બીજી ટેસ્ટ મેચમાં ન્યૂઝીલેન્ડે ઇંગ્લેન્ડને 253 રનથી હરાવ્યું. લંડનના ઓવલ મેદાન પર રમાયેલી સિરીઝની બીજી મેચના પાંચમા દિવસે 463 રનના ટાર્ગેટને ચેઝ કરવા ઉતરેલી ઇંગ્લેન્ડની ટીમ બીજી ઇનિંગ્સમાં માત્ર 209 રન જ બનાવી શકી. ન્યૂઝીલેન્ડના ફાસ્ટ બોલર મેટ હેનરીએ કારકિર્દીનું સર્વશ્રેષ્ઠ પ્રદર્શન કરતા કુલ 11 વિકેટ ઝડપી. આ જીત સાથે ન્યૂઝીલેન્ડે સિરીઝમાં 1-1ની બરાબરી કરી લીધી. હારની સાથે ઇંગ્લેન્ડ માટે ICC તરફથી પણ ખરાબ સમાચાર આવ્યા. સ્લો ઓવર રેટને કારણે ઇંગ્લેન્ડ પર મેચ ફીના 50% દંડ ફટકારવામાં આવ્યો અને વર્લ્ડ ટેસ્ટ ચેમ્પિયનશિપ (WTC)ના પોઇન્ટ્સ ટેબલમાં તેના 12 પોઇન્ટ્સ કાપી લેવામાં આવ્યા. પાંચમા દિવસે માત્ર એક કલાકમાં ઇંગ્લેન્ડની ઇનિંગ્સ સમેટાઈ, જો રૂટ 77 રન બનાવીને આઉટ ઇંગ્લેન્ડને જીત માટે પાંચમા દિવસે 281 રનની જરૂર હતી, જ્યારે તેની 5 વિકેટ બાકી હતી. ચોથા દિવસની રમત 5 વિકેટે 182 રનના સ્કોર પર સમાપ્ત થઈ હતી. અંતિમ દિવસે ઇંગ્લેન્ડની ઇનિંગ્સ માત્ર એક કલાકની અંદર સમેટાઈ ગઈ. ઇંગ્લેન્ડની છેલ્લી આશા ઇન્ટરીમ કેપ્ટન જો રૂટ હતો, જે ચોથા દિવસે 75 રન બનાવીને અણનમ પરત ફર્યો હતો. રમત શરૂ થયાના માત્ર આઠ મિનિટ પછી મેટ હેનરીના અંદર આવતા બોલ પર તે LBW આઉટ થયો. રૂટ પોતાના સ્કોરમાં માત્ર બે રન ઉમેરી શક્યો અને 77 રન બનાવીને પેવેલિયન પરત ફર્યો. રૂટના આઉટ થતા જ ઇંગ્લેન્ડનો નીચલો ક્રમ સંપૂર્ણપણે વિખેરાઈ ગયો. જોફ્રા આર્ચર, મેટ ફિશર અને જોશ ટંગ ખાતું ખોલ્યા વિના મેટ હેનરીનો શિકાર બન્યા. પદાર્પણ કરી રહેલા જોર્ડન કોક્સે કેટલાક આકર્ષક શોટ લગાવ્યા, પરંતુ તેની ઇનિંગ્સ લાંબો સમય ચાલી નહીં અને તેને હેનરીએ બોલ્ડ કર્યો. ઇંગ્લેન્ડમાં ન્યૂઝીલેન્ડની સાતમી જીત કેન વિલિયમસનના અચાનક સંન્યાસ લીધા પછી તરત જ મળેલી આ જીત ન્યૂઝીલેન્ડ ક્રિકેટ માટે ઐતિહાસિક માનવામાં આવી રહી છે. ન્યૂઝીલેન્ડની ઇંગ્લેન્ડની ધરતી પર આ અત્યાર સુધીની માત્ર સાતમી ટેસ્ટ જીત છે અને આ સદીમાં ત્રીજી. આખી મેચમાં ન્યૂઝીલેન્ડે રમતનાં દરેક વિભાગમાં પોતાનું વર્ચસ્વ જાળવી રાખ્યું. મેટ હેનરીએ પ્રથમ ઇનિંગ્સમાં 5 વિકેટ લીધા પછી બીજી ઇનિંગ્સમાં પણ શાનદાર સ્પેલ (6.1-3-4-5) નાખીને મેચમાં પહેલીવાર 10 કે તેથી વધુ વિકેટ લેવાનો કારનામો કર્યો. તેની મોટાભાગની વિકેટો વિકેટકીપર ટોમ બ્લંડલને સ્ટમ્પની નજીક ઊભા રાખીને મળી. આગામી ટેસ્ટમાં કેપ્ટન બેન સ્ટોક્સની વાપસી થશે, દર્શકોને 50% રિફંડ મળશે ઇંગ્લેન્ડની આ કારમી હાર પછી મુખ્ય કોચ બ્રેન્ડન મેક્કુલમે પુષ્ટિ કરી કે નિયમિત કેપ્ટન બેન સ્ટોક્સ અને ફાસ્ટ બોલર ગસ એટકિન્સન આવતા અઠવાડિયે ટ્રેન્ટ બ્રિજ ખાતે રમાનારી ત્રીજી ટેસ્ટ મેચમાં વાપસી કરશે. લોર્ડ્સ ટેસ્ટ પછી ‘નાઇટ આઉટ’ વિવાદને કારણે બંને ખેલાડીઓની તપાસ ચાલી રહી હતી, જેના કારણે તેમને આ મેચમાંથી બહાર રાખવામાં આવ્યા હતા. પાંચમા દિવસે મેચ આટલી વહેલી સમાપ્ત થઈ જવાને કારણે સરે કાઉન્ટી ક્રિકેટ ક્લબે સ્ટેડિયમમાં આવેલા તમામ ટિકિટ ધારકોને 50% પૈસા પાછા (રિફંડ) કરવાનો નિર્ણય કર્યો. આ નિરાશ દર્શકો માટે થોડી રાહતની વાત રહી.