શાહરૂખ ખાન અને શિલ્પા શેટ્ટીની ફિલ્મ ‘બાઝીગર’નો એક સીન આજે પણ લોકોમાં ચર્ચામાં રહે છે. ફિલ્મમાં શાહરૂખનું પાત્ર શિલ્પાના પાત્રને છત પરથી ધક્કો મારે છે. ખાસ વાત એ છે કે, નીચે પડતી વખતે શિલ્પાના ચહેરા પર સ્મિત દેખાય છે. હવે આ આઇકોનિક સીન પાછળની કહાણી શિલ્પા શેટ્ટીએ લગભગ 32 વર્ષ પછી પહેલીવાર શેર કરી. દિવ્ય ભાસ્કર સાથેની ખાસ વાતચીતમાં શિલ્પાને પૂછવામાં આવ્યું કે, તે સીનમાં પડતી વખતે શા માટે હસી રહી હતી? તેના જવાબમાં તેણે જણાવ્યું કે તે સમયે VFX કે CGI (કમ્પ્યુટર-જનરેટેડ ઇમેજરી) જેવી આધુનિક ટેકનોલોજી નહોતી. આખો સીન સ્ટ્રિંગ વર્કના સહારે ફિલ્માવવામાં આવ્યો હતો. સીનનું શૂટિંગ પૂરું થવામાં 4 દિવસ લાગ્યા શિલ્પાએ કહ્યું કે, આ એક સીનને શૂટ કરવા માટે તેમને 15 થી 20 ટેક આપવા પડ્યા અને તેના શૂટિંગમાં લગભગ 4 દિવસ લાગ્યા. તેણે જણાવ્યું કે, જો આજે તે સીનને ધ્યાનથી જોવામાં આવે, તો જે સ્ટ્રિંગ પર તે લટકેલી હતી, તે આજે પણ ફ્રેમમાં દેખાય છે. આજની ટેકનોલોજીથી તેને સરળતાથી હટાવી શકાય છે, પરંતુ તે સમયે આવું શક્ય નહોતું. શિલ્પાએ ‘બાઝીગર’ને તેના સમય કરતાં ઘણી આગળની ફિલ્મ ગણાવી. તેણે કહ્યું કે, ‘આ ફિલ્મમાં એક અલગ જ આત્મા હતી.’ ‘બાઝીગર’થી શિલ્પાએ ફિલ્મોમાં ડેબ્યૂ કર્યું હતું ‘બાઝીગર’ (1993) શિલ્પા શેટ્ટીની પહેલી ફિલ્મ છે. આ ફિલ્મનું ડિરેક્શન પ્રખ્યાત ડિરેક્ટર જોડી અબ્બાસ-મસ્તાને કર્યું હતું. ફિલ્મમાં શિલ્પા શેટ્ટી સાથે મુખ્ય ભૂમિકાઓમાં શાહરૂખ ખાન અને કાજોલ હતાં. ફિલ્મની રિલીઝ (12 નવેમ્બર 1993) સમયે શિલ્પાની ઉંમર ફક્ત 18 વર્ષ હતી. પોતાની પહેલી જ ફિલ્મમાં ઉત્તમ અભિનય માટે શિલ્પા શેટ્ટીને ફિલ્મફેર ‘બેસ્ટ સપોર્ટિંગ એક્ટ્રેસ’ના પુરસ્કાર માટે નોમિનેટ કરવામાં આવી હતી. ફિલ્મમાં શિલ્પા શેટ્ટી અને શાહરૂખ ખાન પર ફિલ્માવાયેલું ગીત ‘એ મેરે હમસફર’ આજે પણ ખૂબ જ લોકપ્રિય છે. આ ઉપરાંત ‘કિતાબેં બહોત સી’ ગીત પણ ખૂબ પસંદ કરવામાં આવ્યું હતું. લગભગ ₹4 કરોડના બજેટમાં બનેલી આ ફિલ્મે બોક્સ ઓફિસ પર ₹32 કરોડથી વધુની કમાણી કરી હતી અને તે તે વર્ષની ચોથી સૌથી વધુ કમાણી કરનારી ફિલ્મ બની હતી.