કોન્કાકાફ નેશન્સ લીગની એક મેચમાં અજીબ ઘટના જોવા મળી. એંગ્વિલાના ફોરવર્ડ ઈડન સિપિઓના લગભગ 1.5 મીટર લાંબા વાળ ખેંચવા બદલ એન્ટિગુઆ એન્ડ બાર્બુડાના બે ખેલાડીઓને સીધું રેડ કાર્ડ બતાવવામાં આવ્યું. બંને ઘટનાઓ અલગ-અલગ સમયે બની હતી. આ છતાં એન્ટિગુઆ એન્ડ બાર્બુડાએ મેચ 5-0થી જીતી લીધી. 69મી મિનિટે મેદાનમાં આવ્યો સિપિઓ સર વિવિયન રિચર્ડ્સ સ્ટેડિયમમાં રમાયેલી મેચમાં સિપિઓ 69મી મિનિટે સબ્સ્ટિટ્યૂટ તરીકે મેદાનમાં આવ્યો હતો. તે સમયે એંગ્વિલા 0-5થી પાછળ હતું. સિપિઓ પોતાના લાંબા વાળ માટે ઓળખાય છે. ખુલ્લા રાખવામાં આવે ત્યારે તેના વાળ પગની ઘૂંટી સુધી પહોંચે છે. બાંધવા માટે તેને કમરની આસપાસ લપેટવા પડે છે. મેચની 71મી મિનિટે સિપિઓ પોતાના ડિફેન્સ એરિયામાં બોલ સાથે હતો. ત્યારે એન્ટિગુઆ એન્ડ બાર્બુડાના મિડફિલ્ડર કિઓન ગ્રીને પાછળથી તેના વાળ પકડીને ખેંચી નાખ્યા. સિપિઓએ તેનો વિરોધ કર્યો. રેફરીએ ગ્રીનને સીધું રેડ કાર્ડ બતાવી દીધું. સ્ટોપેજ ટાઇમમાં ફરી વાળ ખેંચ્યા મેચના સ્ટોપેજ ટાઇમમાં આવી જ ઘટના ફરી બની. આ વખતે એન્ટિગુઆ એન્ડ બાર્બુડાના શાલોન નાઇટે સિપિઓના વાળનો એક ભાગ પકડી લીધો. વાળ ખેંચાયા બાદ સિપિઓ મેદાન પર પડી ગયો. રેફરીએ નાઇટને પણ સીધું રેડ કાર્ડ બતાવ્યું. ત્યાર બાદ એન્ટિગુઆ એન્ડ બાર્બુડાને મેચની અંતિમ ક્ષણોમાં 9 ખેલાડીઓ સાથે રમવું પડ્યું. વાળ ખેંચવા પર રેડ કાર્ડ કેમ? ફૂટબોલના નિયમો હેઠળ જાણીજોઈને કોઈ ખેલાડી સામે હિંસક વર્તન કરવું રેડ કાર્ડનું કારણ બની શકે છે. વાળ ખેંચવું પણ સંજોગો અને વપરાયેલી તાકાતના આધારે આ જ કેટેગરીમાં આવી શકે છે. એન્ટિગુઆએ 9 ખેલાડીઓ સાથે પણ મેચ જીતી બે ખેલાડીઓને રેડ કાર્ડ મળ્યા હોવા છતાં એન્ટિગુઆ એન્ડ બાર્બુડાએ મેચ 5-0થી જીતી લીધી. ટીમે સિપિઓના મેદાન પર આવતાં પહેલાં જ પાંચ ગોલની સરસાઈ મેળવી લીધી હતી. કિઓન ગ્રીન અને શાલોન નાઇટને રેડ કાર્ડ મળવાના કારણે આગામી મેચમાં સસ્પેન્શનનો સામનો કરવો પડી શકે છે.