એક્ટર શાહિદ કપૂરે તેની આગામી વેબ સિરીઝ ‘ફર્ઝી 2’ અને ફિલ્મ ‘કોકટેલ 2’ વિશે મોટું અપડેટ આપ્યું છે. તાજેતરમાં દિવ્ય ભાસ્કરને આપેલા ઇન્ટરવ્યુમાં શાહિદે બંને પ્રોજેક્ટ્સ વિશે વાત કરી. શાહિદ કપૂરે જણાવ્યું કે- ‘ફર્ઝી 2’નું શૂટિંગ માર્ચ 2026થી શરૂ થશે. તાજેતરમાં તેની મુલાકાત ડિરેક્ટર રાજ અને ડીકે સાથે થઈ હતી, જ્યાં સિરીઝની આગામી સીઝન વિશે ચર્ચા થઈ. શાહિદના મતે, પ્રથમ સીઝનનો અંત ખૂબ જ નાટકીય વળાંક પર થયો હતો, જેના પછી વાર્તાને આગળ વધારવાની ઘણી સંભાવનાઓ છે. તેણે કહ્યું કે આ સીઝન એક એક્ટર તરીકે તેના માટે વધુ પડકારજનક બનવાની છે, કારણ કે તેના પાત્રનો વિકાસ ઘણો વધી ગયો છે. શાહિદે એમ પણ કહ્યું કે રાજ અને ડીકે સાથે કામ કરવું હંમેશા એક શાનદાર અનુભવ હોય છે અને તેમણે પહેલી સીઝનમાં પણ શાનદાર કામ કર્યું હતું. ‘ફર્ઝી 2’માં ફરી એકવાર શાહિદ કપૂર, વિજય સેતુપતિ, કેકે મેનન અને રાશિ ખન્ના જોવા મળશે. આ સિરીઝને 2026 ના બીજા ભાગમાં એમેઝોન પ્રાઇમ વીડિયો પર રિલીઝ કરી શકાય છે. ‘કોકટેલ 2’નું શૂટિંગ છેલ્લા તબક્કામાં છે: શાહિદ તેમજ, કોકટેલ 2 વિશે શાહિદે જણાવ્યું કે ફિલ્મનું શૂટિંગ અંતિમ તબક્કામાં છે અને તેને આ મહિનાના અંત સુધીમાં પૂર્ણ કરી લેવામાં આવશે. તેણે કહ્યું કે ડિરેક્ટર હોમી અદજાનિયા સાથે કામ કરવું તેમના માટે ખૂબ જ મનોરંજક રહ્યું. ફિલ્મમાં તે પહેલીવાર રશ્મિકા મંદાના સાથે કામ કરી રહ્યો છે, જ્યારે ક્રિતી સેનન સાથે તેની પહેલેથી જ સારી કેમેસ્ટ્રી છે. શાહિદે કહ્યું કે ‘કોકટેલ 2’ એક નવી સ્ટોરી છે, જેમાં નવા પાત્રો અને મજબૂત સંગીત હશે. આ ફિલ્મ સપ્ટેમ્બર 2026માં સિનેમાઘરોમાં રિલીઝ થશે.