બોલિવૂડ એક્ટર જ્હોન અબ્રાહમ ને મળવા માટે એક ફેન સ્ટેજ પર પહોંચી ગયો. આ ઘટના ત્યારે બની, જ્યારે રવિવાર એટલે કે 21 જૂને વર્લ્ડ મોટરસાયકલ ડે ના અવસરે તે બેંગલુરુમાં આયોજિત એક ઇવેન્ટમાં સામેલ થયો. ઇવેન્ટ દરમિયાન જ્હોને બાઇક પર એન્ટ્રી લીધી અને ત્યાં હાજર લોકો સાથે બાઇક્સ પ્રત્યેના પોતાના લગાવ વિશે વાત કરી. ઇવેન્ટ દરમિયાન એક ફેન સિક્યોરિટીને ગોથે ચડાવી સ્ટેજ પર જ્હોનને મળવા પહોંચી ગયો. સામે આવેલા વીડિયોમાં દેખાઈ રહ્યું છે કે ફેનના સ્ટેજ પર પહોંચતા જ એક બોડીગાર્ડે તેને પકડીને નીચે લઈ જવાનો પ્રયાસ કર્યો. આ દરમિયાન જ્હોન અબ્રાહમે બોડીગાર્ડને રોકવાનો પ્રયાસ કર્યો અને ફેન સાથે થોડીવાર મુલાકાત કરી. આ ઘટનાનો વીડિયો વાયરલ થયા બાદ સોશિયલ મીડિયા પર લોકોની અલગ-અલગ પ્રતિક્રિયાઓ સામે આવી છે. ઘણા યુઝર્સે જ્હોનના વર્તનની ખૂબ પ્રશંસા કરી. એક યુઝરે લખ્યું, “જ્હોન ખરેખર જમીન સાથે જોડાયેલા વ્યક્તિ છે.” બીજાએ લખ્યું, “જ્હોન ખૂબ સારો વ્યક્તિ છે.” અન્ય એક યુઝરે કોમેન્ટ કરી, “તમે માનવતા, દયા અને તમારા ચાહકો પ્રત્યેના પ્રેમનું ઉદાહરણ છો. તમે તમારા ચાહકનો દિવસ બનાવી દીધો.” જોકે, કેટલાક યુઝર્સે તેને પેઇડ પીઆર સ્ટંટ ગણાવ્યો. એક યુઝરે લખ્યું, “મને આમાં કંઈપણ અસલી લાગ્યું નહીં, આજકાલ પીઆર ટીમો ખૂબ જ ક્રિએટિવ બની ગઈ છે.” જ્યારે બીજાએ કમેન્ટ કરી, “ખબર નથી આ એક્ટ માટે કેટલા પૈસા આપવામાં આવ્યા. હવે બધું જ લાઇક્સ, વ્યૂઝ અને ચર્ચા માટે કરવામાં આવે છે.” જ્હોન છેલ્લે ‘તેહરાન’ ફિલ્મમાં જોવા મળ્યા હતા વર્ક ફ્રન્ટની વાત કરીએ તો, જ્હોન અબ્રાહમ છેલ્લે ‘તેહરાન’ ફિલ્મમાં જોવા મળ્યા હતા, જે ગયા વર્ષે 14 ઓગસ્ટે OTT પર રિલીઝ થઈ હતી. આ પહેલા તેઓ ‘ધ ડિપ્લોમેટ’ ફિલ્મમાં જોવા મળ્યા હતા. આ ફિલ્મ 14 માર્ચ 2025ના રોજ સિનેમાઘરોમાં રિલીઝ થઈ હતી. ફિલ્મનું કુલ બજેટ લગભગ 20 કરોડ રૂપિયા હતું. જ્યારે, વિશ્વભરમાં તેની કુલ કમાણી લગભગ 51.46 કરોડ રૂપિયા રહી હતી. હવે તે રોહિત શેટ્ટીના પ્રોડક્શનમાં બની રહેલી રાકેશ મારિયાની બાયોપિકમાં જોવા મળશે, જે આ વર્ષે રિલીઝ થવાની અપેક્ષા છે. આ ઉપરાંત તે હર્ષવર્ધન રાણે સાથે ‘ફોર્સ 3’ પર પણ કામ કરી રહ્યા છે, જેનું શૂટિંગ ચાલુ છે.