નાયરા એનર્જીએ પેટ્રોલ અને ડીઝલના ભાવમાં વધારો કર્યો છે. કંપનીએ પેટ્રોલના ભાવમાં ₹5 પ્રતિ લિટર અને ડીઝલના ભાવમાં ₹3 પ્રતિ લિટરનો વધારો કર્યો છે. નવા ભાવ શનિવાર સવારથી જ લાગુ થઈ ગયા છે. અમદાવાદમાં એક લીટર પેટ્રોલ ₹106.83 અને ડીઝલ ₹100.92 થયું છે. આ વધારા બાદ ભોપાલમાં એક લિટર પેટ્રોલનો ભાવ ₹119.54 અને ડીઝલનો ભાવ ₹103.64 થઈ ગયો છે. આંતરરાષ્ટ્રીય બજારમાં ક્રુડ ઓઈલના ભાવમાં થયેલા વધારા બાદ છૂટક ભાવો અને વધતી કિંમત વચ્ચેના તફાવતને ઘટાડવા માટે આ નિર્ણય લેવામાં આવ્યો છે. વર્ષની શરૂઆતમાં પણ ભાવ વધાર્યા હતા, બાદમાં ઘટાડ્યા આ વર્ષની શરૂઆતમાં જ્યારે ઈરાન સંઘર્ષને કારણે વૈશ્વિક ઊર્જા પુરવઠો પ્રભાવિત થયો હતો, ત્યારે કંપનીએ 26 માર્ચે પણ પેટ્રોલ ₹5 અને ડીઝલ ₹3 પ્રતિ લિટર મોંઘું કર્યું હતું. જોકે, બાદમાં જ્યારે પશ્ચિમ એશિયામાં તણાવ ઓછો થયો અને આંતરરાષ્ટ્રીય ક્રૂડના ભાવ ઘટ્યા, ત્યારે કંપનીએ 1 જુલાઈએ પેટ્રોલ ₹5 અને ડીઝલ ₹3 પ્રતિ લિટર સસ્તુ કરી દીધું હતું. સરકારી કંપનીઓએ ભાવમાં વધારો કર્યો નથી હાલ સરકારી તેલ કંપનીઓ ઇન્ડિયન ઓઇલ કોર્પોરેશન (IOC), ભારત પેટ્રોલિયમ કોર્પોરેશન લિમિટેડ (BPCL) અને હિન્દુસ્તાન પેટ્રોલિયમ કોર્પોરેશન લિમિટેડ (HPCL)એ કિંમતોમાં કોઈ ફેરફાર કર્યો નથી. બીજી તરફ, જિયોએ પણ હજુ સુધી કોઈ ફેરફાર કર્યો નથી. સરકારી કંપનીઓએ મે મહિનામાં કર્યો હતો વધારો ખાનગી કંપનીઓએ ભાવ વધાર્યા બાદ સરકારી તેલ કંપનીઓએ પણ કિંમતો વધારી હતી. મે મહિનામાં IOC, BPCL અને HPCLએ મોંઘા આંતરરાષ્ટ્રીય ક્રૂડનો હવાલો આપીને હપ્તામાં પેટ્રોલ અને ડીઝલ બંનેના ભાવમાં કુલ ₹7.50-₹7.50 પ્રતિ લિટરનો વધારો કર્યો હતો. દેશના 1 લાખથી વધુ પેટ્રોલ પંપોમાંથી 90%થી વધુ પર આ ત્રણેય સરકારી કંપનીઓનું નિયંત્રણ છે.