સંયુક્ત આરબ અમીરાત (UAE) એ ઓઈલ ઉત્પાદક સંગઠન ઓપેકથી અંતર રાખીને સંકેત આપ્યો છે કે તેનું ભવિષ્ય ફક્ત ઓઈલ પર નિર્ભર નથી. રાષ્ટ્રપતિ શેખ મોહમ્મદ બિન ઝાયદ અલ નાહયાનની રણનીતિ ગ્રીન હાઇડ્રોજન, AI અને સ્પેસ મિશન પર છે. તેમણે 2015 માં કહ્યું હતું કે છેલ્લા ઓઈલના બેરલ પર UAE શોક નહીં, ઉત્સવ મનાવશે. પહેલાં સૈન્ય કમાન્ડર પછી ક્રાઉન પ્રિન્સથી રાષ્ટ્રપતિ બનવા સુધીના તેમના નિર્ણયોએ ફક્ત UAE નો કાયાકલ્પ કર્યો નથી, પરંતુ ખાડી દેશોમાં પરિવર્તનને પણ વેગ આપ્યો છે. શેખ મોહમ્મદના ઉછેરે તેમના નિર્ણયોનો પાયો નાખ્યો. જ્યારે તેઓ 14 વર્ષના હતા, ત્યારે પિતા શેખ ઝાયદે તેમને રાજવી ઓળખ છુપાવીને મોરોક્કો ભણવા મોકલ્યા હતા. જેથી તેઓ કઠોર જીવન જોઈ શકે. સેન્ડહર્સ્ટની તાલીમ અને ‘વેઈટર’ તરીકે કામ મોરોક્કોમાં અભ્યાસ દરમિયાન તેમણે પોતાનું નામ બદલીને ‘હસન’ રાખ્યું હતું, જેથી કોઈ તેમને ઓળખી ન શકે. તેઓ પોતાનું ભોજન જાતે બનાવતા અને કપડાં જાતે ધોતા હતા. ત્યાં તેમણે એક કેફેમાં વેઈટર તરીકે પણ કામ કર્યું, જેથી તેઓ સામાન્ય લોકોના સંઘર્ષ અને જીવનને નજીકથી સમજી શકે. શેખ મોહમ્મદે બ્રિટનની પ્રતિષ્ઠિત રોયલ મિલિટરી એકેડમી સેન્ડહર્સ્ટમાંથી તાલીમ લીધી અને પાસઆઉટ થઈને બાદમાં યુએઈ સેનામાં જોડાયા. સેનાના આધુનિકીકરણ અને વ્યાવસાયિક તાલીમને તેમણે પોતે મોનિટર કરી. શેખ મોહમ્મદે પોતાને કટ્ટરપંથી વિચારધારાથી અલગ રાખ્યા. વિદ્યાર્થી જીવનમાં જ્યારે એક મૌલવીએ તેમને કટ્ટરપંથ તરફ વાળવાનો પ્રયાસ કર્યો, ત્યારે તેઓ તરત સમજી ગયા કે આ વિચારધારા ખતરનાક છે. યમન યુદ્ધમાં નાહયાને એક દાખલો બેસાડ્યો. તેમણે પોતાના ભત્રીજાને ફ્રન્ટ લાઇન પર મોકલ્યો, જે આજે યુદ્ધના કારણે વ્હીલચેર પર છે. 2004માં ક્રાઉન પ્રિન્સ બન્યા પછી નાહયાને કાયદાઓની દિશા બદલી. સંસદમાં 50% મહિલા અનામત, 100% વિદેશી માલિકી અને ગોલ્ડન વિઝા જેવા નિર્ણયોએ UAEને રોકાણનું હબ બનાવ્યું. જોકે, 2004-22 સુધી તેમના ભાઈ શેખ ખલીફા બિન ઝાયદ રાષ્ટ્રપતિ હતા, પરંતુ વાસ્તવિક શક્તિ અને રાજદ્વારી ક્રાઉન પ્રિન્સ તરીકે નાહયાન પાસે હતી. આ જ UAEને ગલ્ફનો ગેમચેન્જર બનાવી રહ્યું છે. AI દ્વારા 50% સરકારી નિર્ણયો લેનારો પ્રથમ દેશ બનશે 2022માં રાષ્ટ્રપતિ બન્યા પછી શેખ મોહમ્મદે પર્સનલ લોમાં ફેરફાર કરીને છૂટાછેડા, કસ્ટડી અને વારસામાં મહિલાઓને અધિકાર આપ્યા. શ્રમ કાયદા બદલીને ‘નિશ્ચિત અવધિ’ના કરારો ફરજિયાત કરવામાં આવ્યા, જેનાથી બહારના મજૂરોને લાભ થયો. ‘એજન્ટિક AI’ મોડેલ હેઠળ લક્ષ્ય છે કે 2028 સુધીમાં 50% સરકારી કામ AI સંભાળે, જે વિશ્લેષણ સાથે નિર્ણયો પણ લઈ શકે. આવું કરનાર UAE દુનિયાનો પ્રથમ દેશ હશે. સાદગીની વાત કરીએ તો, ઘણીવાર તેઓ મહેમાનોને પોતે જ કોફી સર્વ કરે છે.