આર્જેન્ટિનાના કેપ્ટન લિયોનેલ મેસ્સીના 39મા જન્મદિવસ નિમિત્તે તેમનું સૌથી મોટું સ્ટેચ્યુ બનાવ્યું છે. બુધવાર, 24 જૂને આર્જેન્ટિનાના પાટાગોનિયાના કટ્રાલ શહેરમાં મેસ્સીની 85 ફૂટ ઊંચી પ્રતિમાનું ઉદ્ઘાટન કર્યું. આ દુનિયામાં મેસ્સીની અત્યાર સુધીની સૌથી મોટી પ્રતિમા છે. સ્ટેચ્યુ બનાવવામાં 70 હજાર કિલો (70 ટન) સ્ટીલનો ઉપયોગ થયો. તેને તૈયાર કરવામાં 18 મહિના લાગ્યા. આ સન્માન મેસ્સીને વર્લ્ડકપ ઇતિહાસમાં સૌથી વધુ ગોલ કરનાર ફૂટબોલર બન્યાના બે દિવસ પછી મળ્યું. મેસ્સીએ સોમવારે ઓસ્ટ્રિયા સામે 2 ગોલ કરીને જર્મનીના મિરોસ્લાવ ક્લોઝનો રેકોર્ડ તોડ્યો હતો. તેના નામે હવે 18 વર્લ્ડકપ ગોલ થઈ ચૂક્યા છે. મેસ્સીના સ્ટેચ્યુની તસવીર… 2022 વર્લ્ડકપ ફાઇનલની ક્ષણ દર્શાવે છે પ્રતિમા પ્રતિમામાં મેસ્સીને કતાર વર્લ્ડકપ 2022 ફાઇનલ પછી ઘૂંટણિયે બેઠેલા દર્શાવ્યો છે. ફ્રાન્સ સામેની ફાઇનલમાં ગોન્ઝાલો મોન્ટિએલના પેનલ્ટી ગોલ પછી આર્જેન્ટિના વર્લ્ડ ચેમ્પિયન બન્યું હતું. મૂર્તિમાં મેસ્સી એક હાથમાં આર્જેન્ટિનાની જર્સી પકડેલો છે, જ્યારે બીજા હાથની આંગળી આકાશ તરફ ઊંચી છે. ગોલ કર્યા પછી મેસ્સી ઘણીવાર પોતાની દાદીને શ્રદ્ધાંજલિ આપવા માટે આવું સેલિબ્રેશન કરે છે. સ્થાનિક કલાકારે તૈયાર કરી વિશાળ પ્રતિમા 61 વર્ષીય સ્થાનિક શિલ્પકાર એલ્ડો બેરોઇસાએ આ પ્રતિમા તૈયાર કરી છે. આ પહેલા તેઓ ડાયનાસોર અને આર્જેન્ટિનાના સ્વતંત્રતા સેનાનીઓની વિશાળ મૂર્તિઓ બનાવી ચૂક્યા છે. બેરોઇસાએ કહ્યું, મેસ્સી આર્જેન્ટિનાનો એમ્બેસેડર છે. એક કલાકાર અને આર્જેન્ટિનાના નાગરિક હોવાને કારણે આ મારા માટે ખૂબ જ ખાસ પરિયોજના હતી. ભારતમાં બનેલી 70 ફૂટની પ્રતિમા હટાવવી પડી હતી મેસ્સીએ ગયા વર્ષે ડિસેમ્બરમાં ભારતની મુલાકાત લીધી હતી. આ દરમિયાન પશ્ચિમ બંગાળમાં તેની 70 ફૂટ ઊંચી પ્રતિમા બનાવી હતી. 27 દિવસમાં તૈયાર થયેલી તે પ્રતિમાને વિશ્વના સૌથી મોટા ફૂટબોલર સ્મારકોમાં ગણી હતી, પરંતુ આ જ મહિને સ્થાનિક પ્રશાસને તેને હટાવવાનો આદેશ આપ્યો. અધિકારીઓના મતે, તેજ પવનમાં પ્રતિમા હલી રહી હતી અને સુરક્ષાની દ્રષ્ટિએ ખતરો બની શકે તેમ હતી. મેસ્સીના સન્માનમાં બનેલું નવું મ્યુરલ વર્લ્ડકપ દરમિયાન આર્જેન્ટિનાની રાજધાની બ્યુનસ આયર્સમાં મેસ્સીના સન્માનમાં મ્યુરલ પણ બનાવ્યું છે. લગભગ 20 ફૂટ પહોળી અને 18 ફૂટ ઊંચી આ કલાકૃતિ પર 1300 પ્રશંસકોએ પોતાના નામ લખ્યા છે. કલાકાર લિયોનેલ ગાર્સિયાએ 18 દિવસમાં આ મ્યુરલ તૈયાર કર્યું છે. મેસ્સીએ વીડિયોથી તમામ ચાહકોનો આભાર માન્યો અને કહ્યું, આપ સૌનો ખૂબ ખૂબ આભાર. જે લોકો આ પહેલ સાથે જોડાયેલા છે અને સતત સમર્થન કરી રહ્યા છે, હું તેમનો આભારી છું.