બોલિવૂડ એક્ટર અનુપમ ખેર તાજેતરમાં મોર્નિંગ વૉક પર નીકળ્યા હતા, જે દરમિયાન તેમનું ક્રેડિટ કાર્ડ પડી ગયું હતું. ઘણી શોધખોળ કરવા છતાં પણ તેમને કાર્ડ ન મળતાં તેઓ પરેશાન થઈ ગયા હતા. બાદમાં એક સિક્યોરિટી ગાર્ડ સંજય યાદવને કાર્ડ મળ્યું, જેમણે ઈમાનદારી દાખવીને રવિવારે કાર્ડ એક્ટર સુધી પાછું પહોંચાડી દીધું. અનુપમ ખેરે સિક્યોરિટી ગાર્ડની ઇમાનદારીને બિરદાવી અનુપમ ખેરે આ સમગ્ર ઘટનાક્રમનો વીડિયો ઇન્સ્ટાગ્રામ પર શેર કર્યો. વીડિયોમાં તેમણે જણાવ્યું કે, મોર્નિંગ વૉક દરમિયાન તેમનું ક્રેડિટ કાર્ડ પડી ગયું હતું અને ઘણી શોધખોળ કર્યા પછી પણ જ્યારે તે ન મળ્યું, ત્યારે તેમને લાગ્યું કે કાર્ડ હંમેશા માટે ખોવાઈ ગયું છે. વીડિયોમાં અનુપમ ખેર કહે છે કે, કાર્ડ પર પિન હોવાને કારણે તેઓ વધુ પરેશાન થઈ ગયા હતા. આ દરમિયાન તેમને દત્તુજીનો ફોન આવ્યો, જેમાં જણાવવામાં આવ્યું કે, કોઈને તેમનું ક્રેડિટ કાર્ડ મળ્યું છે. ત્યારબાદ સિક્યોરિટી ગાર્ડ સંજય યાદવે કોઈ અપેક્ષા વગર કાર્ડ તેમને પરત કરી દીધું. અનુપમ ખેરે વીડિયોમાં સંજય યાદવનું નામ લઈને આભાર માન્યો અને કહ્યું કે, આ પ્રમાણિક કામથી લોકો પર તેમનો વિશ્વાસ ફરી જાગૃત થયો છે. તેમણે તેને ખૂબ જ શાનદાર કામ ગણાવ્યું. વર્ક ફ્રન્ટની વાત કરીએ તો, અનુપમ ખેર છેલ્લે ફિલ્મ ‘તનવી ધ ગ્રેટ’માં જોવા મળ્યા હતા, જેનું ડિરેક્શન પણ તેમણે જ કર્યું હતું. આ ઉપરાંત, તાજેતરમાં અનુપમ ખેરે ફિલ્મ ‘ખોસલા કા ઘોસલા 2’નું શૂટિંગ પૂરું કર્યું છે. આ સિક્વલમાં બોમન ઈરાની, રણવીર શૌરી, તારા શર્મા, કિરણ જુનેજા અને પરવીન ડબાસ પણ જોવા મળશે. વર્ષ 2006માં રિલીઝ થયેલી પહેલી ફિલ્મનું ડિરેક્શન દિબાકર બેનર્જીએ કર્યું હતું, જ્યારે આ સિક્વલનું ડિરેક્શન ઉમેશ બિષ્ટ કરી રહ્યા છે.