5 વખતની ચેમ્પિયન ચેન્નઈ સુપર કિંગ્સના ફાસ્ટ બોલર નાથન એલિસ હેમસ્ટ્રિંગ ઈજાને કારણે IPL 2026માંથી બહાર થઈ ગયો છે. ફ્રેન્ચાઈઝીના એક અધિકારીએ જણાવ્યું કે 31 વર્ષીય એલિસ IPLમાંથી બહાર થઈ ચૂક્યો છે. જોકે તેના રિપ્લેસમેન્ટ અંગે હજુ કોઈ નિર્ણય લેવાયો નથી. આ તરફ, રાજસ્થાન રોયલ્સના સેમ કરન પણ ગ્રોઈન ઈજાને કારણે આખી સીઝનમાંથી બહાર થઈ શકે છે. 27 વર્ષીય કરન આ સીઝનમાં પહેલીવાર રાજસ્થાન રોયલ્સ માટે રમવાનો હતો. પરંતુ, ઈજાને કારણે તેનું રમવું મુશ્કેલ લાગી રહ્યું છે. RR એ કરનના રિપ્લેસમેન્ટની જાહેરાત કરી નથી. ઋતુરાજ ગાયકવાડની કેપ્ટનશીપ હેઠળની CSK અને રિયાન પરાગની કેપ્ટનશીપ હેઠળની રાજસ્થાનની ટીમ પોતપોતાના અભિયાનની શરૂઆત 30 માર્ચે ગુવાહાટીમાં એકબીજા સામે કરશે. IPL 2026ની શરૂઆત 28 માર્ચે RCB અને SRH મેચ સાથે થશે. એલિસને ચેન્નઈએ 2 કરોડ રૂપિયામાં ખરીદ્યો એલિસને CSKએ 2025ના મેગા ઓક્શનમાં 2 કરોડ રૂપિયામાં ખરીદ્યો હતો. આ પહેલા તે 4 સીઝન સુધી પંજાબ કિંગ્સ માટે રમી ચૂક્યો છે. તેણે IPLમાં અત્યાર સુધી 17 મેચમાં 19 વિકેટ લીધી છે. સેમ કરનને RRએ CSKથી ટ્રેડ કર્યો સેમ કરનને રાજસ્થાન રોયલ્સે ગયા વર્ષે નવેમ્બરમાં ચેન્નઈ સુપર કિંગ્સથી ટ્રેડથી પોતાની સાથે જોડ્યો હતો. આ ટ્રેડમાં કરન સાથે ભારતના ઓલરાઉન્ડર રવીન્દ્ર જાડેજા પણ RRમાં સામેલ થયો હતો. તેના બદલે રાજસ્થાને વિકેટકીપર-બેટર સંજુ સેમસનને CSKને મોકલ્યો હતો. લોકી ફર્ગ્યુસન લીગની શરૂઆતની મેચ ગુમાવશે ન્યૂઝીલેન્ડનો ફાસ્ટ બોલર લોકી ફર્ગ્યુસન ભારતીય લીગની શરૂઆતની મેચ ગુમાવશે. તે તાજેતરમાં પિતા બન્યો છે અને પરિવાર સાથે સમય વિતાવવાને પ્રાથમિકતા આપી રહ્યો છે. તેણે કહ્યું કે તે ઘરે રહીને પત્નીને મદદ કરવા માગે છે અને પોતાના પુત્ર સાથે વધુ સમય વિતાવવા માગે છે. ફર્ગ્યુસને ઓકલેન્ડમાં સાઉથ આફ્રિકા સામે ત્રીજી T20 મેચ પહેલા કહ્યું કે તે કેટલાક અઠવાડિયાનો બ્રેક લેશે. પછી IPLના બીજા ફેઝમાં પંજાબ કિંગ્સ સાથે જોડાઈ શકે છે. તેની ગેરહાજરીમાં પંજાબ કિંગ્સ ઓસ્ટ્રેલિયાના ફાસ્ટ બોલર બેન ડ્વારશુઈસને તક આપી શકે છે. ટીમ પાસે અર્શદીપ સિંહ, માર્કો યાન્સેન, ઝેવિયર બાર્ટલેટ, યશ ઠાકુર, વિશાખ વિજયકુમાર અને માર્કસ સ્ટોઇનિસ જેવા વિકલ્પો પણ ઉપલબ્ધ છે.