકવવો પડશે. 10 ઑક્ટોબરથી 24 નવેમ્બર વચ્ચે દોડનારી આ સ્પેશિયલ ટ્રેનો મુંબઈ, ચેન્નાઈ, લાતૂર, કોલ્હાપુર અને કલબુર્ગી જેવા શહેરો વચ્ચે કનેક્ટિવિટી વધારશે. આ ટ્રેનોમાં IRCTCની એપ અને સત્તાવાર વેબસાઇટ (irctc.co.in), રેલવેના રિઝર્વેશન સેન્ટર અને RailOne એપ દ્વારા ટિકિટ બુક કરી શકાય છે. મુંબઈ-ચેન્નાઈ વીકલી સ્પેશિયલ છત્રપતિ શિવાજી મહારાજ ટર્મિનસ (CSMT) મુંબઈથી ચેન્નઈ વચ્ચે સાપ્તાહિક વિશેષ ટ્રેન દોડશે. આ ટ્રેન 15 ઑક્ટોબરથી 19 નવેમ્બર વચ્ચે બંને દિશામાં 6-6 ફેરા કરશે. ચેન્નઈ બીચથી CSMT મુંબઈ વિશેષ ટ્રેન દર ગુરુવારે સવારે 4 વાગ્યે રવાના થશે અને બીજા દિવસે સવારે 4 વાગ્યે મુંબઈ પહોંચશે. CSMT મુંબઈ-લાતૂર આ ટ્રેન મુંબઈ અને લાતૂર વચ્ચે અઠવાડિયામાં બે દિવસ દોડશે. તે 13 ઑક્ટોબરથી 24 નવેમ્બર વચ્ચે બંને દિશામાં 13-13 ફેરા પૂર્ણ કરશે. CSMT મુંબઈ-લાતૂર વિશેષ ટ્રેન દર મંગળવાર અને ગુરુવારે રાત્રે 12:35 વાગ્યે મુંબઈથી રવાના થશે અને તે જ દિવસે સવારે 11:40 વાગ્યે લાતૂર પહોંચશે. પરત ફરતી વખતે લાતૂર-CSMT મુંબઈ વિશેષ ટ્રેન એ જ દિવસોમાં સાંજે 16:30 વાગ્યે રવાના થઈને બીજા દિવસે સવારે 4:10 વાગ્યે મુંબઈ પહોંચશે. કોલ્હાપુર-કલબુર્ગી સ્પેશિયલ આ ટ્રેન કોલ્હાપુર અને કલબુર્ગી વચ્ચે શુક્રવાર સિવાય અઠવાડિયામાં 6 દિવસ દોડશે. આ ટ્રેન બંને દિશામાં 32-32 ફેરા કરશે. કોલ્હાપુર-કલબુર્ગી સ્પેશિયલ 10 ઑક્ટોબરથી 15 નવેમ્બર સુધી સવારે 06:10 વાગ્યે કોલ્હાપુરથી રવાના થઈને સાંજે 16:10 વાગ્યે કલબુર્ગી પહોંચશે. પરત ફરતી વખતે આ ટ્રેન કલબુર્ગીથી સાંજે 18:10 વાગ્યે ઉપડીને બીજા દિવસે સવારે 05:40 વાગ્યે કોલ્હાપુર પહોંચશે.