થાઈલેન્ડની રાજધાની બેંગકોકમાં રવિવારે મોડી રાત્રે એક બારમાં આગ લાગવાથી 27 લોકોના મોત થયા હતા, જ્યારે 63 લોકો ઘાયલ થયા હતા. થાઈ અધિકારીઓના જણાવ્યા અનુસાર, આગ લાગવાનું કારણ વીજળીના સિસ્ટમમાં ખામી હોઈ શકે છે. તમામ ઘાયલોની હોસ્પિટલમાં સારવાર ચાલી રહી છે. આગ લાગવાના કારણની તપાસ હજુ ચાલુ છે. ફાયર બ્રિગેડ વિભાગે જણાવ્યું કે તેમને રાત્રે 12 વાગ્યે આગ લાગવાની જાણ થઈ હતી. લગભગ 30 મિનિટની જહેમત બાદ આગ પર કાબૂ મેળવી લેવામાં આવ્યો હતો, પરંતુ ત્યાં સુધીમાં ઇમારતનો મોટો ભાગ બળી ગયો હતો. ઘટનાસ્થળે હાજર એક સંગીતકારે જણાવ્યું કે વીજળી જવાથી થોડા સમય પહેલા સ્ટેજ પાસે લાગેલા સર્કિટ બ્રેકરમાંથી ધુમાડો નીકળતો દેખાયો હતો. ત્યારબાદ એક ધડાકાનો અવાજ આવ્યો અને જોતજોતામાં આખા પબમાં ધુમાડો ભરાઈ ગયો. તેમણે જણાવ્યું કે ઘણા લોકો જીવ બચાવવા માટે ઇમારતના પાછળના ભાગમાં આવેલા ટોયલેટમાં ઘૂસી ગયા હતા, જ્યાં શ્વાસ રૂંધાવાથી તેમનું મોત થયું હતું. થાઈલેન્ડના વડાપ્રધાન અનુતિન ચાર્નવીરાકુલે ઘટનાસ્થળની મુલાકાત લીધી હતી. તેમણે કહ્યું કે તમામ મૃતદેહો મળી આવ્યા છે. બારમાં લાગેલી આગ સંબંધિત 5 તસવીરો… આગ પર અડધા કલાકમાં કાબૂ મેળવાયો, પરંતુ ત્યાં સુધીમાં મોટું નુકસાન થઈ ચૂક્યું હતું રિપોર્ટ્સ અનુસાર, ફાયર ફાઈટરોએ લગભગ અડધા કલાકમાં આગ પર કાબૂ મેળવી લીધો હતો, પરંતુ ત્યાં સુધીમાં મોટું નુકસાન થઈ ચૂક્યું હતું. આ બાર બેંગકોકના ચાતુચક જિલ્લામાં આવેલો છે. સ્થાનિક સ્તરે તેને રોંગ બીયર ના લાટ ફ્રાઓ નામથી ઓળખવામાં આવે છે. તે વિસ્તારનું લોકપ્રિય રેસ્ટોરન્ટ અને મનોરંજન સ્થળ માનવામાં આવે છે. આગ ઓલવાયા પછીની તસવીરોમાં બારની બહાર મોટી સંખ્યામાં બોડી બેગ્સ રાખેલા જોવા મળ્યા. સમગ્ર વિસ્તારને પોલીસે ઘેરી લીધો હતો. અંદરનું ફર્નિચર, દિવાલો અને છત સંપૂર્ણપણે કાળી પડી ગઈ હતી. છતના કેટલાક ભાગો પણ ઉખડી ગયા હતા. ગવર્નરે કહ્યું- સજાવટથી ઝડપથી ફેલાઈ આગ બેંગકોકના ગવર્નર ચાચાર્ટ સિત્તિપુન્ત પણ ઘટનાસ્થળે પહોંચ્યા. તેમણે કહ્યું કે બારની અંદર લાગેલી જ્વલનશીલ સુશોભન સામગ્રીને કારણે આગ ખૂબ જ ઝડપથી ફેલાઈ ગઈ. જોકે, આગ લાગવાનું સાચું કારણ હજુ સ્પષ્ટ નથી અને તપાસ ચાલુ છે. આ દુર્ઘટના તાજેતરના વર્ષોમાં થાઈલેન્ડના સૌથી મોટા પબ અગ્નિકાંડ પૈકી એક છે. 2022માં એક મ્યુઝિક પબમાં આગ લાગવાથી 14 લોકોના મોત થયા હતા. જ્યારે, 2009માં બેંગકોકના સેન્ટિકા નાઈટક્લબમાં આતિશબાજી દરમિયાન લાગેલી આગમાં 66 લોકોના જીવ ગયા હતા અને 200થી વધુ લોકો ઘાયલ થયા હતા.