રણવીર સિંહની ફિલ્મ ‘ધુરંધર’ સુપરહિટ સાબિત થઈ છે. મંગળવારે મેકર્સે ‘ધુરંધર 2’ એટલે કે ‘ધુરંધરઃ ધ રિવેન્જ’ની પણ સત્તાવાર જાહેરાત કરી દીધી. આ દરમિયાન સોશિયલ મીડિયા પર કેટલીક તસવીરો વાયરલ થઈ ગઈ, જેના પછી એવી અટકળો લગાવવામાં આવી રહી છે કે, સલમાન ખાન પણ ફિલ્મમાં જોવા મળી શકે છે અને તે ‘બડે સાહેબ’નો કિરદાર નિભાવશે. જોકે, આ દાવો સંપૂર્ણપણે ખોટો છે. તે તેનો ભાગ નહીં હોય. DNAના રિપોર્ટ અનુસાર, ‘ધુરંધર 2’ સાથે જોડાયેલા કિરદારોની એક યાદી સોશિયલ મીડિયા પર વાયરલ થઈ રહી છે, જેમાં કિરદારોના નામ અને તેમને ભજવનારા કલાકારોનો ઉલ્લેખ કરવામાં આવ્યો છે. આ યાદીમાં મેજર ઇકબાલ (અર્જુન રામપાલ) અને તેના સાથીઓના નામ પણ સામેલ છે. ફિલ્મમાં પણ મેજર ઇકબાલ ઘણીવાર ‘બડે સાહબ’નો ઉલ્લેખ કરે છે અને તેને પડદા પાછળથી બધી દોરીઓ હલાવનાર માસ્ટરમાઇન્ડ ગણાવે છે, જેને ISI અને માફિયાનો સૌથી મોટો બોસ માનવામાં આવે છે. આ દરમિયાન એક નેટિઝને ફિલ્મના ક્રેડિટ્સમાંથી લેવાયેલો એક સ્ક્રીનશોટ શેર કર્યો છે, જેમાં એક પાત્રનું નામ દાઉદ ઇબ્રાહિમ લખેલું જોવા મળે છે અને આ ભૂમિકા અભિનેતા દાનિશ ઇકબાલ ભજવતા જોવા મળી શકે છે. ત્યારથી સોશિયલ મીડિયા પર ચર્ચા શરૂ થઈ ગઈ છે. ઘણા નેટિઝન્સનું માનવું છે કે દાઉદ ઇબ્રાહિમ જ ફિલ્મમાં બડે સાહબ છે, જ્યારે કેટલાક લોકો આનાથી સહમત નથી. તેમનું કહેવું છે કે બડે સાહબનું પાત્ર કોઈ એક ભાગેડુ ડોન કરતાં ઘણું મોટું અને પ્રભાવશાળી હોઈ શકે છે. જોકે, એવું પણ કહેવામાં આવી રહ્યું છે કે બડે સાહબનો રોલ એટલો મોટો નથી અને તેને પહેલાથી જ શૂટ કરવામાં આવ્યો છે.