ભારતીય વિકેટકીપર બેટર જીતેશ શર્માએ કહ્યું કે T20 વર્લ્ડ કપની ભારતીય ટીમમાં જગ્યા ન મળવાથી તેને નિરાશા ચોક્કસ થઈ હતી, પરંતુ થોડા જ સમય પછી તેના જીવનમાં એવું વ્યક્તિગત દુઃખ આવ્યું જેણે તેની વિચારસરણી સંપૂર્ણપણે બદલી નાખી. જીતેશના પિતા મોહન શર્માનું 1 ફેબ્રુઆરીએ નાની બીમારી બાદ નિધન થયું. તેણે જણાવ્યું કે તે સમયે તે સાત દિવસ સુધી પોતાના પિતા સાથે રહ્યો અને તે દરમિયાન તેને અહેસાસ થયો કે પરિવાર તેના માટે વર્લ્ડ (દુનિયા) કરતાં પણ વધુ મહત્વપૂર્ણ હતો. સમાચાર એજન્સી પીટીઆઈ (PTI)ને આપેલા એક ઇન્ટરવ્યૂમાં જીતેશે પોતાની કારકિર્દીના ઉતાર-ચઢાવ અને અંગત જીવન પર ખુલીને વાત કરી. જીતેશે કહ્યું- વર્લ્ડ કપ કરતાં વધુ મારા પિતાને મારી જરૂર હતી વર્લ્ડ કપ ટીમમાંથી બહાર થવાના અનુભવ પર જીતેશે કહ્યું, ‘જ્યારે મને ખબર પડી કે મારું સિલેક્શન થયું નથી, તો હું થોડો નિરાશ હતો. છેવટે હું પણ એક માણસ છું અને ખરાબ લાગવું સ્વાભાવિક છે.’ પરંતુ થોડા સમય પછી મારા પિતા બીમાર પડ્યા અને 1 ફેબ્રુઆરીએ તેમનું અવસાન થયું. હું તેમના છેલ્લા સાત દિવસોમાં તેમની સાથે હતો. ત્યારે મને અહેસાસ થયો કે મારા પિતાને વર્લ્ડ કપ કરતાં મારી વધુ જરૂર હતી. તે પછી મારા મનમાં ટીમમાંથી બહાર થવાનો કોઈ દુઃખ નહોતો રહ્યો.’ ઘરના મોટા દીકરાની જવાબદારી, પરિવાર સામે નબળો ન પડી શકે પિતાના અવસાન પછી જીતેશ હવે પોતાના પરિવારમાં સૌથી મોટા દીકરાની ભૂમિકા ભજવી રહ્યા છે. તેણે કહ્યું, ‘જ્યારે તમે તમારા પિતાને ગુમાવો છો, ત્યારે તમને સમજાય છે કે હવે પરિવારના નિર્ણયો લેવાની જવાબદારી તમારી છે. મારે મારી માતા અને ભાઈનું ધ્યાન રાખવાનું છે. હું તેમની સામે મારી ભાવનાઓ વ્યક્ત કરી શકતો નથી અને ન તો નબળો દેખાઈ શકું છું, કારણ કે જ્યારે હું ક્રિકેટ રમું છું ત્યારે તેઓ મને જ જોઈ રહ્યા હોય છે.’ ક્રિકેટે શીખવી મજબૂતી જીતેશનું કહેવું છે કે ક્રિકેટે તેમને આ દુઃખ સાથે આગળ વધવાનું શીખવ્યું છે. તેણે કહ્યું, ‘જો મારા પિતા આજે જીવતા હોત તો તે મને એમ જ કહેત કે જા અને અભ્યાસ કર, મારા વિશે ચિંતા ન કર. એટલે જ્યારે પણ હું દુઃખી થાઉં છું, ત્યારે એમ જ વિચારું છું કે તે મને રમવા અને આગળ વધવાની સલાહ આપત.’ રિંકુ સિંહ પાસેથી લીધી પ્રેરણા જીતેશે પોતાના સાથી ખેલાડી રિંકુ સિંહનો ઉલ્લેખ કરતા કહ્યું કે અંગત મુશ્કેલીઓ પછી મેદાન પર પરત ફરવું એ ખૂબ મોટી વાત હોય છે. વિરાટ કોહલી પાસેથી મળે છે પ્રેરણા જીતેશે જણાવ્યું કે IPLમાં રોયલ ચેલેન્જર્સ બેંગલુરુ સાથે રહેતા તેને વિરાટ કોહલીને નજીકથી જોવાનો મોકો મળે છે, જેનાથી તેમને ઘણી પ્રેરણા મળે છે. તેણે કહ્યું કે કોહલીની તૈયારી, અનુશાસન અને ઊર્જામાંથી ઘણું શીખવા મળે છે. માત્ર નાની-નાની વસ્તુઓ જોઈને પણ ઘણું શીખી શકાય છે. જે રીતે વિરાટ પોતાનો દિવસ શરૂ કરે છે અને તૈયારી કરે છે, તે ખૂબ પ્રેરણાદાયક છે. જોકે, 32 વર્ષની ઉંમરે પણ હું તેમની ઊર્જાની બરાબરી કરી શકતો નથી. ત્રણ વિકેટકીપર પણ સાથે રમી શકે છે ટીમ કોમ્બિનેશન પર વાત કરતા જીતેશે કહ્યું કે તે કોઈપણ ભૂમિકામાં રમવા માટે તૈયાર છે. તેણે કહ્યું કે જો ટીમના હિતમાં હોય તો એકસાથે ત્રણ વિકેટકીપર પણ રમી શકે છે. બે વિકેટકીપર પોતાની ભૂમિકા ભજવે અને ત્રીજો ફિનિશરની ભૂમિકામાં રમે. ટીમમાં સંજુ સેમસન અને ઈશાન કિશન પણ વિકેટકીપર-બેટર તરીકે વિકલ્પ છે.