વિયેતનામમાં શનિવારે ભારતીય પ્રવાસીઓથી ભરેલી સ્પીડબોટ પલટી જતાં 15 ભારતીયોના મોત બાદ સ્પીડબોટના કેપ્ટનની ધરપકડ કરવામાં આવી છે. તેના પર કેસ દાખલ કરવામાં આવ્યો છે. મીડિયા રિપોર્ટ્સ અનુસાર, આ ભારતીય પ્રવાસીઓ ‘લાવા મોબાઈલ’ના ચેનલ પાર્ટનર અને કર્મચારીઓ હતા. તમામ કંપનીના ટોપ પરફોર્મિંગ ડિસ્ટ્રીબ્યુટર્સ માટે આયોજિત રિવોર્ડ ટ્રિપ પર વિયેતનામ ગયા હતા. ઘણા પીડિત પરિવારોએ જણાવ્યું કે તેમને અકસ્માતની પ્રથમ જાણકારી ટીવી ચેનલો અથવા મિત્રોના ફોનથી મળી. ત્યારબાદ ભારતીય દૂતાવાસ અને સ્થાનિક પ્રશાસને તેમનો સંપર્ક કર્યો. ઘણા પરિવારો હજુ પણ તેમના સ્વજનોના પાર્થિવ દેહ ભારતમાં પહોંચવાની રાહ જોઈ રહ્યા છે. પ્રાથમિક તપાસમાં સ્થાનિક અધિકારીઓનું કહેવું છે કે હવામાન અચાનક ખરાબ થવા અને ઊંચા મોજાંને કારણે આ અકસ્માત થયો હતો. જોકે, સમગ્ર મામલાની તપાસ ચાલુ છે. પલટી ગયેલી બોટ નીચે ફસાઈ ગયા હતા પ્રવાસીઓ ભારતીય દૂતાવાસ અનુસાર, બોટમાં કુલ 36 લોકો સવાર હતા. જેમાં 32 ભારતીય પ્રવાસીઓ અને ચાર વિયેતનામી ક્રૂ મેમ્બર હતા. બોટ માય રૂટ ટાપુથી બીજા ટાપુ તરફ જઈ રહી હતી. ત્યારે અચાનક હવામાન બદલાયું અને તેજ મોજાં વચ્ચે બોટ થોડી જ સેકન્ડમાં પલટી ગઈ. બચેલા મુસાફરોએ જણાવ્યું કે અકસ્માત એટલો ઝડપથી થયો કે કોઈને સંભાળવાનો મોકો મળ્યો નહીં. જે લોકો બોટની આગળ બેઠા હતા તેઓ સમુદ્રમાં કૂદીને બહાર નીકળી ગયા પરંતુ અંદર બેઠેલા ઘણા મુસાફરો પલટી ગયેલી બોટ નીચે ફસાઈ ગયા અને બહાર નીકળી શક્યા નહીં. સ્થાનિક નાવિક હા વાન લોકે જણાવ્યું કે તેમણે સમુદ્રમાં પલટી ગયેલી બોટ જોઈ, જેના પર ઘણા લોકો ચોંટેલા હતા. કેટલાક લોકો લાઈફ જેકેટ વગર સમુદ્રમાં વહી રહ્યા હતા. તેમની ટીમે દોરડું ફેંકીને લોકોને બહાર કાઢ્યા અને તરત જ બીજી રેસ્ક્યુ ટીમોને જાણ કરી. બાદમાં જેટ સ્કીની મદદથી ઘાયલોને કિનારે પહોંચાડવામાં આવ્યા. સર્વાઈવર બોલ્યા- સમયસર સારવાર મળી હોત તો વધુ જીવ બચી શક્યા હોત અકસ્માતમાં બચેલા ભારતીય પર્યટક નિર્મલ કુમારે જણાવ્યું કે સ્થાનિક રેસ્ક્યુ ટીમ જલ્દી પહોંચી ગઈ હતી, પરંતુ નજીકના ટાપુ પર પૂરતા મેડિકલ ઉપકરણો અને જરૂરી દવાઓ નહોતી. નિર્મલ કુમારના જણાવ્યા અનુસાર, તેમની સાથે હાજર એક ડોક્ટરે પણ કહ્યું કે જો જરૂરી દવાઓ અને તબીબી સુવિધાઓ હોત તો કેટલાક વધુ લોકોનો જીવ બચાવી શકાયો હોત. તેમણે જણાવ્યું કે લગભગ બે-ત્રણ કલાક પછી વિયેતનામ એરફોર્સ પહોંચી અને ઘાયલોની સારવાર શરૂ કરાવી. આંધ્ર પ્રદેશના અન્ય એક જીવિત બચેલા યાત્રીએ PTI ને જણાવ્યું કે બોટ ટાપુથી ફક્ત 300-400 મીટર જ આગળ વધી હતી. બધા લોકો તસવીરો લઈ રહ્યા હતા, ત્યારે અચાનક બોટ પલટી ગઈ. તેમણે કહ્યું, “અમે બધા મદદ માટે બૂમો પાડી રહ્યા હતા, પરંતુ થોડી જ ક્ષણોમાં બધું સમાપ્ત થઈ ગયું.” પાર્થિવ દેહોને જલ્દી ભારત લાવવાની તૈયારી તમિલનાડુ BJPના પૂર્વ પ્રદેશ અધ્યક્ષ કે. અન્નામલાઈએ અકસ્માત પર દુઃખ વ્યક્ત કર્યું છે. તેમણે કેન્દ્ર અને તમિલનાડુ સરકારને અપીલ કરી કે તમિલનાડુના 10 મૃતકોના મૃતદેહ જલ્દી રાજ્યમાં લાવવામાં આવે. સાથે જ ઘાયલોની સારી સારવારની પણ માંગ કરી. ભારતીય દૂતાવાસે જણાવ્યું કે તમામ 15 મૃતકોના પાર્થિવ શરીર ‘હો ચી મિન્હ સિટી’ પહોંચી ચૂક્યા છે. ત્યાં કાઉન્સલર અને સ્થાનિક પ્રશાસન જરૂરી કાનૂની પ્રક્રિયા પૂરી કરી રહ્યા છે. ઔપચારિકતાઓ પૂરી થતાં જ તમામ પાર્થિવ શરીરોને ભારત મોકલવામાં આવશે. દૂતાવાસ અને ભારતના કોન્સ્યુલેટ જનરલ સતત વિયેતનામ પ્રશાસનના સંપર્કમાં છે. અધિકારીઓએ મૃતદેહોને જલ્દી ભારત મોકલવા અને પ્રભાવિત પરિવારોને શક્ય તમામ મદદ આપવાનો ભરોસો આપ્યો છે. જ્યારે 15 ઘાયલ પણ હોસ્પિટલમાંથી રજા મળ્યા પછી ભારત પાછા ફરવાની તૈયારીમાં છે, જ્યારે એક ઘાયલની સારવાર હજુ ફૂ ક્વોકના હોસ્પિટલમાં ચાલી રહી છે