બાંગ્લાદેશના પૂર્વ વડાપ્રધાન શેખ હસીનાએ જાહેરાત કરી છે કે તેઓ 5 ઓગસ્ટના રોજ નવી દિલ્હી સ્થિત ‘ફોરેન કોરેસ્પોન્ડન્ટ્સ ક્લબ ઓફ સાઉથ એશિયા (FCCSA)’ ના કાર્યક્રમને ઓનલાઈન સંબોધિત કરશે. બાંગ્લાદેશે ભારત પાસે તેમના ભાષણ પર પ્રતિબંધ મૂકવાની માગ કરી છે. ભારત સરકારે કહ્યું છે કે શેખ હસીનાના ઓનલાઈન સંબોધન સાથે અમારો કોઈ સંબંધ નથી. વિદેશ મંત્રાલયના પ્રવક્તા રણધીર જયસ્વાલે મંગળવારે પ્રેસ કોન્ફરન્સમાં જણાવ્યું હતું કે, આ કાર્યક્રમ એક ખાનગી મીડિયા સંસ્થા દ્વારા આયોજિત કરવામાં આવી રહ્યો છે. ભારત સરકારને તેની સાથે કોઈ લેવાદેવા નથી. આ મંચ પર રજૂ થતા કોઈપણ વિચારને સરકાર સમર્થન પણ આપતી નથી. 5 ઓગસ્ટ 2024 ના રોજ બાંગ્લાદેશ છોડ્યા પછી આ પહેલીવાર હશે, જ્યારે શેખ હસીના કોઈ સાર્વજનિક કાર્યક્રમમાં જોવા મળશે. FCCSA દિલ્હીના પત્રકારોનું સંગઠન ફોરેન કોરેસ્પોન્ડન્ટ્સ ક્લબ ઓફ સાઉથ એશિયા (FCCSA) નવી દિલ્હી સ્થિત પત્રકારોનું સંગઠન છે. તેની સ્થાપના 1958માં થઈ હતી. શેખ હસીના આ જ સંગઠનના કાર્યક્રમમાં વીડિયો લિંક દ્વારા જોડાશે. મીડિયા રિપોર્ટ્સ અનુસાર, આ કાર્યક્રમ સાંજે 6 વાગ્યાથી 7:30 વાગ્યા સુધી ચાલશે. બાંગ્લાદેશે ગઈકાલે સોમવારે ભારતને અપીલ કરી હતી કે શેખ હસીના કે પ્રતિબંધિત સંગઠનો સાથે સંકળાયેલા કોઈપણ વ્યક્તિને ભારતની ધરતી પરથી રાજકીય ભાષણ આપવા કે એવી પ્રવૃત્તિઓ કરવાની મંજૂરી ન આપવામાં આવે, જેનાથી બાંગ્લાદેશમાં અસ્થિરતા ફેલાઈ શકે. ઢાકાનું કહેવું છે કે જો કોઈ ભાગેડુ નેતાને ભારતની જમીન પરથી રાજકીય ગતિવિધિઓ કરવાની મંજૂરી આપવામાં આવે, તો તેનાથી બંને દેશોના સુધરતા સંબંધો પર અસર પડી શકે છે. આ મુદ્દો સોમવારે બાંગ્લાદેશના વડાપ્રધાનના વિદેશી બાબતોના સલાહકાર હુમાયુ કબીર અને ઢાકામાં ભારતના ઉચ્ચાયુક્ત દિનેશ ત્રિવેદીની મુલાકાત દરમિયાન પણ ઉઠાવવામાં આવ્યો હતો. શેખ હસીનાએ 5 ઓગસ્ટનો દિવસ જ કેમ પસંદ કર્યો 5 ઓગસ્ટ 2024ના રોજ જ વિદ્યાર્થી આંદોલન પછી શેખ હસીનાને બાંગ્લાદેશ છોડવું પડ્યું હતું. પ્રદર્શનકારીઓ તેમના સરકારી આવાસ સુધી પહોંચી ગયા હતા. આ પછી તેમણે રાજીનામું આપીને સેનાના વિમાનથી ભારત આવી ગયા હતા. એટલે કે, જે દિવસે તેમને સત્તા છોડવી પડી હતી, તે જ દિવસે તેઓ બે વર્ષ પછી ફરી લોકો સમક્ષ આવી રહ્યા છે. એવું માનવામાં આવે છે કે તેઓ આ જ દિવસે પોતાની રાજકીય વાપસીનો સંદેશ આપવા માંગે છે. હસીના સાથે તેમના પુત્ર સજીબ વાજેદ જોય અને અવામી લીગના અન્ય નેતાઓ પણ કાર્યક્રમમાં સામેલ થશે. એવી અપેક્ષા છે કે હસીના જણાવશે કે તેઓ બાંગ્લાદેશ ક્યારે પરત ફરશે. તાજેતરમાં તેમણે કહ્યું હતું કે તેઓ ડિસેમ્બરમાં પાછા જઈને અદાલત સમક્ષ હાજર થશે. તેમણે એમ પણ કહ્યું હતું કે તેમને ખબર છે કે પાછા ફરવા પર તેમને ધરપકડ કરી શકાય છે અથવા તેમના જીવને જોખમ થઈ શકે છે. આવતા મહિને ભારત આવશે બાંગ્લાદેશના વડાપ્રધાન હસીના ઓગસ્ટ 2024 થી ભારતમાં રહે છે. બાંગ્લાદેશ ઘણી વખત તેમના પ્રત્યાર્પણની માગ કરી ચૂક્યું છે. હવે તેમની આ સાર્વજનિક હાજરી એવા સમયે થઈ રહી છે, જ્યારે સપ્ટેમ્બરમાં BRICS સંમેલન માટે બાંગ્લાદેશના વડાપ્રધાન તારિક રહેમાનના ભારત આવવાની સંભાવના છે. આવા સમયે ઢાકા નથી ઈચ્છતું કે ભારતની ધરતી પરથી હસીના રાજકીય સંદેશ આપે. વિદેશ મંત્રાલયના પ્રવક્તા રણધીર જયસ્વાલે જણાવ્યું કે ભારતે બાંગ્લાદેશના વડાપ્રધાન તારિક રહેમાનને ભારત આવવાનું આમંત્રણ આપ્યું છે. તેમણે જણાવ્યું કે સપ્ટેમ્બરની શરૂઆતમાં નવી દિલ્હીમાં યોજાનારા BRICS સંમેલનમાં પણ તારિક રહેમાનને બોલાવવામાં આવ્યા છે. બાંગ્લાદેશ હાલમાં બિમ્સટેક (BIMSTEC) નો અધ્યક્ષ છે, તેથી તેમને સંમેલનના આઉટરીચ સત્રમાં આમંત્રિત કરવામાં આવ્યા છે. રાજકીય આશ્રય શું છે, ભારતમાં તેના શું નિયમો છે