સાઉથ સિનેમાના લોકપ્રિય એક્ટર નિખિલ સિદ્ધાર્થ તેની બહુપ્રતિક્ષિત ફિલ્મ ‘સ્વયંભૂ’ ને લઈને ચર્ચામાં છે. ‘કાર્તિકેય 2’ની સફળતા પછી જ્યાં દર્શકો તેના આગામી પ્રોજેક્ટની રાહ જોઈ રહ્યા હતા, ત્યાં નિખિલ છેલ્લા બે વર્ષથી આ મહત્વાકાંક્ષી ફિલ્મની તૈયારીમાં વ્યસ્ત હતો. તાજેતરમાં રિલીઝ થયેલા ટીઝરને દર્શકો તરફથી જબરદસ્ત પ્રતિસાદ મળ્યો છે, જેણે ફિલ્મને લઈને ઉત્સુકતા વધુ વધારી દીધી છે. દિવ્ય ભાસ્કર સાથેની ખાસ વાતચીતમાં નિખિલે તેના લાંબા ટ્રાન્સફોર્મેશન, કઠિન તાલીમ, ઐતિહાસિક પૃષ્ઠભૂમિ પર આધારિત વાર્તા અને ભારતીય સંસ્કૃતિ સાથેના જોડાણ વિશે ખૂલીને વાત કરી. પ્રસ્તુત છે કેટલાક મુખ્ય અંશો… પ્રશ્ન: ‘કાર્તિકેય 2’ પછી દરેક વ્યક્તિ જાણવા માંગતું હતું કે, તમે ક્યાં છો? તમે અઢી વર્ષ એક જ ફિલ્મને આપ્યા. હવે ‘સ્વયંભૂ’ના ટીઝરને જબરદસ્ત પ્રતિસાદ મળી રહ્યો છે. આટલી મહેનત અને આ પ્રશંસા પર તમારી શું લાગણી છે? જવાબ: અમે ‘સ્વયંભૂ’ માટે લગભગ બે વર્ષ સુધી પૂરી લગનથી કામ કર્યું. હું તેને માત્ર મહેનત નહીં કહું, અમે તેને જીવ્યા છીએ. લાંબા વાળ રાખવા, દાઢી વધારવી અને શરીરને યોદ્ધા જેવું બનાવવું સહેલું નહોતું. હું શારીરિક રીતે પાતળો છું, તેથી સ્નાયુઓ વધારવા માટે વિશેષ આહાર અને કઠિન અભ્યાસ કરવો પડ્યો. દરેક એક્શન સીન પહેલાં તૈયારી કરવી પડતી હતી. આ પડકારજનક ચોક્કસ હતું, પરંતુ અનુભવ ખૂબ જ સુંદર રહ્યો. હવે જ્યારે ટીઝરને લોકોનો પ્રેમ મળી રહ્યો છે, ત્યારે લાગે છે કે રાહ જોવી સાર્થક થશે. પ્રશ્ન: ફિલ્મની ટેકનિકલ ટીમ ખૂબ જ મજબૂત છે. શું તેનાથી અપેક્ષાઓ વધી ગઈ? જવાબ: ચોક્કસપણે. અમારા સિનેમેટોગ્રાફર કે. કે. સેંથિલ કુમારે ‘બાહુબલી’ અને ‘આરઆરઆર’ જેવી ભવ્ય ફિલ્મોમાં કામ કર્યું છે. સંગીત રવિ બસરુરનું છે, જેમણે ‘કેજીએફ’, ‘સાલાર’ અને ‘માર્કો’ જેવી ફિલ્મોનું સંગીત આપ્યું છે. જ્યારે આવા અનુભવી લોકો કોઈ પ્રોજેક્ટ સાથે જોડાય છે, ત્યારે જવાબદારી આપોઆપ વધી જાય છે. આ વિશ્વાસ ફક્ત કલાકાર પર જ નહીં, પરંતુ વાર્તાની તાકાત પર પણ આધારિત હોય છે. પ્રશ્ન: ટીઝરમાં ‘સેંગોલ’ બતાવવામાં આવ્યું છે. ઘણા લોકો તેના વિશે જાણતા નથી. ફિલ્મની વાર્તા શું છે? જવાબ: ફિલ્મની શરૂઆત ‘સેંગોલ’થી થાય છે, જેને રાજદંડ અને ધર્મનું પ્રતીક માનવામાં આવે છે. કથા ઐતિહાસિક પૃષ્ઠભૂમિ પર આધારિત છે. વાર્તા 985 ઈસવીસનના એક સૈનિક ‘કૃષ્ણન રામન’ની આસપાસ ફરે છે. તે કોઈ રાજા નથી, પરંતુ એક સામાન્ય સૈનિક છે, પરંતુ પરિસ્થિતિઓ તેને મોટા રાજકીય ઘટનાક્રમનો ભાગ બનાવી દે છે. આ વાર્તા દર્શાવે છે કે, એક સામાન્ય વ્યક્તિ પણ અસાધારણ યોગદાન આપી શકે છે. પ્રશ્ન: તમારી ફિલ્મોમાં ભારતીય સંસ્કૃતિ અને ઇતિહાસની ઝલક સ્પષ્ટ દેખાય છે. શું આ તમારી વિચારસરણીનો ભાગ છે? જવાબ: હા, ચોક્કસ. બાળપણમાં દાદા-દાદી પાસેથી રામાયણ અને મહાભારતની વાર્તાઓ સાંભળતો હતો. તે વાર્તાઓ મનમાં વસી ગઈ. મારું માનવું છે કે, પોતાની સંસ્કૃતિ અને ઇતિહાસને સાચી અને સન્માનજનક રીતે રજૂ કરવો જરૂરી છે. આજની પેઢીએ પણ પોતાના મૂળિયાં સાથે જોડાવું જોઈએ. મનોરંજનની સાથે જો પ્રેરણા મળે, તો તે વધુ સારું છે. પ્રશ્ન: ફિલ્મ માટે તમે કયા પ્રકારની તૈયારી કરી? જવાબ: નિર્માતાએ મારા પાત્ર પર વિશેષ ધ્યાન આપ્યું. મને 45 દિવસ માટે વિયેતનામ મોકલવામાં આવ્યો, જ્યાં 30-40 ફાઇટર્સ સાથે તાલીમ લીધી. તીરંદાજી, હથિયારોનો અભ્યાસ અને ઘોડેસવારી શીખી. મારા ઘોડાનું નામ ‘ડાયમંડ’ હતું, જેની સાથે આજે પણ ભાવનાત્મક જોડાણ છે. ડાયટમાં મોટો બદલાવ કર્યો. ખાંડ સંપૂર્ણપણે બંધ કરી. પ્રોટીન, ઇંડા અને નોનવેજનો સમાવેશ કર્યો. આજના દર્શકો વાસ્તવિકતા ઇચ્છે છે, તેથી સ્ક્રીન પર કંઈપણ બનાવટી ન હોવું જોઈએ. પ્રશ્ન: ફિલ્મમાં લવ સ્ટોરી અને ટેકનોલોજીને લઈને શું ખાસ છે? જવાબ:ફિલ્મમાં પ્રેમ કહાણી પણ છે, જે ખૂબ જ સંતુલિત અને ભાવનાત્મક છે. સંયુક્તા મેનન અને નભા નટેશન સાથે મારી સારી તાલમેલ જોવા મળશે. પ્રશ્ન: દર્શકોને ‘સ્વયંભૂ’ પાસેથી શું અપેક્ષા રાખવી જોઈએ? જવાબ: આ લગભગ ત્રણ કલાકની ભવ્ય સિનેમેટિક યાત્રા છે. મારી પહેલી 3D ફિલ્મ છે અને આધુનિક ટેકનોલોજીમાં બનેલી છે. ઉત્તર, દક્ષિણ, પૂર્વ, પશ્ચિમ, દરેક દર્શક તેને પોતાનાપણાથી જોઈ શકશે. જો દર્શકોનો પ્રેમ મળ્યો, તો આગળ તેનો વિસ્તાર પણ શક્ય છે. હાલમાં આ એક ઇતિહાસ, રોમાંચ અને પ્રેરણાથી ભરપૂર, સંપૂર્ણ વાર્તા છે.