બેંગલુરુના ટ્રાફિકમાં રોજિંદા નિયમોના ઉલ્લંઘનથી કંટાળીને, સોફ્ટવેર એન્જિનિયર પંકજ તંવરે એક અનોખો ઉકેલ શોધ્યો છે. તેમણે સામાન્ય દેખાતા હેલમેટને આર્ટિફિશિયલ ઇન્ટેલિજન્સ AI અને દુનિયાના સૌથી નાના કમ્પ્યુટર Raspberry Pi ની મદદથી સ્માર્ટ ટ્રાફિક મોનિટરિંગ મશીનમાં ફેરવી દીધું છે.

કેવી રીતે કામ કરે છે આ હેલમેટ?

આ હેલમેટમાં હાઇ-ટેક કેમેરા અને GPS સિસ્ટમ લગાવવામાં આવી છે. તે રિયલ ટાઈમમાં રસ્તા પરની હિલચાલને ટ્રેક કરે છે. આ સિસ્ટમ એટલી સક્ષમ છે કે તે સામેથી આવતા વાહનચાલકે હેલમેટ પહેર્યું છે કે નહીં, ગાડી ખોટી દિશામાં છે કે નહીં, કે નંબર પ્લેટ સાથે છેડછાડ થઈ છે કે નહીં તે તુરંત ઓળખી લે છે. નિયમ તૂટતાની સાથે જ તે ફોટો અને લોકેશન સાથેનો રિપોર્ટ તૈયાર કરી લે છે, જે મોબાઈલ હોટસ્પોટ દ્વારા સીધો પોલીસ પોર્ટલ પર મોકલી શકાય છે.

પોલીસનો રસ અને સોશિયલ મીડિયા પર ધૂમ

પંકજે જ્યારે આ હેલમેટનો વીડિયો સોશિયલ મીડિયા પર મૂક્યો, ત્યારે તે જોતજોતામાં વાયરલ થઈ ગયો. બેંગલુરુ ટ્રાફિક પોલીસે પણ આ ટેકનોલોજીમાં રસ દાખવ્યો છે, કારણ કે આ મોબાઈલ સિસ્ટમ એવા વિસ્તારોમાં કારગર સાબિત થઈ શકે છે જ્યાં સ્થિર CCTV કેમેરા નથી.

પડકારો અને હેતુ

જોકે, આ ટેકનોલોજી સાથે પ્રાઇવસી અને ડેટાની સુરક્ષાને લઈને કેટલાક પ્રશ્નો પણ ઉઠ્યા છે. પંકજ પોતે સ્વીકારે છે કે આ સિસ્ટમ હજુ પ્રારંભિક તબક્કામાં છે અને તેમાં સુધારાને અવકાશ છે. પંકજનો મુખ્ય ઉદ્દેશ્ય લોકોને હેરાન કરવાનો નહીં, પરંતુ રસ્તાઓ પર શિસ્ત લાવવાનો છે. આ શોધ સાબિત કરે છે કે જો ટેકનોલોજી અને જાગૃતિનો સમન્વય થાય, તો સામાન્ય નાગરિક પણ સમાજમાં મોટું પરિવર્તન લાવી શકે છે.

આ પણ વાંચોઃ Lifestyle: કાંસકામાં આવતા વાળને કહો અલવિદા, ઘરે જ બનાવો કુદરતી બનાના હેર સ્પા