અરુણા ઈરાની ભારતીય સિનેમાનાં સૌથી ચર્ચિત એક્ટ્રેસિસમાંના એક છે. તેમણે પોતાના કરિયરમાં 500થી વધુ ફિલ્મોમાં કામ કર્યું છે. અરુણા પ્રોફેશનલ લાઈફ ઉપરાંત પોતાની પર્સનલ લાઈફને લઈને પણ ઘણા ચર્ચામાં રહે છે. હાલમાં જ તેમણે મહેમૂદ સાથેના પોતાના સંબંધો પર ખૂલીને વાત કરી. ‘મહેમૂદે ખુલ્લેઆમ મારો ફાયદો ઉઠાવ્યો’ હાલમાં જ ‘ઝૂમ’ (એન્ટરટેઇનમેન્ટ વેબસાઇટ)ને આપેલા એક ઇન્ટરવ્યુમાં અરુણા ઈરાનીએ ફિલ્મોમાં કામ કરવાની તક આપવા બદલ મહેમૂદને શ્રેય આપ્યો. તેમણે કહ્યું કે, તેમનો સંબંધ એક પ્રકારના અહેસાન અને મજબૂરીના ભાવથી બન્યો હતો. તેમણે કહ્યું, ‘મહેમૂદજીએ મને સૌથી પહેલા કામ આપ્યું. અમારો સંબંધ એક પ્રકારના અહેસાન અને મજબૂરીના ભાવથી બન્યો અને આ જ કારણ હતું કે આવું થયું. પછીથી મહેમૂદજી તેમના અન્ય પ્રોજેક્ટ્સમાં ચાલ્યા ગયા અને હું અલગ શોમાં વ્યસ્ત થઈ ગઈ. ત્યારે મને એવું લાગવા માંડ્યું કે, તેઓ મારો ખુલ્લેઆમ ફાયદો ઉઠાવી રહ્યા હતા.’ ‘મેં જે કર્યું, તે મજબૂરી અને જરૂરિયાતને કારણે કર્યું, એટલે હું તેમને એકલા દોષી ઠેરવવા માંગતી નથી. હું પણ તેને સમર્થન આપતી રહી. પછીથી ફરી આ સંબંધ પૂરો થઈ ગયો.’ ‘મહેમૂદને ડર હતો કે હું પ્રેગ્નેન્ટ થઈ ગઈ તો ફિલ્મ અટકી જશે’ આ જ ઇન્ટરવ્યુમાં અરુણા ઈરાનીએ મહેમૂદ સાથેના તેમના લગ્નને લઈને લાંબા સમયથી ચાલી આવતી અફવાઓ પર પણ પ્રતિક્રિયા આપી. અરુણાએ કહ્યું, ‘તેમણે કહ્યું હતું કે તેઓ મારી સાથે લગ્ન કરશે, પણ એવું થયું નહીં. પાછળ વળીને જોયું તો, આ મારા માટે સારું જ હતું. તેઓ પહેલાથી જ બે વાર લગ્ન કરી ચૂક્યા હતા અને ત્રીજી વાર પણ કરી શકતા હતા, પણ મને લાગે છે કે, મારું નસીબ સારું હતું. જે થયું તે ખોટું હતું.’ ‘તેઓ લોકોને કહેતા હતા કે તેમણે મારી સાથે લગ્ન કર્યા છે. આ જ કારણે ફિલ્મ નિર્માતાઓએ મને કામ આપવાનું બંધ કરી દીધું. તેમને ડર હતો કે, જો હું ગર્ભવતી થઈશ, તો તેમની ફિલ્મ અટકી શકે છે. આ મારા માટે મોટો આઘાત હતો. જ્યારે આ વાર્તા પૂરી થઈ અને મેં સ્વતંત્ર રીતે કામ કરવાનું શરૂ કર્યું, ત્યારે લોકોને સમજાયું કે અમારા વચ્ચે કંઈ જ નહોતું.’ મહેમૂદ સાથે અફેરની ચર્ચા, કરિયર પર અસર પડી ‘બોમ્બે ટુ ગોવા’ અને ‘કારવાં’ બંને ફિલ્મો હિટ સાબિત થઈ. સામાન્ય રીતે આવી સફળતા પછી દરેક એક્ટ્રેસનું કરિયર ઊંચાઈઓ પર પહોંચે છે, પરંતુ અરુણા સાથે તેનું ઊલટું થયું અને તેમને કામ મળવાનું બંધ થઈ ગયું. તેનું કારણ મહેમૂદ સાથેના તેમના અફેરની ચર્ચાઓ હતી, જેણે તેમના કરિયર પર ખરાબ અસર કરી. ખરેખરમાં, બોમ્બે ટુ ગોવા દરમિયાન અરુણા અને મહેમૂદના અફેરના સમાચાર ફેલાવા લાગ્યા. અહીં સુધી કહેવામાં આવ્યું હતું કે, બંનેએ છૂપી રીતે લગ્ન કરી લીધા છે, જેની અસર અરુણાના ફિલ્મી કરિયર પર પડી અને ઘણા વર્ષો સુધી તેમને કોઈ કામ મળ્યું નહીં.