ત્રિનિદાદ અને ટોબેગોની રાજધાની પોર્ટ ઓફ સ્પેનના ક્વીન્સ પાર્ક ઓવલમાં રમાઈ રહેલી બીજી ટેસ્ટના ત્રીજા દિવસે પાકિસ્તાને મેચ પર મજબૂત પકડ જમાવી લીધી. વેસ્ટ ઇન્ડીઝને પ્રથમ દાવમાં 344 રન પર ઓલઆઉટ કર્યા બાદ પાકિસ્તાને 387 રન બનાવીને 43 રનની લીડ મેળવી. તેના જવાબમાં યજમાન ટીમે દિવસનો ખેલ સમાપ્ત થવા સુધી પોતાની બીજી ઇનિંગ્સમાં 6 વિકેટે 103 રન બનાવ્યા. તેની લીડ હવે માત્ર 60 રનની રહી ગઈ છે. આવી સ્થિતિમાં ચોથા દિવસે પાકિસ્તાન સામે નાનો ટાર્ગેટ આવવાની અપેક્ષા છે અને ટીમ જીતની મજબૂત સ્થિતિમાં જોવા મળી રહી છે. સ્પિનરોએ બદલ્યો મેચનો રુખ ત્રીજા દિવસનો છેલ્લો સત્ર મેચનો ટર્નિંગ પોઈન્ટ સાબિત થયો. શરૂઆતમાં વેસ્ટ ઇન્ડીઝના ઓપનિંગ બેટર્સે પાકિસ્તાનની લીડ ખતમ કરી દીધી હતી, પરંતુ ત્યારબાદ સ્પિનર સાજીદ ખાન અને અલી ઉસ્માને સતત વિકેટો લઈને મેચનો રુખ પાકિસ્તાન તરફ વાળી દીધો. સાજિદ ખાને તેજનરાયણ ચંદ્રપોલને LBW આઉટ કરીને પ્રથમ સફળતા અપાવી. ત્યારબાદ તેણે શાઈ હોપ અને નાઈટવોચમેન જેડન સીલ્સને પણ પેવેલિયન મોકલ્યા. જ્યારે અલી ઉસ્માને દિવસની છેલ્લી બોલ પર રોસ્ટન ચેઝનો પોતાની જ બોલ પર કેચ પકડીને વેસ્ટ ઇન્ડીઝને છઠ્ઠો ઝટકો આપ્યો. હવે વેસ્ટ ઇન્ડીઝની માત્ર ચાર વિકેટ બાકી છે. આવી સ્થિતિમાં, તેના માટે પાકિસ્તાન સામે પડકારજનક લક્ષ્ય રાખવું સરળ નહીં હોય. શફીકના 150 રનથી પાકિસ્તાનને મળી લીડ આ પહેલા પાકિસ્તાનની પહેલી ઇનિંગ્સ 387 રન પર સમેટાઈ ગઈ. ઓપનર બેટર અબ્દુલ્લા શફીકે શાનદાર 150 રન બનાવ્યા અને ટીમને પ્રથમ ઇનિંગ્સમાં 43 રનની મહત્વપૂર્ણ લીડ અપાવી. જોકે, ત્રીજા દિવસના પહેલા સત્રમાં પાકિસ્તાને ઝડપથી વિકેટો ગુમાવી દીધી. બાબર આઝમ 88 રન પર રન આઉટ થયો. ત્યારબાદ ડેબ્યૂ કરી રહેલો અઝાન ઝફર ખાતું ખોલ્યા વિના આઉટ થયો, જ્યારે સલમાન આગા પણ શૂન્ય રન પર પેવેલિયન પાછો ફર્યો. પાકિસ્તાને 5 રનની અંદર 3 મહત્વની વિકેટો ગુમાવી દીધી. ત્યારબાદ મોહમ્મદ રિઝવાન (22 રન) અને સાજિદ ખાને (20 રન) ઉપયોગી ઇનિંગ્સ રમીને ટીમની લીડ 43 રન સુધી પહોંચાડી. વોરીકને 6 વિકેટ લીધી વેસ્ટ ઇન્ડીઝ તરફથી ડાબા હાથના સ્પિનર જોમેલ વોરિકન સૌથી સફળ બોલર રહ્યા. તેમણે 42 રન આપીને 6 વિકેટ લીધી. વોરિકને ઉબૈદ શાહ અને મોહમ્મદ અલીને સતત બોલ પર આઉટ કર્યા, જોકે તે હેટ્રિક ચૂકી ગયો. તેની શાનદાર બોલિંગને કારણે જ વેસ્ટ ઇન્ડીઝ પાકિસ્તાનને પ્રથમ ઇનિંગ્સમાં મોટી લીડ લેતા રોકી શક્યું.