કન્ફેડરેશન ઓફ ઓલ ઈન્ડિયા ટ્રેડર્સ એટલે કે CAITએ 2 ઑક્ટોબરે દેશભરમાં ‘નો UPI ડે’ મનાવવાની મીડિયા રિપોર્ટ્સને ખોટી ગણાવી છે. રાષ્ટ્રીય વેપારી સંગઠને કહ્યું કે તેણે આવું કોઈ એલાન કર્યું નથી. CAITએ કહ્યું કે ડિજિટલ પેમેન્ટ ઇકોસિસ્ટમ ભારતની અર્થવ્યવસ્થાની મજબૂતી માટે જરૂરી છે અને સંગઠન તેના સમર્થનમાં છે. અમારો વિરોધ પ્રદર્શન સાથે કોઈ સંબંધ નથી. 2 દિવસ પહેલાં સમાચાર આવ્યા હતા કે દેશભરના વેપારીઓ અને દુકાનદારો 2 ઑક્ટોબરે UPI દ્વારા પેમેન્ટ સ્વીકારશે નહીં. સરકાર દ્વારા ₹2000થી વધુના ટ્રાન્ઝેક્શન પર 0.4% ચાર્જ લગાવવાના વિરોધમાં વેપારી સંગઠનોએ આ દિવસે નો UPI ડે મનાવવાની જાહેરાત કરી છે. આ દિવસે વેપારીઓ પોતાની દુકાનો પર લગાવેલા UPI QR કોડ, સ્કેનર, સાઉન્ડ બોક્સ અને અન્ય ડિજિટલ પેમેન્ટ ડિવાઇસને કાળા કપડાથી ઢાંકીને વિરોધ નોંધાવશે. વેપારીઓની સરકાર પાસે 15 ઑક્ટોબરથી લાગુ થનારો ચાર્જ દૂર કરવાની માંગ છે. કોન્ફેડરેશન ઑફ ઑલ ઈન્ડિયા ટ્રેડર્સના નિવેદનની મોટી વાતો 1. નો UPI ડે સાથે કોઈ લેવાદેવા નથી: CAITએ કહ્યું કે સંગઠને 2 ઑક્ટોબરે UPIના બહિષ્કાર અથવા નો UPI ડે અંગે કોઈ પ્રસ્તાવ પસાર કર્યો નથી. CAITના નામે ચલાવવામાં આવી રહેલા આવા સમાચાર સંપૂર્ણપણે ખોટા છે. 2. પ્રાદેશિક સંગઠનોનો વ્યક્તિગત વિરોધ: CAITએ જણાવ્યું કે UPI પર MDR ચાર્જના મુદ્દે કેટલાક પ્રાદેશિક અથવા સ્થાનિક વેપારી સંગઠનો વિરોધ પ્રદર્શન કરી શકે છે. આ તેમનો પોતાનો વ્યક્તિગત નિર્ણય છે અને તેને કોઈપણ રીતે CAITનું વલણ માનવું જોઈએ નહીં. 3. મીડિયા અને જનતાને અપીલ: CAITએ મીડિયાને અપીલ કરી છે કે સંગઠનના નામે કોઈપણ સમાચાર પ્રકાશિત કરતા પહેલાં સત્તાવાર સ્રોત પાસેથી તથ્યોની ખાતરી જરૂર કરે. આ સાથે જ વેપારીઓ અને સામાન્ય જનતાને માત્ર સત્તાવાર નિવેદનો પર જ વિશ્વાસ કરવાની સલાહ આપવામાં આવી છે. મહારાષ્ટ્ર સંગઠને કહ્યું હતું—દેશભરના 500 સંગઠનો વિરોધમાં ભાગ લેશે આ પહેલાં મહારાષ્ટ્ર ચેમ્બર ઑફ કોમર્સ, ઇન્ડસ્ટ્રી એન્ડ એગ્રીકલ્ચર (MACCIA)ના અધ્યક્ષ રવીન્દ્ર મંગવેએ કહ્યું હતું કે આ આંદોલન માત્ર મહારાષ્ટ્ર પૂરતું મર્યાદિત નહીં રહે, પરંતુ દેશભરના 500થી વધુ પ્રમુખ વેપારી સંગઠનો તેમાં ભાગ લેશે. વેપારી સંગઠનોનો UPI ચાર્જના વિરોધમાં શું તર્ક છે વેપારીઓ પર UPIના નવા MDR નિયમો મોટા વેપારીઓ પર 0.4% ચાર્જ: મહિને ₹1 લાખથી વધુ કમાણી કરતા વેપારીઓ (પર્સન-ટુ-મર્ચન્ટ)ને ₹2,000થી વધુની દરેક ચુકવણી સ્વીકારવા પર 0.4% MDR+GST ચૂકવવો પડશે. નાના વેપારીઓને રાહત: જે વેપારીઓની મહિને UPI દ્વારા કુલ કમાણી ₹1 લાખ સુધી છે, તેમના પર કોઈ ચાર્જ લાગશે નહીં, પછી ભલેને ટ્રાન્ઝેક્શન ₹2,000થી વધુનું હોય. કેટેગરી બદલવાનો નિયમ: જો કોઈ નાનો દુકાનદાર સતત 3 મહિના સુધી ₹1 લાખથી વધુ UPI કલેક્શન મેળવે છે, તો બેંક તેને આપમેળે ‘મોટા મર્ચન્ટ’ (પર્સન-ટુ-મર્ચન્ટ) કેટેગરીમાં શિફ્ટ કરી દેશે. ત્યાર બાદ તેને પણ ચાર્જ ચૂકવવો પડશે. ₹2,000 સુધીનું વેચાણ મફત: મોટા વેપારીઓને પણ ₹2,000 અથવા તેનાથી ઓછા નાના પેમેન્ટ્સ પર કોઈ ફી ચૂકવવી પડશે નહીં. મહત્તમ ચાર્જની મર્યાદા: ₹75,000 અથવા તેનાથી મોટા ટ્રાન્ઝેક્શન પર મર્ચન્ટ પાસેથી મહત્તમ ₹300+GST જ ચાર્જ લેવામાં આવશે. મર્યાદા દરેક ટ્રાન્ઝેક્શન પર લાગુ: ₹2,000ની મર્યાદા આખા દિવસના કુલ વેચાણ પર નહીં, પરંતુ દરેક પેમેન્ટ પર લાગુ થશે. ખાસ ક્ષેત્રો માટે માત્ર ₹5ની ફ્લેટ ફી: પેટ્રોલ પંપ, રેલવે, બિલ પેમેન્ટ, ટેલિકોમ, ઇન્શ્યોરન્સ અને એજ્યુકેશન સાથે જોડાયેલા વેપારીઓને ₹2,000થી વધુના પેમેન્ટ પર 0.40%ને બદલે ફ્લેટ ₹5 ચૂકવવા પડશે. કાર્ડની સરખામણીએ છતાં સસ્તું: ક્રેડિટ કાર્ડ (1.5%-2.5%) અને ડેબિટ કાર્ડ (0.90% સુધી)ની સરખામણીએ UPI પર MDR ચાર્જ ઘણો ઓછો છે.