વેસ્ટ ઇન્ડીઝ ક્રિકેટ બોર્ડ (CWI)એ પોતાના ક્રિકેટરોના પગારમાં 25%નો ઘટાડો કર્યો છે. એટલું જ નહીં, આ વર્ષે મેન્સની સુપર-50 અને વુમન્સ T20 બ્લેઝ ટુર્નામેન્ટ પણ સ્થગિત કરી દેવામાં આવી છે. મીડિયા અહેવાલો અનુસાર, વિન્ડિઝ બોર્ડે સ્થાનિક ખેલાડીઓના કરારની અવધિ ઘટાડીને 7 મહિના કરી દીધી છે, જ્યારે આંતરરાષ્ટ્રીય ખેલાડીઓનો 12 મહિનાનો રિટેનર કરાર ચાલુ રહેશે. હકીકતમાં, વેસ્ટ ઇન્ડીઝ ક્રિકેટ બોર્ડ આર્થિક સંકટનો સામનો કરી રહ્યું છે. CWI ચીફે કહ્યું- નાણાકીય સ્થિરતા માટે નિર્ણય જરૂરી હતો CWIના ચીફ એક્ઝિક્યુટિવ ક્રિસ ડેહરિંગે જણાવ્યું હતું કે બોર્ડને નાણાકીય, વિકાસ અને સ્પર્ધાત્મક સ્તરે અનેક પડકારોનો સામનો કરવો પડી રહ્યો છે. ડેહરિંગે કહ્યું, ‘આ આદર્શ સ્થિતિ નથી, પરંતુ નાણાકીય સ્થિરતા માટે આ જરૂરી પગલું છે.’ તેમણે વેસ્ટ ઇન્ડીઝ પ્લેયર્સ એસોસિયેશન અને ખેલાડીઓના સહયોગની પણ પ્રશંસા કરી. 15 વર્ષમાં સ્થાનિક એરલાઇન્સ પર ₹670 કરોડનો ખર્ચ ડેહરિંગના જણાવ્યા મુજબ, છેલ્લા 15 વર્ષમાં ક્રિકેટ વેસ્ટ ઇન્ડીઝે સ્થાનિક એરલાઇન્સ પર 80 મિલિયન અમેરિકી ડોલર એટલે કે આશરે ₹670 કરોડ ખર્ચ્યા છે. તેના બદલામાં એરલાઇન્સ તરફથી બોર્ડને કોઈ સ્પોન્સરશિપ મળી નથી. તેમણે કહ્યું કે પ્રવાસ અને રહેવાના ખર્ચે બોર્ડ પર દબાણ વધાર્યું છે. લાંબા સમયથી આ ખર્ચને કારણે થયેલા નાણાકીય નુકસાન અને વર્તમાન કેશ ફ્લોની સમસ્યાને ધ્યાનમાં રાખીને ખર્ચ ઘટાડવાના નિર્ણયો લેવામાં આવ્યા છે. ICC પાસેથી મળશે ₹153 કરોડની લોન નાણાકીય સંકટ વચ્ચે ICCએ ક્રિકેટ વેસ્ટ ઇન્ડીઝ માટે 16 મિલિયન અમેરિકી ડોલર એટલે કે આશરે ₹153 કરોડની લોનને મંજૂરી આપી છે. જોકે, CWIએ આ ભંડોળ મેળવવા માટે ICC દ્વારા નક્કી કરવામાં આવેલા ‘ક્રિટિકલ મેટ્રિક્સ’ પૂર્ણ કરવા પડશે. બોર્ડના જણાવ્યા મુજબ, આ શરતો પૂર્ણ કરવાની પ્રક્રિયા આ મહિનાથી શરૂ થઈ રહી છે. સુપર-50 અને T20 બ્લેઝની જગ્યાએ ઓલિમ્પિક ક્વોલિફિકેશન ટુર્નામેન્ટ CWIએ સ્થગિત કરાયેલી સ્થાનિક ટુર્નામેન્ટ્સની જગ્યાએ 2028 લોસ એન્જલસ ઓલિમ્પિક્સ માટે પુરુષ અને મહિલા ક્રિકેટ ક્વોલિફિકેશન ટુર્નામેન્ટ યોજવાનો નિર્ણય લીધો છે. IOCના નિયમો અનુસાર વેસ્ટ ઇન્ડીઝ સંયુક્ત પ્રાદેશિક ટીમ તરીકે ઓલિમ્પિક્સમાં ભાગ લઈ શકતું નથી. ઓલિમ્પિક્સમાં માન્યતા પ્રાપ્ત નેશનલ ઓલિમ્પિક કમિટી ધરાવતા સ્વતંત્ર દેશો જ ભાગ લઈ શકે છે. આવી સ્થિતિમાં કેરેબિયન ક્ષેત્રના અલગ-અલગ દેશો પોતાના રાષ્ટ્રીય ધ્વજ હેઠળ ક્વોલિફિકેશન ટુર્નામેન્ટમાં ઉતરશે. T20 લીગ્સ સાથે સ્પર્ધા વધશે વિશ્વભરની T20 લીગ્સને કારણે વેસ્ટ ઇન્ડીઝ ક્રિકેટ લાંબા સમયથી ખેલાડીઓને રાષ્ટ્રીય ટીમ સાથે જોડાયેલા રાખવાના પડકારનો સામનો કરી રહ્યું છે. ફ્રેન્ચાઇઝી લીગ્સમાં મળતા આકર્ષક કરારો ખેલાડીઓ માટે મોટો વિકલ્પ છે. સેન્ટ્રલ કોન્ટ્રાક્ટના પગારમાં 25% ઘટાડા બાદ બોર્ડ સામે ખેલાડીઓને કરાર સાથે જોડાયેલા રાખવાનો પડકાર વધુ વધી શકે છે. તેનાથી વેસ્ટ ઇન્ડીઝ ક્રિકેટના નાણાકીય સંકટની અસર તેની રાષ્ટ્રીય ટીમ અને સ્થાનિક માળખા પર પણ પડી શકે છે.