વાસ્તુ, નસીબ અને અંધશ્રદ્ધા જેવા વિષયો પર ઘણી વાર ચર્ચા થાય છે, પરંતુ ફિલ્મોમાં તેને હળવાશથી અને મનોરંજક રીતે ઓછું દર્શાવવામાં આવે છે. ‘ઉત્તર દા પુત્તર’ આ જ પ્રયાસ સાથે આવે છે. ફિલ્મ હસાવે છે, કટાક્ષ કરે છે અને અંતે એક એવો પ્રશ્ન છોડી જાય છે, જે કદાચ થિયેટરમાંથી બહાર નીકળ્યા પછી પણ તમારી સાથે રહે છે. જોકે કેટલીક ખામીઓ તેને વધુ સારી બનતા રોકે છે. આ ફિલ્મની લંબાઈ 1 કલાક 43 મિનિટ છે. આ ફિલ્મને દિવ્ય ભાસ્કરે 5 માંથી 3 સ્ટાર રેટિંગ આપ્યું છે. ફિલ્મની વાર્તા કેવી છે? ફિલ્મની વાર્તા ફિઝિક્સના પ્રોફેસર સાઈ રામ ટુટેજા (અન્નૂ કપૂર)ની છે. વિજ્ઞાન ભણાવતા ટુટેજા પોતે વાસ્તુ પર આંખ મીંચીને ભરોસો કરે છે. તેમની જીદ છે કે તેઓ ત્યારે જ પોતાનું ઘર બનાવશે, જ્યારે તેમને ઉત્તર દિશા તરફ મુખ કરતી સંપૂર્ણ જમીન મળે. આ જ કારણે તેઓ વર્ષો સુધી ભાડાના ઘરમાં રહે છે. જ્યારે આખરે તેમને મનપસંદ જમીન મળે છે અને સપનાનું ઘર બનાવવાનો પ્રવાસ શરૂ થાય છે, ત્યારે નસીબ તેમની સામે એક પછી એક મુશ્કેલીઓ ઊભી કરી દે છે. ઇન્ટરવલ પછી વાર્તા રસપ્રદ વળાંક લે છે, જ્યારે ટુટેજા સમજે છે કે જિંદગી ફક્ત દિશાથી નહીં, પરંતુ પોતાના નિર્ણયો અને મહેનતથી બદલાય છે. આ પ્રવાસમાં તેમનો વિદ્યાર્થી જ્ઞાનચંદ ઉર્ફ જીસી (સુમિત ગુલાટી) તેમનો સૌથી મોટો સહારો બને છે. ફિલ્મ કોમેડી અને વ્યંગ્ય દ્વારા વાસ્તુ અને અંધશ્રદ્ધા પર સવાલ પણ ઉઠાવે છે. ઘણી જગ્યાએ તેની ઝલક ‘ખોસલા કા ઘોંસલા’ની યાદ અપાવે છે. સ્ટારકાસ્ટની એક્ટિંગ કેવી છે? અન્નૂ કપૂર આખી ફિલ્મનો જીવ છે. સાઈ રામ ટુટેજાના પાત્રમાં તેમનો અભિનય એટલો સહજ છે કે ઘણીવાર લાગે છે કે આ પાત્ર તેમના માટે જ લખાયું હોય. કોમેડી, ઇમોશન અને ટાઇમિંગ, દરેક જગ્યાએ તેઓ ફિલ્મને પોતાના ખભા પર સંભાળી લે છે. સુમિત ગુલાટી (જ્ઞાનચંદ ઉર્ફે જીસી) બીજા ભાગમાં વાર્તાનો મજબૂત આધાર બને છે અને પોતાના પાત્રમાં ઈમાનદાર દેખાય છે. રૂખસાર રહેમાન (ગિન્ની) સંતુલિત એક્ટિંગ કરે છે. રાજેન્દ્ર સેઠી (આનંદ રાજ આનંદ) ઓછા સ્ક્રીન ટાઇમમાં પણ અસર છોડે છે. બ્રિજેન્દ્ર કાલા, પવન મલ્હોત્રા, ઇશ્તિયાક ખાન અને નિતિન અરોરા જેવા કલાકારો પોતાની હાજરીથી ફિલ્મને વધુ મનોરંજક બનાવે છે. ડિરેક્શન અને ટેકનિકલ પાસું ડિરેક્ટર રવિંદર સિવાચે એક સારા આઈડિયાને મનોરંજક રીતે રજૂ કર્યો છે. ફિલ્મનો મેસેજ સ્પષ્ટ છે અને તે ભાષણ આપ્યા વિના પોતાની વાત કહી જાય છે. જોકે, કેટલાક સીન જરૂરિયાત કરતાં વધુ લાંબા લાગે છે અને જો એડિટિંગ થોડી ટાઈટ હોત તો ફિલ્મની અસર વધુ વધી શકી હોત. કાસ્ટિંગમાં પણ એક વાત ખટકે છે. નાસિર અબ્દુલ્લા, જે ગિન્નીના પિતા બન્યા છે, પડદા પર અન્નૂ કપૂર કરતાં ઉંમરમાં નાના દેખાય છે. આવી સ્થિતિમાં તેમનું અન્નૂ કપૂરના સસરાનું પાત્ર સંપૂર્ણપણે વિશ્વસનીય લાગતું નથી. કેમેરા વર્ક અને બાકીના ટેકનિકલ પાસાં વાર્તા પ્રમાણે બરાબર છે. કેવું છે ફિલ્મનું મ્યુઝિક? ફિલ્મનું સંગીત વાર્તા સાથે ચાલે છે. ગીતો દ્રશ્યો પ્રમાણે સારા લાગે છે, પરંતુ થિયેટરમાંથી બહાર નીકળ્યા પછી બહુ યાદ રહેતા નથી. બેકગ્રાઉન્ડ સ્કોર ફિલ્મના મૂડને સપોર્ટ કરે છે. ફાઇનલ વર્ડિક્ટ: જોવી કે નહીં? ‘ઉત્તર દા પુત્તર’ કોઈ મોટી કે ભવ્ય ફિલ્મ નથી, પરંતુ એક સારા વિષયને પ્રામાણિકતા અને હળવાશથી રજૂ કરે છે. અન્નૂ કપૂરનો શાનદાર અભિનય, બાકીના કલાકારોનો સાથ અને વ્યંગ્યથી ભરેલી વાર્તા તેને એકવાર જોવા લાયક બનાવે છે. જો તમે એવી ફિલ્મો પસંદ કરો છો જે હસાવવાની સાથે વિચારવા પર પણ મજબૂર કરે, તો ‘ઉત્તર દા પુત્તર’ તમને નિરાશ નહીં કરે. જોકે, થોડી ટાઈટ એડિટિંગ અને કેટલાક વધુ સારા કાસ્ટિંગ નિર્ણયો તેને વધુ મજબૂત બનાવી શક્યા હોત.