તહેવારોની સિઝનમાં ઇલેક્ટ્રોનિક્સ અને કન્ઝ્યુમર એપ્લાયન્સ ખરીદવાની યોજના બનાવી રહેલા ગ્રાહકોના ખિસ્સા પર બોજ વધવાનો છે. 1 ઑક્ટોબરથી કંપનીઓ AC, LED TV, વોશિંગ મશીન અને ફ્રિજ જેવા પ્રોડક્ટ્સની કિંમતોમાં 8% સુધીનો વધારો કરવા જઈ રહી છે. આંતરરાષ્ટ્રીય બજારમાં કૉપર, સ્ટીલ, એલ્યુમિનિયમ અને ક્રૂડ ઑઇલ સાથે જોડાયેલા કાચા માલની કિંમતોમાં થયેલા વધારા અને કરન્સીમાં ઉતાર-ચઢાવને કારણે કંપનીઓએ આ નિર્ણય લીધો છે. વર્ષ 2026માં કન્ઝ્યુમર ઇલેક્ટ્રોનિક્સ ઇન્ડસ્ટ્રી તરફથી કિંમતોમાં આ ત્રીજો વધારો હશે. AC 5-8% સુધી મોંઘા થશે; ટીવી-વોશિંગ મશીનના ભાવ 3-4% વધશે જાણો કઈ કંપનીના પ્રમુખે શું કહ્યું? 1 ઓક્ટોબરથી ACના ભાવમાં 5% વધારો કરી રહ્યા છીએ: હાયર ઇન્ડિયા હાયર ઇન્ડિયાના પ્રેસિડેન્ટ એનએસ સતીશે જણાવ્યું કે તાંબાના ભાવ છેલ્લા એક વર્ષમાં 8,000-9,000 ડૉલરથી વધીને પ્રતિ મેટ્રિક ટન 14,500 ડૉલર સુધી પહોંચી ગયા છે. એક ACમાં 3થી 4 કિલો તાંબાનો ઉપયોગ થાય છે. અમે 1 ઓક્ટોબરથી ACના ભાવમાં 5% વધારો કરી રહ્યા છીએ. ઓક્ટોબરથી જાન્યુઆરી વચ્ચે અલગ-અલગ તબક્કામાં કુલ 15% વધારાનો અંદાજ છે. તહેવારોમાં વેચાણ પર ભાવ વધારાની અસર મર્યાદિત કંપનીઓનું માનવું છે કે તહેવારોમાં વેચાણ પર ભાવ વધારાની અસર મર્યાદિત જ રહેશે. તેનું કારણ એ છે કે મોટાભાગના ડીલર્સ અને ડિસ્ટ્રિબ્યુટર્સે ઑગસ્ટ અને સપ્ટેમ્બરની પ્રી-બાઇંગ યોજનાઓ હેઠળ જૂનો સ્ટોક પહેલેથી જ ખરીદી લીધો છે. સપ્લાય પાઇપલાઇનમાં 1થી 1.5 મહિનાનો જૂનો સ્ટોક ઉપલબ્ધ છે, જેનો લાભ લઈને ગ્રાહકો દિવાળી સુધી જૂના ભાવે જ ઇલેક્ટ્રોનિક્સ સામાન ખરીદી શકશે. નવા ભાવ દિવાળી બાદ સંપૂર્ણપણે લાગુ થશે.