રિલાયન્સ ઇન્ડસ્ટ્રીઝના ચેરમેન મુકેશ અંબાણી અને દુનિયાની સૌથી મોટી એસેટ મેનેજમેન્ટ કંપની ‘બ્લેક રોક’ના CEO લેરી ફિન્ક વચ્ચે આજે એટલે કે 4 ફેબ્રુઆરીએ ખાસ વાતચીત થઈ. આ દરમિયાન મુકેશ અંબાણીએ ભારતીય અર્થતંત્ર અને નવી ટેકનોલોજીને લઈને મોટો વિશ્વાસ વ્યક્ત કર્યો. અંબાણીએ કહ્યું કે ભારત ટેકનોલોજીને દુનિયાના કોઈપણ બીજા દેશ કરતાં વધુ સારી રીતે અપનાવે છે, તેથી આપણને આર્ટિફિશિયલ ઇન્ટેલિજન્સ (AI)થી ડરવાની જરૂર નથી. જ્યારે લેરી ફિન્કે ભારતના યુવાનોને પોતાના દેશ પર વિશ્વાસ રાખવા અને તેની સાથે આગળ વધવાની સલાહ આપી. બેંકમાં પડેલા પૈસા નહીં, બજારમાં રોકેલા પૈસા વધે છે
મુકેશ અંબાણીએ ભારતીયોને રોકાણનો મંત્ર આપતા કહ્યું કે દરેક નાગરિકને ‘કમ્પાઉન્ડિંગ’ (નફા પર નફો)ની તાકાતનો ફાયદો મળવો જોઈએ. તેમણે કહ્યું કે બેંક ખાતામાં સાદા વ્યાજ પર પડેલા પૈસા કમ્પાઉન્ડિંગ નથી. શેરબજારમાં રોકેલા પૈસા જ અસલી કમ્પાઉન્ડિંગ છે. AIથી ડરશો નહીં, તે નોકરીઓની નવી તકો ઊભી કરશે
આર્ટિફિશિયલ ઇન્ટેલિજન્સ (AI) પર ચર્ચા કરતા અંબાણીએ કહ્યું કે ભારત ટેકનોલોજીને અન્ય કરતા વધુ સારી રીતે અપનાવે છે, તેથી આપણે AIથી ડરવાની જરૂર નથી. જ્યારે લેરી ફિન્કે કહ્યું કે ભારતની મોટી વસતિ માટે AI વિકાસનું એન્જિન બનશે. તે જૂની નોકરીઓને બદલશે અને નવી રોજગારીની તકો ઊભી કરશે. ભારત ઘણા વિકસિત દેશોની સરખામણીમાં ટેકનોલોજી અપનાવવામાં આગળ છે. આગામી 10 વર્ષ સુધી ભારત 8%થી 10%ના દરે વૃદ્ધિ કરશે
લેરી ફિન્કે કહ્યું કે આગામી 10 વર્ષ સુધી ભારત 8%થી 10%ના વૃદ્ધિ દરથી વધશે. જ્યારે મુકેશ અંબાણીએ કહ્યું કે આગામી દાયકા સુધીમાં ભારત ઉર્જાના ક્ષેત્રમાં આત્મનિર્ભર બની જશે. ભારતમાં 100 નવી ‘રિલાયન્સ’નો જન્મ થશે
મુકેશ અંબાણીએ ભારતીય સ્ટાર્ટઅપ ઇકોસિસ્ટમ પર ખુશી વ્યક્ત કરતા કહ્યું કે આવનારા સમયમાં તેઓ દેશમાં 100 નવી રિલાયન્સ જેવી કંપનીઓ બનતી જોઈ રહ્યા છે. તેમણે કહ્યું કે ભારતની અર્થવ્યવસ્થાનું વૃક્ષ હવે ફળ આપવા લાગ્યું છે. આપણી નીતિઓ સ્થિર અને ટકાઉ રહી છે, જેનો ફાયદો હવે દેખાઈ રહ્યો છે. મ્યુચ્યુઅલ ફંડ ઇન્ડસ્ટ્રી વધુ મોટી થવી જોઈએ
જિયો-બ્લેકરોક પાર્ટનરશિપ પર મુકેશ અંબાણીએ કહ્યું કે ભારતીયોએ દાયકાઓથી બચત કરી છે, પરંતુ તે બચત ‘પ્રોડક્ટિવ’ રહી નથી. જિયો-બ્લેકરોકનો હેતુ આ બચતને કમાણીમાં બદલવાનો છે.બ્લેકરોકના COO રોબ ગોલ્ડસ્ટીને કહ્યું કે ભારતની મ્યુચ્યુઅલ ફંડ ઇન્ડસ્ટ્રી હાલમાં 1 ટ્રિલિયન ડોલર (લગભગ ₹90 લાખ કરોડ)થી ઓછી છે, તે ઘણી મોટી થવી જોઈએ. મ્યુચ્યુઅલ ફંડ ઇન્ડસ્ટ્રી 5 વર્ષમાં બમણી થશે
જિયો ફાઇનાન્સિયલ સર્વિસિસના ચેરમેન કે.વી. કામથે પણ આ ચર્ચામાં ભાગ લીધો હતો. તેમણે આશા વ્યક્ત કરી કે આગામી પાંચ વર્ષમાં ભારતમાં મ્યુચ્યુઅલ ફંડનું રોકાણ બમણાથી પણ વધુ થઈ જશે. કામથે કહ્યું કે, લોકો હવે બચતમાંથી બહાર નીકળીને રોકાણ તરફ આગળ વધી રહ્યા છે અને ભારત હવે ટેકનોલોજી સાથે પ્રયોગ કરવા માટે સંપૂર્ણપણે તૈયાર છે.