ડિજિટલ યુગમાં જેટલી સુવિધા વધી છે, એટલું જ જોખમ પણ વધ્યું છે. નકલી લિંક્સ, આકર્ષક ઓફર્સ અને શંકાસ્પદ ફાઇલો મોકલીને સાયબર ઠગો મિનિટોમાં તમારું બેંક ખાતું સાફ કરી શકે છે. પરંતુ, શું તમે જાણો છો કે છેતરપિંડી થયા પછી પણ તમારા પૈસા સુરક્ષિત રીતે પાછા મેળવી શકાય છે? તાજેતરમાં નોઈડામાં બનેલી એક ઘટનાએ સાબિત કર્યું છે કે સમયસર લેવાયેલા પગલાં લાખોનું નુકસાન અટકાવી શકે છે.

શું હતી ઘટના?

નોઈડાના સેક્ટર 58માં રહેતા એક વ્યક્તિને મોબાઇલ પર ઇન્વોઇસના નામે એક APK ફાઈલ મળી હતી. જેવી તેણે આ ફાઈલ ડાઉનલોડ કરી, તેના ખાતામાંથી ₹3.17 લાખ ઉપડી ગયા. ગભરાવાને બદલે, તે વ્યક્તિએ તુરંત જ 1930 હેલ્પલાઇન પર ફોન કર્યો અને સાયબર ક્રાઈમ પોર્ટલ પર ફરિયાદ નોંધાવી. પરિણામે, પોલીસે સમયસર કાર્યવાહી કરીને ઠગના ખાતાને ફ્રીઝ કરી દીધું અને પીડિતને તેની પૂરેપૂરી રકમ પાછી મળી.

‘ગોલ્ડન અવર’ નું મહત્વ

સાયબર ક્રાઈમની દુનિયામાં છેતરપિંડી થયા પછીની પ્રથમ 1 થી 2 કલાકને ‘ગોલ્ડન અવર’ કહેવામાં આવે છે. જો તમે આ સમયગાળામાં ફરિયાદ નોંધાવો છો, તો બેંક અને પોલીસ તે રકમને બીજા ખાતામાં ટ્રાન્સફર થતી અટકાવી શકે છે. જેટલો વિલંબ થશે, પૈસા પાછા મેળવવા એટલા જ મુશ્કેલ બનશે.

બચવા માટે શું કરવું?

તાત્કાલિક પગલાં: છેતરપિંડી થાય તો સૌ પ્રથમ બેંકને જાણ કરો અને 1930 પર કોલ કરો.

ઓનલાઈન રિપોર્ટિંગ: www.cybercrime.gov.in પર ટ્રાન્ઝેક્શન આઈડી સાથે ફરિયાદ નોંધાવો.

સાવચેતી: અજાણી લિંક્સ કે સોશિયલ મીડિયા પર આવતી શંકાસ્પદ APK ફાઇલો ક્યારેય ડાઉનલોડ ન કરો.

સુરક્ષા: તમારા ખાતામાં Two-Factor Authentication અને SMS એલર્ટ હંમેશા ચાલુ રાખો.

યાદ રાખો, બેંક ક્યારેય તમારી પાસે પર્સનલ વિગતો કે OTP માંગતી નથી. તમારી સતર્કતા જ તમારી મહેનતની કમાણીને સુરક્ષિત રાખી શકે છે.

આ પણ વાંચોઃ Happy Birthday Ahmedabad: મારો ઇતિહાસ જ મારી ઓળખ, હું છું આપ સૌનું વહાલું અમદાવાદ