વેલેન્ટાઇન ડે પર રિલીઝ થઈ રહેલી શાહિદ કપૂર અને તૃપ્તિ ડિમરીની ફિલ્મ ‘ઓ રોમિયો’ માત્ર એક પ્રેમ કહાની નથી, પરંતુ ગાઢ ભાવનાઓ અને જટિલ પાત્રોની દુનિયા છે. દિવ્ય ભાસ્કર સાથેની ખાસ વાતચીત દરમિયાન શાહિદ કપૂર અને તૃપ્તિ ડિમરીએ વિશાલ ભારદ્વાજ સાથે કામ કરવાનો અનુભવ શેર કર્યો. તૃપ્તિએ જણાવ્યું કે ફિલ્મમાં અફ્શા જેવા આંતરિક પાત્રને પડદા પર ઉતારવું કેટલું પડકારજનક હતું. શાહિદે પોતાના અભિનયના દૃષ્ટિકોણ, રોમાન્સની વ્યાખ્યા અને ‘કબીર સિંહ’ તથા ‘એનિમલ પાર્ક’ને લઈને ચાલી રહેલી ચર્ચાઓ પર પણ સ્પષ્ટપણે વાત કરી, જ્યારે તૃપ્તિએ સહ-અભિનેતા તરીકે શાહિદ પાસેથી મળેલી શીખ અને પોતાની સફરની સુંદર ઝલક શેર કરી. પ્રસ્તુત છે વાતચીતના કેટલાક વધુ ખાસ અંશો.. સવાલ:’ઓ રોમિયો’ની સ્ક્રિપ્ટ જ્યારે પહેલીવાર સાંભળી, ત્યારે તે સમયે તમારા મનમાં શું ચાલી રહ્યું હતું અને તમને આ ફિલ્મ વિશે કોણે જણાવ્યું? જવાબ/તૃપ્તિ ડિમરી: મને વિશાલ સરનો ફોન આવ્યો હતો અને હું તેમને મળવા ઓફિસ ગઈ હતી. હું પહેલેથી જ ખૂબ ઉત્સાહિત હતી કારણ કે હું હંમેશા તેમની સાથે કામ કરવા માંગતી હતી. જ્યારે તેમણે કહાની સંભળાવી, ત્યારે મને તરત જ લાગ્યું કે આ કંઈક અલગ છે. કહાની સાથે પણ જોડાણ થયું અને મારા પાત્ર અફ્શા સાથે પણ. તે દિવસથી લઈને છેલ્લા શૂટ સુધીની આખી સફર ખૂબ જ સુંદર રહી. કેટલીક ફિલ્મો એવી હોય છે જેમાં કામ કરતી વખતે તમે ઈચ્છો છો કે આ સફર ક્યારેય પૂરી ન થાય. ‘ઓ રોમિયો’ મારા માટે એવી જ ફિલ્મ છે. સવાલ: શાહિદ, જ્યારે તમે સ્ક્રિપ્ટ સાંભળી ત્યારે તમારી પહેલી પ્રતિક્રિયા શું હતી? જવાબ/શાહિદ કપૂર: મારા અને વિશાલ ભારદ્વાજ સર વચ્ચેનો સંબંધ બહુ જૂનો છે, પરંતુ લગભગ સાત-આઠ વર્ષ પછી અમે કોઈ ફિલ્મ માટે ફરી સાથે આવ્યા. તેમ છતાં, હું દરેક સ્ક્રિપ્ટને તદ્દન ન્યુટ્રલ દૃષ્ટિકોણથી સાંભળું છું. મારા માટે સૌથી મહત્ત્વનું એ છે કે કહાની અને પાત્ર મારી સાથે જોડાય. જો તે કનેક્શન ન બને, તો ફિલ્મ કરવી મને પ્રામાણિક નથી લાગતી. જ્યારે વિશાલ સરે ‘ઓ રોમિયો’ની સ્ક્રિપ્ટ પૂરી કરી, ત્યારે મને લાગ્યું કે તેમાં તે ઊંડાણ અને ભાવનાત્મક લેયર છે, જે મને એક અભિનેતા તરીકે એક્સાઈટ કરે છે. આ વખતે તેમણે માસ અને ક્લાસ બંનેને ધ્યાનમાં રાખીને કહાની કહી છે. સવાલ: તૃપ્તિ, તમે ઘણી વાર કહ્યું છે કે તમે શાહિદ પાસેથી ઘણું શીખ્યા છો. એક સહ-અભિનેતા તરીકે તેમની કઈ બાબતો તમને સૌથી વધુ પ્રભાવિત કરે છે? જવાબ/તૃપ્તિ ડિમરી: માત્ર બે ગુણ ગણાવવા મુશ્કેલ છે. પરંતુ સૌથી પહેલા તેમનું શિસ્ત. તેઓ એક પરફેક્શનિસ્ટ છે. જો તેમને લાગે કે સીન વધુ સારો થઈ શકે છે, તો તેઓ ત્યાં સુધી કરતા રહે છે જ્યાં સુધી તેઓ પોતે સંપૂર્ણપણે સંતુષ્ટ ન થાય. બીજી વાત એ છે કે તેઓ દરેક ટેકમાં કંઈક નવું લઈને આવે છે. ક્યારેય એવું નથી લાગતું કે તે જ બાબતનું પુનરાવર્તન થઈ રહ્યું છે. આનાથી સામેના અભિનેતાની પર્ફોર્મન્સ પણ સુધરી જાય છે. અને સૌથી અગત્યની વાત એ છે કે તેઓ તેમના સહ-અભિનેતાને ખૂબ સુરક્ષિત અને રિલેક્સ અનુભવ કરાવે છે. એક અભિનેતા અને એક માણસ, બંને સ્વરૂપોમાં તેમની પાસેથી ઘણું શીખવા મળ્યું. સવાલ: અફ્શાનું પાત્ર ભજવતી વખતે તમારા માટે સૌથી મોટો પડકાર શું હતો? જવાબ/તૃપ્તિ ડિમરી: અફ્શા એક ખૂબ જ ઈન્ટરનલ પાત્ર છે. તેના મનમાં પીડા, ગુસ્સો અને ઉદાસી છે, પરંતુ તે બહાર બહુ ઓછી દેખાય છે. તે બેલેન્સ જાળવવું સરળ નહોતું. મારા એક્ટિંગ કોચ અતુલ મોંગિયા અને વિશાલ સર સાથે ઘણા લાંબા સેશન્સ થયા. શરૂઆતમાં મને તેને સમજવામાં સમય લાગ્યો, પરંતુ જેમ જેમ શૂટ આગળ વધ્યું, તેમ તેમ હું પાત્રની વધુ નજીક જતી ગઈ. મને લાગે છે કે જો કોઈ પાત્ર તમને પડકારતું નથી, તો તેમાં મજા નથી. અભિનેતા તરીકે ગ્રોથ ત્યાંથી જ શરૂ થાય છે. સવાલ: તમે બંનેની પહેલી મુલાકાત અને શરૂઆતનો કામકાજનો સંબંધ કેવો રહ્યો? જવાબ/તૃપ્તિ ડિમરી: અમે પહેલીવાર રીડિંગ દરમિયાન મળ્યા હતા. તે સમયે બધાનું ધ્યાન ફક્ત સ્ક્રિપ્ટ અને પાત્ર પર હતું. કોઈને જજ કરવાનો સવાલ જ નહોતો. શાહિદ કપૂર: પહેલા જ દિવસે અમારો એક મહત્વનો સીન હતો અને મેં જોયું કે તૃપ્તિ પૂરી રીતે પોતાના પાત્રમાં હતી. જ્યારે તમે કોઈ અભિનેતાને આટલા સમર્પણ સાથે કામ કરતા જુઓ છો, તો એક અલગ પ્રકારનો સંતોષ મળે છે. સવાલ:ફિલ્મ વેલેન્ટાઇન ડે પર રિલીઝ થઈ રહી છે. લોકો જાણવા માંગે છે કે એક હાર્ડકોર રોમેન્ટિક વ્યક્તિમાં કઈ-કઈ ખાસિયતો હોય છે. શું તમે પોતાને રોમેન્ટિક માનો છો? જવાબ/શાહિદ કપૂર: હું મારા વિશે જાતે ટિપ્પણી કરી શકતો નથી. તેના માટે તમારે કોઈ બીજાને પૂછવું પડશે. મને ખબર નથી કે હું કેટલો રોમેન્ટિક છું. પરંતુ હા, રોમાન્સ એક ખૂબ જ સુંદર વસ્તુ છે. મોહબ્બત (પ્રેમ) જીવનની સૌથી સુંદર બાબતમાંથી એક છે, કોઈ શંકા વિના. જો પૂછશો, તો હું કહીશ કે હા, હું રોમેન્ટિક છું. તૃપ્તિ ડિમરી: હું રોમેન્ટિક પણ છું અને થોડી રિયલિસ્ટ પણ. બંનેનું બેલેન્સ જરૂરી છે. સવાલ: તમારા બંનેનું એક સામાન્ય કનેક્શન સંદીપ રેડ્ડી વાંગા પણ છે. ફેન્સ સતત કહે છે કે જો એનિમલ પાર્ક બને, તો તેમાં કબીર સિંહની એન્ટ્રી થવી જોઈએ. આ અંગે તમે શું કહેવા માંગશો? જવાબ/શાહિદ કપૂર: ખબર નથી યાર, કદાચ હું આ સવાલનો જવાબ આપવા માટે યોગ્ય વ્યક્તિ નથી. પરંતુ સત્ય એ છે કે જ્યારે એનિમલ બની રહી હતી, ત્યારે સંદીપ મને મળવા આવ્યા હતા. તેમની ઈચ્છા હતી કે કબીર સિંહનો એક સીન તે દુનિયામાં હોય. કેટલાક કારણોસર, તારીખો અને અન્ય બાબતોને કારણે, તે થઈ શક્યું નહીં. પરંતુ તેમના મગજમાં આ વિચાર ચોક્કસ હતો. આગળ શું થશે, તે સંપૂર્ણપણે સંદીપ પર નિર્ભર છે. તે દુનિયા તેમની છે, પાત્રો તેમના છે. તેઓ જે યોગ્ય સમજશે, તે જ કરશે. ચાહકો ઈચ્છે છે, આ વાત સારી પણ લાગે છે. તૃપ્તિ ડિમરી: જ્યારે દર્શકો કોઈ પાત્રને આટલા લાંબા સમય સુધી યાદ રાખે છે અને ફરીથી જોવા માંગે છે, ત્યારે તે દર્શાવે છે કે તે પાત્ર તેમના દિલમાં વસી ગયું છે. સવાલ: હાલમાં અરિજીત સિંહે ઇન્ડસ્ટ્રીમાંથી બ્રેક લીધો. આ અંગે તમારો શું અભિપ્રાય છે? જવાબ/શાહિદ કપૂર: દરેક કલાકારની પોતાની અંગત યાત્રા હોય છે. કલા ખૂબ જ અંગત બાબત છે. જો કોઈ કલાકાર પોતાના માટે થોડી શાંતિ ઈચ્છે છે, તો તે તેનો હક છે. અરિજીતે દુનિયાને ખૂબ શાંતિ આપી છે. તૃપ્તિ ડિમરી: આ નિર્ણયો ખૂબ જ અંગત હોય છે અને આપણે તેમને સમજદારીપૂર્વક જોવા જોઈએ. સવાલ: કબીર સિંહ આજે પણ તમારા સૌથી ચર્ચિત પાત્રોમાંથી એક છે. એનિમલ પાર્કમાં તેની એન્ટ્રીને લઈને જે ચર્ચા છે, તેને તમે કેવી રીતે જુઓ છો? જવાબ/શાહિદ કપૂર: આ સાચું છે કે જ્યારે એનિમલ બની રહી હતી, ત્યારે સંદીપ રેડ્ડી વાંગા મને મળવા આવ્યા હતા. તેઓ ઈચ્છતા હતા કે કબીર સિંહનો એક સીન તે ફિલ્મની દુનિયામાં હોય. પરંતુ ઘણી વાર પરિસ્થિતિઓ એવી બને છે કે વસ્તુઓ ઈચ્છવા છતાં પણ થઈ શકતી નથી. કેટલીક તારીખોનો મુદ્દો હતો, કેટલાક અન્ય કારણો હતા. આ સંપૂર્ણપણે ડિરેક્ટરનો નિર્ણય હોય છે. તે તેમની દુનિયા છે, તેમના પાત્રો છે. જો તેમને લાગશે કે કોઈ પાત્રની એન્ટ્રી કહાનીને વધુ મજબૂત બનાવે છે, તો તેઓ ચોક્કસ કરશે. એક અભિનેતા તરીકે એ જાણીને સારું લાગે છે કે લોકો આજે પણ તે પાત્રો સાથે આટલી લાગણી અનુભવે છે.