2022 વર્લ્ડ કપના ક્વાર્ટર ફાઈનલ પછી ફ્રાન્સ અને ઇંગ્લેન્ડ ફરી એકવાર ફૂટબોલ વર્લ્ડ કપની નોકઆઉટ મેચમાં આમને-સામને થશે. જોકે, બંને ટીમ વચ્ચે ત્રીજા સ્થાન (બ્રોન્ઝ મેડલ) માટે આ પ્રથમ ટક્કર હશે. મિયામીના હાર્ડ રોક સ્ટેડિયમમાં શનિવારે મોડી રાત્રે 2:30 વાગ્યાથી મેચ રમાશે. ફ્રાન્સ ત્રીજી વખત વર્લ્ડ કપનો બ્રોન્ઝ મેડલ જીતવા મેદાનમાં ઉતરશે. ટીમ આ પહેલા 1958 અને 1986માં ત્રીજા સ્થાને રહી હતી. બીજી તરફ, ઇંગ્લેન્ડ પાસે પ્રથમ વખત વર્લ્ડ કપમાં ત્રીજું સ્થાન હાંસલ કરવાની તક હશે. ફ્રાન્સના કોચ દિદિએર ડેશાંની આ છેલ્લી મેચ હશે. આર્જેન્ટિનાના લિયોનેલ મેસ્સી 8 ગોલ અને 4 આસિસ્ટ સાથે ગોલ્ડન બૂટમાં સૌથી આગળ છે. ફ્રાન્સના કિલિયન એમ્બાપ્પે પણ 8 ગોલ કરી ચૂક્યો છે, જ્યારે ઇંગ્લેન્ડના હેરી કેન અને જુડ બેલિંગહામના નામે 6-6 ગોલ છે. આવી સ્થિતિમાં, ત્રણેય ખેલાડીઓ પાસે મેસ્સીને પાછળ છોડવાની છેલ્લી તક હશે. બંને ટીમ વચ્ચે અત્યાર સુધીમાં 32 મેચ રમાઈ છે. જેમાં ઈંગ્લેન્ડે 17, જ્યારે ફ્રાન્સે 10 મેચ જીતી છે અને 5 મેચ ડ્રો રહી છે. ફિફા વર્લ્ડ કપમાં બંને ટીમ ચોથી વખત આમને-સામને થશે. આ પહેલા 1966 અને 1982ના ગ્રુપ સ્ટેજમાં ઇંગ્લેન્ડે જીત નોંધાવી હતી, જ્યારે 2022ના ક્વાર્ટર ફાઈનલમાં ફ્રાન્સે ઇંગ્લેન્ડને 2-1થી હરાવીને સેમિફાઈનલમાં સ્થાન બનાવ્યું હતું. ફ્રાન્સ સતત ત્રીજો વર્લ્ડ કપ ફાઈનલ રમી શક્યું નહીં ફ્રાન્સે આ વર્લ્ડ કપના ગ્રુપ સ્ટેજમાં સેનેગલ, ઇરાક અને નોર્વેને હરાવ્યા. ત્યારબાદ નોકઆઉટમાં સ્વીડન, પરાગ્વે અને મોરોક્કોને હરાવીને સતત ત્રીજી વખત સેમિફાઈનલમાં સ્થાન બનાવ્યું. જોકે, સ્પેન સામે મિડફિલ્ડની લડાઈ હારી જવાને કારણે 0-2થી હારનો સામનો કરવો પડ્યો અને સતત ત્રીજી વર્લ્ડ કપ ફાઈનલ રમવાનું સપનું તૂટી ગયું. ઇંગ્લેન્ડ ફાઈનલથી માત્ર 30 મિનિટ દૂર હતું ઇંગ્લેન્ડે ગ્રુપ સ્ટેજમાં ક્રોએશિયા, ઘાના અને પનામાને પાછળ છોડી નોકઆઉટમાં સ્થાન બનાવ્યું. ત્યારબાદ ડીઆર કોંગો, મેક્સિકો અને નોર્વેને હરાવી સેમિફાઈનલમાં પહોંચ્યું. આર્જેન્ટિના સામે એન્થની ગોર્ડનના ગોલથી લીડ પણ બનાવી, પરંતુ છેલ્લા અડધા કલાકમાં માત્ર 12% બોલ પોઝેશન રાખવાને કારણે મેચ હાથમાંથી નીકળી ગઈ. આર્જેન્ટિના 2-1થી જીતી ગયું. એમ્બાપ્પેનો એટેક vs કેનની ફિનિશિંગ ફ્રાન્સની સૌથી મોટી તાકાત કિલિયન એમ્બાપ્પે અને ઉસ્માન ડેમ્બેલેની જોડી છે. એમ્બાપ્પે આ ટુર્નામેન્ટમાં 8 અને ડેમ્બેલે 5 ગોલ કરી ચૂક્યા છે. બીજી તરફ ઇંગ્લેન્ડ માટે હેરી કેન અને જુડ બેલિંગહામ પર નજર રહેશે. કેન 14 વર્લ્ડ કપ ગોલ સાથે રોનાલ્ડોની બરાબરીથી માત્ર એક ગોલ દૂર છે, જ્યારે બેલિંગહામે આ વર્લ્ડ કપમાં 6 ગોલ કર્યા છે. બન્ને ટીમની સંભવિત સ્ટાર્ટિંગ-11 ફ્રાન્સ: માઈક મેગ્નન (ગોલકીપર), જુલ્સ કૌન્ડે, દાયો ઉપામેકાનો, વિલિયમ સલીબા, થિયો હર્નાન્ડેઝ, ઓરેલિયન ચુઆમેની, એડ્રિયન રેબિયો, ઉસ્માન ડેમ્બેલે, માઈકલ ઓલિસે, બ્રેડલી બારકોલા, કિલિયન એમ્બાપ્પે. ઇંગ્લેન્ડ: જોર્ડન પિકફોર્ડ (ગોલકીપર), કાઈલ વોકર, માર્ક ગુએહી, લેવી કોલવિલ, લ્યુક શો, ડેક્લાન રાઈસ, કોબી મેનુ, બુકાયો સાકા, જુડ બેલિંગહામ, એન્થોની ગોર્ડન, હેરી કેન.