પાન-ઇન્ડિયા એક્શન ફિલ્મ ‘ડાકુ’માં સાઉથ સ્ટાર અદિવિ શેષ અને ભોજપુરી ઇન્ડસ્ટ્રીના પ્રખ્યાત સિંગર પવન સિંહ ડાન્સ કરતા જોવા મળશે. આ ગીત તેલુગુ, હિન્દી અને ભોજપુરી સિનેમાની એકસાથે ઝલક બતાવશે. પવન સિંહે ઇન્સ્ટાગ્રામ પર પોસ્ટ શેર કરતા કેપ્શનમાં લખ્યું, ‘ભાઈ ભોજપુરી અને તેલુગુ ઝિંદાબાદ.’ નોંધનીય છે કે, અદિવી શેષ ઉપરાંત ફિલ્મમાં મૃણાલ ઠાકુર મુખ્ય ભૂમિકામાં જોવા મળશે, જ્યારે અનુરાગ કશ્યપ એક મહત્વપૂર્ણ ભૂમિકા ભજવી રહ્યા છે. મૃણાલ ઠાકુર પોતાનું શૂટિંગ પૂરું કરી ચૂકી છે અને અદિવિ શેષે તાજેતરમાં જ ફિલ્મનું શૂટિંગ પૂરું થયાની જાણકારી આપી છે. ‘ડાકુ’ આ વર્ષની સૌથી વધુ ચર્ચામાં રહેલી એક્શન ફિલ્મોમાં સામેલ થઈ ગઈ છે. ‘ડાકુ’ ફિલ્મનું ડિરેક્શન શનીલ દેવો કરી રહ્યા છે. ફિલ્મનું નિર્માણ સુપ્રિયા યારલગડ્ડાએ કર્યું છે, જ્યારે સુનીલ નારંગ તેના સહ-નિર્માતા છે અને ફિલ્મને અન્નપૂર્ણા સ્ટુડિયોઝ રજૂ કરી રહ્યું છે. ફિલ્મનું શૂટિંગ એકસાથે હિન્દી અને તેલુગુમાં કરવામાં આવ્યું છે, જ્યારે તેની વાર્તા અને પટકથા અદિવી શેષ અને શનીલ દેવોએ સાથે મળીને લખી છે.