15 ઑગસ્ટથી હૉકી વર્લ્ડ કપની શરૂઆત થઈ રહી છે. પહેલીવાર વુમન્સ અને મેન્સની ટુર્નામેન્ટ એકસાથે યોજાઈ રહી છે. બેલ્જિયમ અને નેધરલેન્ડ્સ મળીને તેનું આયોજન કરી રહ્યા છે. ભારતીય મેન્સ ટીમ વેલ્સ સામે ટુર્નામેન્ટની પ્રથમ મેચ રમશે. આ મેચ બપોરે 4:30 વાગ્યે શરૂ થશે. તે પહેલાં વુમન્સની પ્રથમ મેચ ઓસ્ટ્રેલિયા અને જાપાન વચ્ચે બપોરે 1:30 વાગ્યે થશે. 16 દિવસ ચાલશે ટુર્નામેન્ટ, 2 સ્થળોએ મુકાબલા શનિવારથી શરૂ થનારી ટુર્નામેન્ટ 16 દિવસ સુધી ચાલશે. બંને ટુર્નામેન્ટમાં કુલ 50 મેચ રમાશે. તેનું આયોજન 2 તબક્કામાં થશે. પ્રથમ ગ્રુપ સ્ટેજ, ક્રોસઓવર પૂલ. પછી સેમિફાઇનલ અને ફાઇનલ મેચ થશે. તમામ મેચ 2 સ્થળોએ યોજાશે. કુલ 32 ટીમ ભાગ લઈ રહી છે મેન્સ અને વુમન્સ વર્લ્ડ કપમાં 16-16 ટીમ (કુલ 32 ટીમ) ભાગ લેશે. ગ્રુપ સ્ટેજમાં 16 ટીમ 4 ગ્રુપ (A, B, C, D)માં વહેંચાશે અને દરેક ટીમ 3 મેચ રમશે. દરેક ગ્રુપમાંથી ટોપ-2 ટીમ ક્રોસઓવર રાઉન્ડમાં જશે. આ 8 ટીમને 2 ગ્રુપમાં વહેંચવામાં આવશે. આ રાઉન્ડમાં દરેક ટીમ વધુ ત્રણ મેચ રમશે. આ મેચ એવી ટીમ સામે હશે જેમની સાથે તેની મેચ થઈ નથી. અહીંથી ટોપ-2 ટીમ સેમિફાઇનલમાં પહોંચશે. 29-30 ઓગસ્ટે ફાઇનલ થશે ફાઇનલ મેચ 29 અને 30 ઓગસ્ટે રમાશે. વુમન્સ વર્લ્ડ કપની ફાઇનલ 29 ઓગસ્ટે રમાશે. જ્યારે, મેન્સ વર્લ્ડ કપનો ટાઇટલ મુકાબલો 30 ઓગસ્ટે રાત્રે 8:00 વાગ્યાથી શરૂ થશે. બંને ફાઇનલના દિવસે બ્રોન્ઝ મેડલ મેચ પણ રમાશે. બેલ્જિયમમાં પ્રથમ વખત વર્લ્ડ કપ હરમનપ્રીત અને સલીમા ભારતના કેપ્ટન મેન્સ ટીમ : ગોલકીપર્સ: મોહિત એચ.એસ., સૂરજ કરકેરા. ડિફેન્ડર્સ: હરમનપ્રીત સિંહ (કેપ્ટન), જરમનપ્રીત સિંહ, અમિત રોહિદાસ, જુગરાજ સિંહ, સંજય, સુમિત, યશદીપ સિવાચ. મિડફિલ્ડર્સ: મનપ્રીત સિંહ, હાર્દિક સિંહ, વિવેક સાગર પ્રસાદ, નીલકાંતા શર્મા, રાજિંદર સિંહ, આદિત્ય અર્જુન લાલગે. ફોરવર્ડ્સ: મનદીપ સિંહ, અભિષેક, સુખજીત સિંહ, દિલપ્રીત સિંહ, શિલાનંદ લાકડા. વુમન્સ ટીમ: ગોલકીપર્સ: સવિતા પૂનિયા, બિશુ દેવી ખરીબામ. ડિફેન્ડર્સ: ઈશિકા ચૌધરી, સુશીલા ચાનુ પુખરંબમ, લાલથંટલુઆંગી, જ્યોતિ, શિલ્પી ડબાસ. મિડફિલ્ડર્સ: સલીમા ટેટે (કેપ્ટન), નિક્કી પ્રધાન, સાક્ષી રાણા, સુનેલિતા ટોપ્પો, નેહા, દીપિકા સોરેંગ. ફોરવર્ડ્સ: લાલરેમસિયામી, રુતુજા દાદાસો પિસાલ, નવનીત કૌર, દીપિકા સેહરાવત, ઈશિકા, બલજીત કૌર, બ્યુટી ડુંગડુંગ. ઇનામી રકમ નહીં, ટ્રોફી અને મેડલ મળશે હોકી વર્લ્ડ કપમાં ઇનામી રકમ નથી. ઇન્ટરનેશનલ હોકી ફેડરેશન (FIH) વર્લ્ડ કપ કે પ્રો લીગ જેવી વર્લ્ડ લેવલની ટુર્નામેન્ટ્સમાં ટ્રોફી અને મેડલ આપે છે. નેધરલેન્ડ્સે તમામ વર્લ્ડ કપ રમ્યા ભારત, નેધરલેન્ડ્સ અને સ્પેન જેવી ટીમે તમામ મેન્સ વર્લ્ડ કપ રમ્યા છે. ઓસ્ટ્રેલિયા, ઇંગ્લેન્ડ અને આર્જેન્ટિના 15-15 વખત આ ગ્લોબલ ટુર્નામેન્ટ રમી ચૂક્યા છે. પાકિસ્તાને 14 અને બેલ્જિયમે 8 વખત ભાગ લીધો છે. જ્યારે, નેધરલેન્ડ્સ, આર્જેન્ટિના અને જર્મનીએ વુમન્સ કેટેગરીના તમામ વર્લ્ડ કપ રમ્યા છે. ઓસ્ટ્રેલિયા 14, ઇંગ્લેન્ડ-સ્પેન 13-13, ચીન 10 અને ભારતે 9 વખત આ ટુર્નામેન્ટ રમી છે. ભારતે 1975માં પહેલો વર્લ્ડ કપ જીત્યો હતો ભારતીય મેન્સ હોકી ટીમે 1971માં શરૂ થયેલા પ્રથમ હોકી વર્લ્ડ કપથી જ આ ટુર્નામેન્ટમાં રમવાનું શરૂ કરી દીધું હતું. ટીમે અત્યાર સુધી 15 વખત ટુર્નામેન્ટમાં ભાગ લીધો છે અને માત્ર એક જ વાર વર્લ્ડ કપ જીત્યો છે. ભારતીય હોકી ટીમે 1975માં કુઆલાલંપુર, મલેશિયામાં રમાયેલા વર્લ્ડ કપની ફાઇનલમાં પાકિસ્તાનને હરાવીને આ ખિતાબ પોતાના નામે કર્યો હતો. ભારતીય વુમન્સ હોકી ટીમે અત્યાર સુધી કોઈ વર્લ્ડ કપ જીત્યો નથી. ટીમે 1974માં પોતાના પહેલા વર્લ્ડ કપમાં ભાગ લીધો હતો. યુદ્ધના કારણે પાકિસ્તાન પાસેથી છીનવાઈ પહેલા વર્લ્ડ કપની યજમાની હોકી વર્લ્ડ કપ કરાવવાનો વિચાર સૌથી પહેલા પાકિસ્તાનના એર માર્શલ નૂર ખાનના મગજમાં આવ્યો હતો. માર્ચ 1969માં FIHની બેઠકમાં ભારત અને પાકિસ્તાને સંયુક્ત રીતે ટુર્નામેન્ટ કરાવવાનો પ્રસ્તાવ મૂક્યો હતો. આ દરમિયાન 1971માં ભારત-પાકિસ્તાન વચ્ચે યુદ્ધ શરૂ થઈ ગયું. પાકિસ્તાને ભારતને રમવા માટે આમંત્રણ તો આપ્યું, પરંતુ ત્યાંના કેટલાક રાજકારણીઓ અને ક્રિકેટ ખેલાડી અબ્દુલ હફીઝ કારદારના નેતૃત્વ હેઠળના લોકોએ ભારતની ભાગીદારીનો હિંસક વિરોધ શરૂ કરી દીધો. મેચ શરૂ થવાના થોડા મહિના પહેલા માર્ચ 1971માં FIHએ સુરક્ષા કારણોસર આ મેગા ઇવેન્ટને પાકિસ્તાનથી હટાવીને એક તટસ્થ યુરોપિયન દેશ સ્પેન (બાર્સેલોના)માં ખસેડી દીધી હતી. જોકે, પાકિસ્તાને પહેલું ટાઇટલ જીત્યું હતું.