ભારતીય વન-ડે ટીમનો કેપ્ટન શુભમન ગિલને શુક્રવારે પ્રેક્ટિસ સેશન દરમિયાન ઈજા થઈ હતી. ઝડપી બોલર મોહમ્મદ સિરાજનો બોલ તેના જમણા કોણી પર વાગ્યો હતો. તે ખૂબ જ પીડામાં નજરે પડ્યો હતો. ત્યારબાદ સિરાજ તરત જ ગિલ પાસે પહોંચ્યો અને તેના હાલચાલ પૂછ્યા. ફિઝિયોએ પહેલાં તેના ખભાની ફ્લેક્સિબિલિટી તપાસી અને ત્યારબાદ કોણી પર આઇસ પેક લગાવ્યું. વેસ્ટ ઈન્ડિઝ સામેની વન-ડે સિરીઝ 27 સપ્ટેમ્બરથી શરૂ થઈ રહી છે. રવિવારે તિરુવનંતપુરમમાં ત્રણ મેચની સિરીઝની પ્રથમ મેચ રમાશે. લગભગ 20 મિનિટ સુધી આઇસ પેક લગાવીને બેઠો રહ્યો ગિલે લગભગ 20 મિનિટ સુધી આઈસ પેક લગાવી રાખ્યું. ત્યારબાદ ફિઝિયોએ તેની કોણી પર પ્લાસ્ટર લગાવ્યું. તે પ્રેક્ટિસ સેશન દરમિયાન સતત આરામ કરતો રહ્યો. આ દરમિયાન સિરાજ તેની પાસે બેઠો રહ્યો. બાદમાં રોહિત શર્મા પણ ગિલનો હાલચાલ જાણવા પહોંચ્યો. ત્યારબાદ વિરાટ કોહલી અને ગુરનૂર બરાર પણ તેની પાસે બેઠા રહ્યા. લગભગ દોઢ કલાક બાદ ફરી તપાસ કરવામાં આવી લગભગ એક કલાક બાદ ફિઝિયોએ ગિલને ફરીથી આઈસ પેક આપ્યો. ત્યારબાદ તે ફરી પોતાની સીટ પર જઈને બેસી ગયો અને બાકીની ટીમની પ્રેક્ટિસ જોતો રહ્યો. વધુ અડધો કલાક પસાર થયા બાદ ફિઝિયોએ ફરી એકવાર તપાસ કરી. ત્યારબાદ પણ ગિલ બેટિંગ માટે મેદાનમાં ઉતર્યો નહીં અને પોતાનું પ્રોટેક્ટિવ ગિયર સમેટતા જોવા મળ્યો. ડાબા હાથથી શોટની નકલ કરી પ્રેક્ટિસના અંતિમ પળોમાં ગિલે યશસ્વી જયસવાલ સાથે સ્મિત કરતાં વાતચીત કરી. આ દરમિયાન તેણે જમણો હાથ સીધો રાખીને ડાબા હાથની કોણીથી શોટ રમવાની નકલ પણ કરી. તે એક હાથમાં બેટ અને બીજા હાથમાં પેડ લઈને બહાર ગયો.