દુબઈથી તેલ અવીવ જઈ રહેલી ફ્લાયદુબઈની ફ્લાઇટમાં ભારતીય પાઇલટ કેપ્ટન સ્મિત મચ્છર પર હુમલો કરનાર કો-પાઇલટની ઓળખ હમામ અલ હમામી તરીકે થઈ છે. તે ઓમાનનો રહેવાસી છે. અલ અરેબિયા ઇંગ્લિશએ સૂત્રોને ટાંકીને જણાવ્યું કે આરોપી લાંબા સમય સુધી સીરિયામાં રહ્યો હતો. સીએનએનની રિપોર્ટ અનુસાર, અલ હમામી કટ્ટરપંથી વિચારધારા ધરાવતો હતો. તેની વિચારસરણીને કારણે તેને ગયા વર્ષે ઓમાનની રાષ્ટ્રીય એરલાઇનમાં પાઇલટ તાલીમમાંથી હટાવી દેવામાં આવ્યો હતો. બાદમાં તેને એરલાઇનમાં બીજી નોકરી આપવામાં આવી હતી. તે અગાઉ રોયલ એર મેરોક સાથે પણ કામ કરી ચૂક્યો હતો. રિપોર્ટ અનુસાર, ફ્લાયદુબઈમાં તેને કામ કરતા લગભગ 8 મહિના થયા હતા. અલ હમામીનો જન્મ યુએઈમાં થયો હતો. તેના પિતા ઓમાની અને માતા સીરિયન છે. તેણે પોતાના જીવનનાં કેટલાંક વર્ષો યુએઈમાં પણ વિતાવ્યાં હતાં. આરોપીએ 30 સપ્ટેમ્બરે ફ્લાયદુબઈની ફ્લાઇટમાં કેપ્ટન મચ્છર પર છરીથી હુમલો કર્યો હતો. દાવાઓ અનુસાર તે વિમાનને ક્રેશ કરાવવા માગતો હતો. વિમાન ઝડપથી નીચે પડવા લાગ્યું. જોકે ઘાયલ કેપ્ટને તેની સામે લડતાં કોકપિટનો દરવાજો ખોલ્યો, ત્યારબાદ મુસાફરો અને ક્રૂ સભ્યો અંદર પહોંચીને કો-પાઇલટને પકડી લીધો. ત્યારબાદ સાઉદી અરેબિયામાં વિમાનનું લેન્ડિંગ થયું. આરોપી પાસેથી પેલેસ્ટાઇન સમર્થક સામગ્રી મળી હોવાનો દાવો આઈ24 ન્યૂઝે એક સૂત્રને ટાંકીને દાવો કર્યો કે અલ હમામી પાસેથી ‘ફ્રી પેલેસ્ટાઇન’ જૂથોનાં પત્રિકાઓ અને અન્ય પેલેસ્ટાઇન સમર્થક સામાન મળ્યો હતો. રિપોર્ટ મુજબ, તે પેલેસ્ટિનિયનોના સમર્થન અને ઇઝરાઇલના વિરોધની વાત કરતો હતો. તપાસ એજન્સીઓ આ દાવાઓને તેના કટ્ટરપંથ અને સંભવિત આતંકવાદી હેતુની તપાસના ભાગરૂપે જોઈ રહી છે. જોકે, હુમલાના હેતુ અને કોઈ સંગઠન સાથે તેના સંબંધોની તપાસ હજુ ચાલુ છે. યુએઈના એટર્ની જનરલે ઘટનાના પાછળની આતંકવાદી પ્રવૃત્તિ અથવા કોઈ પૂર્વયોજનાસાથેના સંબંધની તપાસના આદેશ આપ્યા છે. ઓમાની પાઇલટને તેલ અવીવની ફ્લાઇટમાં ડ્યૂટી કેવી રીતે મળી, તેની તપાસ થશે ઓમાન અને ઇઝરાઇલ વચ્ચે રાજદ્વારી સંબંધો નથી. આવી સ્થિતિમાં એ પ્રશ્ન પણ ઊભો થઈ રહ્યો છે કે ઓમાનના નાગરિક અલ હમામીને તેલ અવીવ જતી ફ્લાયદુબઈની ફ્લાઇટમાં કો-પાઇલટ તરીકેની ડ્યૂટી કેવી રીતે મળી. સીએનએન મુજબ, ઇઝરાઇલની શિન બેટ, મોસાદ, સેના અને પરિવહન મંત્રાલય સહિતની અનેક એજન્સીઓ તેની તપાસ કરી રહી છે. તેઓ એ જાણવા માટે તપાસ કરી રહી છે કે અલ હમામીને આ રૂટ પર ઉડાન ભરવાની મંજૂરી કઈ પ્રક્રિયા હેઠળ આપવામાં આવી હતી. ઘટના બાદ સાઉદી અરેબિયામાં વિમાનનું ઇમર્જન્સી લેન્ડિંગ કરવામાં આવ્યું. ત્યારબાદ અલ હમામીને યુએઈ મોકલી દેવામાં આવ્યો, જ્યાં તેની સામે આતંકવાદ સાથે જોડાયેલા મામલાની તપાસ ચાલી રહી છે. વિમાનમાં 174 લોકો સવાર હતા, એક મિનિટમાં 17,000 ફૂટ નીચે આવ્યું ઘટનાના દિવસે ફ્લાયદુબઈની ફ્લાઇટમાં 174 લોકો સવાર હતા, જેમાં મોટાભાગના ઇઝરાયેલી મુસાફરો હતા. વિમાનમાં ભારત અને યુએઈના નાગરિકો પણ હાજર હતા. અમેરિકી વિદેશ વિભાગ અનુસાર, ચાર મુસાફરો અમેરિકી નાગરિક હતા. ઉડાન ભર્યાના લગભગ અઢી કલાક બાદ કો-પાઇલોટે ભારતીય કેપ્ટન સ્મિત મચ્છર પર હુમલો કર્યો હતો. બંને વચ્ચે પહેલાં હાથાપાઈ થઈ હતી. ત્યારબાદ આરોપીએ છરી વડે હુમલો કર્યો. આ દરમિયાન વિમાન અચાનક ઝડપથી નીચે જવા લાગ્યું. ફ્લાઇટરડાર24 અનુસાર, વિમાન લગભગ એક મિનિટમાં 33,000 ફૂટથી 17,000 ફૂટ સુધી નીચે આવી ગયું. UAEની હોસ્પિટલમાં દાખલ છે કેપ્ટન સ્મિત કેપ્ટન સ્મિત હાલમાં UAEની હોસ્પિટલમાં દાખલ છે. તેમને સાઉદી અરેબિયાથી એરલિફ્ટ કરીને અબુ ધાબી લઈ જવામાં આવ્યા છે. UAEમાં ભારતના રાજદૂત દીપક મિત્તલે હોસ્પિટલમાં કેપ્ટન સ્મિત અને તેમના પરિવારજનો સાથે મુલાકાત કરી હતી. મિત્તલે જણાવ્યું કે કેપ્ટનને સારી સારવાર મળી રહી છે અને ભારતીય દૂતાવાસ ત્યાંના અધિકારીઓના સતત સંપર્કમાં છે. રાજદૂતે કેપ્ટન સ્મિતને ભારતના બહાદુર પુત્ર ગણાવ્યા. તેમણે કહ્યું કે હવામાં સર્જાયેલી આપાતકાલીન સ્થિતિ દરમિયાન તેમની બહાદુરીથી સેંકડો લોકોના જીવ બચી ગયા અને એક મોટી દુર્ઘટના ટળી ગઈ.