ગ્લાસગો કોમનવેલ્થ ગેમ્સ 2026 દરમિયાન મેન્સ ટીમ જીમનાસ્ટિક ફાઈનલમાં એક દર્દનાક મોમેન્ટ જોવા મળી. 19 વર્ષીય ઇંગ્લિશ જીમનાસ્ટ ગેબ્રિયલ લેંગટન હાઇ બાર પર પોતાનું રૂટિન પૂરું કરી રહ્યો હતો, ત્યારે જ તેનો હાથ લપસી ગયો અને તે સીધા માથાના બળે ફ્લોર પર જઈ પડ્યો. આ અકસ્માત એટલો ભયાનક હતો કે આખા એરેનામાં સન્નાટો છવાઈ ગયો. સાથી ખેલાડીઓ અને દર્શકો સ્તબ્ધ થઈ ગયા, જ્યારે મેડિકલ સ્ટાફ તરત જ તેની પાસે પહોંચ્યો. લેંગટન ઘણી મિનિટો સુધી જમીન પર જ પડ્યો રહ્યો અને જાતે ઊભા પણ થઈ શક્યો નહીં. મેડિકલ ટીમે સ્થળ પર જ લેંગટનની સારવાર કરી. તેની ગરદન અને માથાને સ્થિર રાખવા માટે વિશેષ સપોર્ટ લગાવ્યો, જે બાદ તેને સ્ટ્રેચર પર સૂવડાવીને હોસ્પિટલ લઈ જવો પડ્યો. આ દરમિયાન સ્પર્ધાને પણ થોડા સમય માટે રોકી દેવામાં આવી અને ખેલાડીઓનું પૂરૂં ધ્યાન પોતાના સાથીની હાલત પર જ હતું. ગેબ્રિયલ લેંગટનને 6 વખતના ઓલિમ્પિક મેડલ વિજેતા મેક્સ વ્હાઇટલોકની જગ્યાએ ઇંગ્લેન્ડની ટીમમાં સામેલ કર્યો હતો. આ દર્દનાક અકસ્માત એ સમયે થયો જ્યારે ઇંગ્લેન્ડ સતત ચોથો કોમનવેલ્થ ગેમ્સ મેન્સ ટીમ ખિતાબ જીતવાનો પ્રયાસ કરી રહ્યું હતું. જોકે આ ઘટના પછી પણ ઇંગ્લેન્ડના ખેલાડીઓએ મુકાબલો પૂરો કર્યો, પરંતુ ટીમ ગોલ્ડ મેડલ જીતી શકી નહીં. કેનેડાએ ગોલ્ડ મેડલ પોતાના નામે કર્યો, જ્યારે ઇંગ્લેન્ડને સિલ્વર અને ઓસ્ટ્રેલિયાને બ્રોન્ઝથી સંતોષ માનવો પડ્યો. ગેબ્રિયલને લઈને હવે અપડેટ શું છે? મુકાબલા પછી ઇંગ્લેન્ડના જીમનાસ્ટ લ્યુક વ્હાઇટહાઉસે કહ્યું, ‘અમને જે માહિતી મળી છે, તે મુજબ ગેબ્રિયલ લેંગટન ઠીક છે. જીમનાસ્ટિક અત્યંત જોખમી રમત છે અને આવા અકસ્માતો આપણને એ વાતની યાદ અપાવે છે. પરંતુ સ્પર્ધા પૂરી કરવા માટે તમારે આ વાતોને પાછળ છોડવી પડે છે.’ ટીમ ઇંગ્લેન્ડે બાદમાં સત્તાવાર નિવેદન જાહેર કરીને જણાવ્યું કે હોસ્પિટલ પહોંચ્યા પછી ગેબ્રિયલ લેંગટન સંપૂર્ણપણે ભાનમાં હતો અને ડોક્ટરો સાથે વાત પણ કરી રહ્યો હતો. આ પછી બ્રિટિશ જીમનાસ્ટિક્સે માહિતી આપી કે તેના ઘણા સ્કેન કરવામાં આવ્યા, જેમના રિપોર્ટ ખૂબ જ પોઝિટિવ આવ્યા છે. કોઈ ગંભીર ઇજાની પુષ્ટિ થઈ નથી અને તેને હોસ્પિટલમાંથી રજા આપીને ટીમ હોટેલ મોકલી દેવામાં આવ્યો છે, જ્યાં મેડિકલ સ્ટાફની દેખરેખ હેઠળ તેની સારવાર ચાલુ રહેશે. ———————- કોમનવેલ્થ સંબંધિત આ સમાચાર પણ વાંચો… મીરાબાઈ ચાનુ ગોલ્ડ માટે ઉતરશે: કોમનવેલ્થ ગેમ્સનો ચોથો દિવસ આજે; ભારતીય ખેલાડીઓ 5 રમતોમાં દમ બતાવશે કોમનવેલ્થ ગેમ્સના ત્રીજા દિવસે ભારતીય ખેલાડીઓ વેઈટલિફ્ટિંગ, આર્ટિસ્ટિક જિમ્નાસ્ટિક્સ, લૉન બોલ્સ, સ્વિમિંગ અને બોક્સિંગમાં પડકાર રજૂ કરશે. ભારતની સૌથી વધુ આશાઓ વેઈટલિફ્ટિંગથી રહેશે. ઓલિમ્પિક સિલ્વર મેડલ વિજેતા મીરાબાઈ ચાનુ મહિલા 49 કિગ્રા ફાઇનલમાં ઉતરશે. સંપૂર્ણ સમાચાર વાંચો…